സ​ഹോദരന് ‘ടാറ്റ’ പറയവേ പിഞ്ചുകുഞ്ഞ് ബാൽക്കണിയിൽനിന്ന് വീണുമരിച്ചു

ഹൈദരാബാദ്: ട്യൂഷൻ ക്ലാസിൽ പങ്കെടുക്കാൻ പോകുന്ന സഹോദരന് യാത്ര പറയുന്നതിനിടെ പിഞ്ചുകുഞ്ഞ് ബാൽക്കണിയിൽ നിന്ന് വീണ് മരിച്ചു. പെറ്റ്ബഷീറാബാദ് നിവാസിയായ മുഹമ്മദ് നിസാമിന്റെ മകൾ സിദ്റ അനം (ഒരുവയസ്സ്) ആണ് ദാരുണമായി മരിച്ചത്.

ശനിയാഴ്ച വൈകീട്ട് സിദ്റയുടെ മൂത്ത സഹോദരൻ ട്യൂഷൻ ക്ലാസിലേക്ക് പോകുമ്പോഴാണ് സംഭവം. പതിവുപോലെ യാത്രയാക്കാൻ കുട്ടി ബാൽക്കണിയിലേക്ക് ഓടി​യെത്തി. കെട്ടിടത്തിന്റെ രണ്ടാം നിലയിലെ ബാൽക്കണിയിൽ നിന്ന് സഹോദരന് കൈകാണിച്ച് ടാറ്റ പറയുന്നതിനിടെ കാൽവഴുതി റോഡിലേക്ക് വീഴുകയായിരുന്നുവെന്ന് സബ് ഇൻസ്പെക്ടർ ശങ്കർ പറഞ്ഞു.

റോഡിൽ പരിക്കേറ്റ നിലയിൽ കണ്ട സിദ്റയെ കുടുംബാംഗങ്ങൾ ഉടൻ സ്വകാര്യ ആശുപത്രിയിലേക്ക് കൊണ്ടുപോയി. സ്ഥിതി ഗുരുതരമായതിനാൽ ഉസ്മാനിയ ജനറൽ ആശുപത്രിയിലേക്ക് മാറ്റിയെങ്കിലും രാത്രി വൈകി മരിച്ചു. സംഭവത്തിൽ പൊലീസ് കേസെടുത്ത് അന്വേഷണം തുടരുന്നു.