ദേവനൂർ മഠാധിപതി ശിവപ്പ സ്വാമി പുഴയിൽ മരിച്ച നിലയിൽ

മംഗളൂരു: ദേവനൂർ മഠാധിപതി ശിവപ്പ സ്വാമി(60) കാവേരി നദിയിൽ മുങ്ങി മരിച്ചു. മുടുകുതൊരെയിൽ നിന്ന് നദിയിലേക്ക് ചാടുകയായിരുന്നുവത്രെ. സ്വാമിയുടെ മൃതദേഹം നദിയിൽ ഒഴുകുന്നത് കണ്ട നാട്ടുകാർ വിവരം അറിയിച്ചതിനെത്തുടർന്ന് തലക്കാട് പൊലീസ് എത്തിയാണ് കരക്കെടുത്തത്.

രണ്ടു ദിവസമായി മഠാധിപതിയെ കാണാനില്ലെന്ന് ബന്ധപ്പെട്ടവർ കവലണ്ടെ പൊലീസിൽ പരാതി നൽകിയിരുന്നു.

വിട്ടുമാറാത്ത രോഗത്തെ തുടർന്ന് മനഃശാന്തി നഷ്ടമായ അവസ്ഥയിലായിരുന്നു സ്വാമി എന്ന് മഠം അധികൃതർ പൊലീസിനോട് പറഞ്ഞു. ആത്മഹത്യയാണെന്ന പ്രാഥമിക നിഗമനത്തിലാണ് പൊലീസ്.

ചാമരാജ നഗർ ജില്ലയിൽ കൊല്ലെഗൽ താലൂക്കിലെ കളിയൂർ സ്വദേശിയായ ശിവപ്പ സ്വാമി നാല് പതിറ്റാണ്ടായി മഠം അന്തേവാസിയാണ്.