തൃശൂർ കോർപറേഷൻ മുൻ ഡെപ്യൂട്ടി മേയർ സൂര്യപ്രകാശ് അന്തരിച്ചു

തൃശൂർ: കോർപറേഷൻ മുൻ ഡെപ്യൂട്ടി മേയറും എസ്.എൻ.ഡി.പി യോഗം തൃശൂർ യൂനിയൻ മുൻ പ്രസിഡന്റും മുൻ ഡയറക്ടർ ബോർഡ് അംഗവും സിനിമ നിർമാതാവുമായ മുണ്ടപ്പാട്ട് എം.കെ. സൂര്യപ്രകാശ് (68) അന്തരിച്ചു. തൃശൂരിൽ സ്വകാര്യ ആശുപത്രിയിൽ ചികിത്സയിലായിരുന്നു.

കൂർക്കഞ്ചേരി മണ്ഡലം മുൻ കോൺഗ്രസ് പ്രസിഡന്റും കോൺഗ്രസിന്റെ കോർപറേഷൻ മേഖലയിലെ പ്രധാന നേതാവുമായിരുന്നു. ഇക്കഴിഞ്ഞ തദ്ദേശ തെരെഞ്ഞെടുപ്പിന് തൊട്ട് മുമ്പാണ് കോൺഗ്രസ്‌ ബന്ധം ഉപേക്ഷിച്ച് സി.പി.എമ്മിനോട് സഹകരിച്ച് തുടങ്ങിയത്.

കോർപറേഷനിൽ ചിഹ്നം നൽകി സി.പി.എം മത്സരിപ്പിച്ചെങ്കിലും പരാജയപ്പെട്ടു. കോൺഗ്രസിൽ ഐ ഗ്രൂപ്പിലെ കരുണാകര പക്ഷക്കാരൻ ആയിരുന്നു. കരുണാകരൻ ഡി.ഐ.സി രൂപീകരിച്ചപ്പോൾ ഡി.ഐ.സിക്കൊപ്പം കൂടി.

കരുണാകരൻ മടങ്ങിയപ്പോൾ സൂര്യപ്രകാശും മടങ്ങിയെത്തി. കോർപറേഷൻ ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ, ശ്രീനാരായണ കോളജ് മുൻ ചെയർമാൻ, ശ്രീനാരായണ ലൈബ്രറി പ്രസിഡന്റ്, കണിമംഗലം കൺസ്യൂമർ സ്റ്റോർ സൊസൈറ്റി പ്രസിഡന്റ്, കൂർക്കഞ്ചേരി ലയൺസ് ക്ലബ് പ്രസിഡന്റ് എന്നീ സ്ഥാനങ്ങൾ വഹിച്ചിട്ടുണ്ട്.