വിടവാങ്ങിയത്​ നോട്ടുനിരോധനത്തിനെതിരായ സമരത്തി​െൻറ പ്രതീകം; മാക്​സി ധരിക്കാൻ തുടങ്ങിയതിന്​ പിന്നിലും കാരണമുണ്ട്​

കടയ്ക്കൽ (കൊല്ലം): സമരതീക്ഷ്​ണമായിരുന്നു യഹിയയുടെ ജീവിതം. ശരീരം കൊണ്ട്​ ചെയ്​ത വലിയ സമരങ്ങൾക്ക്​ വിരാമമിട്ട്​ ഞായറാഴ്​ച പുലർച്ച അദ്ദേഹം വിടവാങ്ങി. പൊലീസ് ഇൻസ്പെക്ടറുടെ ധാർഷ്​ട്യത്തിൽ പ്രതിഷേധിച്ച് മാക്സി ധരിച്ചുതുടങ്ങിയ ആ ചായക്കടക്കാരൻ പിന്നീട് നോട്ടുനിരോധനത്തിനെതിരായ സമരത്തി​െൻറ പ്രതീകവുമായി മാറി. മാക്സി മാമ എന്ന പേരിലറിയപ്പെട്ടിരുന്ന യഹിയ മുക്കുന്നത്ത് പണ്ട് താൻ കാര്യസ്ഥനായിരുന്ന വീടി​െൻറ സിറ്റൗട്ടിലായിരുന്നു അടുത്തിടെ വരെ താമസം.

ഇവിടെ കിടന്ന് തന്നെ മരിക്കണം എന്ന മറ്റൊരു നിലപാടാണ് വീട്ടുകാർ വീട് തുറന്ന് നൽകിയിട്ടും അകത്തേക്ക് കയറാതെ സിറ്റൗട്ടിൽ തന്നെ കഴിയാൻ പ്രേരിപ്പിച്ചത്. ആരോ​ഗ്യം മോശമായതിനെ തുടർന്ന് അടുത്തിടെ മകളുടെ വീട്ടിലേക്ക് മാറ്റിയിരുന്നു. ഇവിടെ വെച്ചായിരുന്നു മരണം.

മാക്‌സിയായിരുന്നു യഹിയയുടെ വസ്ത്രം. മുണ്ടി​െൻറ മടക്കിക്കുത്ത് അഴിച്ച് ബഹുമാനിച്ചില്ല എന്നതി​െൻറ പേരിൽ ദുരഭിമാനിയായ ഇൻസ്‌പെക്​ടർ മുഖത്തടിച്ചതോടെയാണ് ഇനി ആരെയും മുണ്ടിെൻറ മടക്കിക്കുത്ത് അഴിച്ച് ബഹുമാനിക്കില്ലെന്ന തീരുമാനത്തിൽ മാക്‌സി ധരിക്കാൻ തുടങ്ങിയത്.

സ്ത്രീകളുടെ വസ്ത്രം ധരിച്ച് പുറത്തിറങ്ങിയ യഹിയയെ കണ്ട് പലരും മുഖം ചുളിച്ചു, പരിഹസിച്ചു. അടുപ്പക്കാർ ഗുണദോഷിച്ചു. എന്നിട്ടൊന്നും തീരുമാനത്തിൽ നിന്ന്​ മാറാൻ തയാറായിരുന്നില്ല. ഉപജീവനത്തിനായി തുടങ്ങിയ തട്ടുകട ജനങ്ങളെ ഊട്ടാനുള്ള ഇടമാക്കി മാറ്റിയാണ് യഹിയ എല്ലാവർക്കും പ്രിയങ്കരനായത്. വലിയ ഇളവുകളോടെയായിരുന്നു കച്ചവടം.

2016 നവംബർ എട്ടിന് പ്രധാനമന്ത്രി നോട്ട് നിരോധനം പ്രഖ്യാപിച്ചപ്പോൾ എതിർസ്വരങ്ങളുടെ ഏറ്റവും ശ്രദ്ധേയമായ ചിത്രങ്ങളിൽ ഒന്ന് യഹിയയു​േടതായിരുന്നു. താൻ പണമായി സൂക്ഷിച്ച 23,000 രൂപയുടെ നോട്ടുകൾക്ക്​ നേരമിരുട്ടി വെളുത്തപ്പോൾ മൂല്യമില്ലാതായിപ്പോയതിൽ പ്രതിഷേധിച്ച യഹിയ ജനശ്രദ്ധയിലേക്കുയർന്നു. നോട്ടുകൾ മാറ്റിവാങ്ങാൻ ബാങ്കിന് മുന്നിൽ രണ്ട് ദിവസം ക്യൂ നിന്നിട്ടും കഴിഞ്ഞില്ല.

ഒരു ദിവസം ക്യൂവിൽ നിൽക്കവെ ബോധംകെട്ട് വീണു. ആശുപത്രിയിൽ നിന്ന് തിരിച്ചെത്തിയതിന്​ പിന്നാലെ വിലയില്ലാതായ ആ നോട്ടുകൾ കത്തിച്ച് യഹിയ ചാരമാക്കി. പകുതി മീശ എടുത്തു. നരേന്ദ്ര മോദി രാജിവെക്കുന്നതുവരെ മീശ വളർത്തില്ലെന്ന് പറഞ്ഞു. പിറ്റേ വർഷം മുടിയുടെ പകുതിയും എടുത്തു.

മാധ്യമപ്രവർത്തകനായ സനു കുമ്മിൾ യഹിയയുടെ ജീവിതസമരം 'ഒരു ചായക്കടക്കാര​െൻറ മൻ കി ബാത്' എന്ന പേരിൽ ഡോക്യുമെൻററി ആക്കിയതോടെയാണ് അദ്ദേഹം ദേശീയ ശ്രദ്ധയിലേക്കെത്തുന്നത്. 2018ലെ ഐ.ഡി.എസ്.എഫ്.എഫ്‌.കെയിൽ മികച്ച ഹ്രസ്വ ഡോക്യുമെൻററിക്കുള്ള അവാർഡ് ഇതിനായിരുന്നു.