മൂവാറ്റുപുഴയാറിൽ കുളിക്കാനിറങ്ങിയ ബന്ധുക്കളായ മൂന്നു പേർ മുങ്ങിമരിച്ചു

വെള്ളൂർ (കോട്ടയം): മൂവാറ്റുപുഴയാറ്റിൽ കുളിക്കാൻ ഇറങ്ങിയ ബന്ധുക്കളായ ഒമ്പതംഗസംഘത്തിലെ മൂന്നുപേർ മുങ്ങിമരിച്ചു. ആറുപേരെ നാട്ടുകാർ രക്ഷപ്പെടുത്തി. കാൽ വഴുതി വീണ പെൺകുട്ടിയെ രക്ഷിക്കാനുള്ള ശ്രമത്തിനിടെയാണ്​ ഈ കുട്ടിയടക്കം മൂന്നുപേർ മുങ്ങിമരിച്ചത്​. ഞായറാഴ്ച രാവിലെ 11.20 നായിരുന്നു സംഭവം.

തൃപ്പൂണിത്തുറ അരയൻകാവ് തോട്ടറ മുണ്ടക്കൽ ജോൺസൺ (56), സഹോദരൻ ജോബിയുടെ മകളും യു.കെയിൽ വിദ്യാർഥിനിയുമായ ജിസ്​ മോൾ (16), ജോൺസന്‍റെ സഹോദരി സുനിയുടെ മകൻ അലോഷ്യസ് (16) എന്നിവരാണ്​ മരിച്ചത്​. പിതാവിന്‍റെ കൺമുന്നിലായിരുന്നു ജിസ്​മോൾ മുങ്ങിത്താഴ്ന്നത്​. യു.കെയിലായിരുന്ന ജോബിയും കുടുംബവും ബന്ധുവിന്‍റെ മരണ​ത്തോടനുബന്ധിച്ചാണ്​ 10 ദിവസം മുമ്പ്​​ അരയൻകാവിലെ വീട്ടിലെത്തിയത്​. തുടർന്ന്​ കുളിക്കാൻ വെള്ളൂർ ചെറുകര പാലത്തിനു സമീപം എത്തിയതാണ്​.

കഴിഞ്ഞ ദിവസങ്ങളിലും ഇവർ ഇവിടെ എത്തിയിരുന്നു. ജോബി, ഭാര്യ സൗമ്യ, അലോഷിയു​ടെ മാതാവ്​ സുനി, ബന്ധു മുണ്ടക്കൽ മിനി എന്നിവരടക്കം ഒമ്പതുപേരാണ്​ സംഘത്തിലുണ്ടായിരുന്നത്​. ജോൺസൻ കുളികഴിഞ്ഞു കരക്കു കയറിയിരുന്നു. ഇതിനിടെ ജിസ്​മോളും അനിയത്തി ജുവലും ഒഴുക്കിൽപെട്ടു. ഇതുകണ്ട ജോൺസൻ വെള്ളത്തിൽ ചാടി. മറ്റുള്ളവരും ഇരുവരെയും രക്ഷിക്കാൻ ശ്രമിച്ചു. ജിസ്​മോളുടെ അനിയത്തിയെ രക്ഷിച്ചെങ്കിലും ജിസ്​മോളും അലോഷിയും പുഴയിലെ ശക്തമായ അടിയൊഴുക്കിൽ മുങ്ങിത്താഴ്​ന്നു.

ജോൺസന്​ നീന്തൽ അറിയാമായിരു​ന്നെങ്കിലും പാലത്തിനു സമീപം ചുഴിയുള്ള ​സ്ഥലമായതിനാൽ ഫലമുണ്ടായില്ല. നിലവിളി കേട്ടെത്തിയ നാട്ടുകാരാണ്​ ആറുപേരെയും രക്ഷിച്ചത്​. തുടർന്ന്​ അഗ്നിരക്ഷാസേനയെ അറിയിച്ചു. കടുത്തുരുത്തി, പിറവം എന്നിവിടങ്ങളിൽനിന്ന്​ എത്തിയ അഗ്നിരക്ഷാ സേനയും നാട്ടുകാരും ചേർന്നാണ്​ മൂന്നു പേരുടെയും മൃതദേഹം പുറത്തെടുത്തത്. 20 മിനിറ്റ്​ നീണ്ട തിരച്ചിലിനൊടുവിൽ ജോൺസന്‍റെ മൃതദേഹമാണ്​ ആദ്യം ക​ണ്ടെത്തിയത്​​. മൃതദേഹങ്ങൾ പൊതിയിലെ മേഴ്സി ഹോസ്പിറ്റലിൽ എത്തിച്ച് ഇൻക്വസ്റ്റ് തയാറാക്കി.

കോട്ടയം മെഡിക്കൽ കോളജ് ആശുപത്രിയിൽ പോസ്റ്റ്​മോർട്ടത്തിനുശേഷം മുട്ടുചിറയിലെ ഹോളിഫാമിലി ആശുപത്രി മോർച്ചറിയിലേക്കു മാറ്റി. ജോയലാണ്​ ജിസ്​മോളുടെ സഹോദരൻ. വരിക്കാംകുന്ന്​ പൂച്ചക്കാട്ടിൽ ബ്രഹ്മമംഗലം ജി.എച്ച്​.എസിലെ പ്ലസ്​ വൺ വിദ്യാർഥിയാണ്​ അലോഷ്യസ്​. പിതാവ് സാബു ഇറ്റലിയിലാണ്​. സഹോദരൻ അബിൻ സാബു. സംസ്കാരം പിന്നീട്​. അപകട സ്ഥലത്തും മേഴ്സി ആശുപത്രിയിലും എം.എൽ.എമാരായ മോൻസ് ജോസഫ്, സി.കെ. ആശ, അനൂപ് ജേക്കബ് എന്നിവരും ജനപ്രതിനിധികളും എത്തിയിരുന്നു.