ഫാ. സ്റ്റാൻ സ്വാമി: ഭരണകൂടം ഇഞ്ചിഞ്ചായി കൊന്ന വയോധികൻ

നീതിയുടെ വാതിലുകൾക്കുമുന്നിൽ മുട്ടിത്തളർന്ന വന്ദ്യവയോധികനായ വൈദികൻ സ്​റ്റാൻ സ്വാമി ഒടുവിൽ യാത്രയായിരിക്കുന്നു. ജസ്യൂട്ട് ക്രിസ്​ത്യൻ സഭയിലെ പുരോഹിതനായ സ്വാമിക്ക്​ 84 വയസ്സായിരുന്നു. ഭീമ-കൊറെഗാവ് കേസിൽ 2020 ഒക്ടോബർ എട്ടിനാണ് തമിഴ്​നാട്ടുകാരനായ അദ്ദേഹത്തെ യു.എ.പി.എ ചുമത്തി ജയിലിലടച്ചത്​. ജയിലിൽ പരസഹായമില്ലാതെ പ്രാഥമിക കൃത്യങ്ങൾ നിർവഹിക്കാൻ കഴിയാത്ത സ്​ഥിതിയിലായിരുന്നു അദ്ദേഹം.

ജാ​മ്യ​മാ​ണ്​ വേ​ണ്ട​ത്​; അല്ലങ്കിൽ ജ​യി​ലി​ൽ കി​ട​ന്നു മ​രി​ക്കാം

വിവധ അസുഖങ്ങൾ മൂലം നരകിച്ച ഫാദർ ചികിത്സക്ക്​ ജാമ്യം തേടി നിരവധി തവണ കോടതി കയറി. ഇടക്കിടെ ജെ.ജെ. മെഡിക്കൽ കോളജിൽ പേരിന്​ കൊണ്ടുപോയതല്ലാതെ നല്ല ചികിത്സ നൽകാൻ കോടതി തയ്യാറായില്ല. ഒടുവിൽ, ജാ​മ്യ​മാ​ണ്​ വേ​ണ്ട​തെ​ന്നും അ​ല്ലെ​ങ്കി​ൽ ജ​യി​ലി​ൽ കി​ട​ന്നു മ​രി​ക്കാ​മെ​ന്നും ആ​രോ​ഗ്യ​ശേ​ഷി ന​ശി​ച്ച്​ മ​ര​ണം അ​ടു​ത്തു​വ​രി​ക​യാ​ണെ​ന്നും സ്​​റ്റാ​ൻ സ്വാ​മി മേയ്​ അവസാന ആഴ്ച ​ബോംബെ ഹൈകോ​ട​തി​യിൽ തീർത്തുപറഞ്ഞു.

ഇതേതുടർന്നാണ്​, സാമിയുടെ അഭിഭാഷകൻ ആവശ്യപ്പെട്ട ബാന്ദ്ര ഹോളിഫാമിലി ആശുപത്രിയിലേക്ക്​ അദ്ദേഹത്തെ മാറ്റാൻ മേയ്​ 28ന്​ കോടതി അനുമതി നൽകിയത്​. അവിടെ വെച്ച്​ അദ്ദേഹത്തിന് കോവിഡ്​ സ്​ഥിരീകരിച്ചു. ​ ഉറ്റവരെ പോലും തിരിച്ചറിയാനാവാതെ ഓക്സിജൻ സഹായത്തോടെയാണ്​ ഫാദർ കഴിഞ്ഞിരുന്നത്​. കഴിഞ്ഞ ദിവസം സ്​ഥിതി കൂടുതൽ വഷളായതോടെ വെന്‍റിലേറ്റർ സഹായം ഏർപ്പാടാക്കിയിരുന്നു.

ഒരു സ്​ട്രോ കൊടുക്കാത്ത നീതിപീഠം!

അറസ്റ്റിലാകു​േമ്പാൾ തന്നെ ആരോഗ്യപ്രശ്നങ്ങൾ ഏറെയുണ്ടായിരുന്നു പാർകിൻസൺസ്​ രോഗിയായ ആ മനുഷ്യന്​. ഇരുചെവികളുടെയും കേൾവിശക്തിക്ക് കാര്യമായ തകരാർ, സന്ധി വേദന, വാർധക്യസഹജമായ മറ്റു പ്രയാസങ്ങളും. ഇതിനുപുറമേ തടവറയിൽവെച്ച്​ കോവിഡും ബാധിച്ചു. കൈവിറയൽ ഉള്ളത് കാരണം വെള്ളം കുടിക്കാനുള്ള ഗ്ലാസ്​ പിടിക്കാൻ കഴിയില്ലായിരുന്നു. വെള്ളം കുടിക്കാൻ സ്​േട്രായും സിപ്പർ കപ്പും വേണമെന്ന്​ അദ്ദേഹം നിരവധി തവണ ജയിലധികൃതരോട്​ ആവശ്യപ്പെട്ടു. എന്നാൽ, അവർ കനിഞ്ഞില്ല.

ഒടുവിൽ, ഇക്കാര്യമുന്നയിച്ച്​ നവംബർ ആറിന് അദ്ദേഹം കോടതിക്ക് അപേക്ഷ നൽകി. ഒക്ടോബർ എട്ടിന്​ തന്നെ അറസ്​റ്റ്​ ചെയ്യുമ്പോൾ ബാഗിൽ ഇവ രണ്ടുമുണ്ടായിരുന്നെന്നും അതുതന്നെ നൽകിയാൽ മതിയെന്നുമായിരുന്നു അദ്ദേഹം പറഞ്ഞത്​. അപേക്ഷ പരിഗണിച്ച കോടതി വിഷയത്തിൽ മറുപടി നൽകാൻ എൻ.ഐ.എക്ക് നൽകിയത്​ 20 ദിവസത്തെ സമയം. എന്നാൽ, 20ദിവസത്തിന്​ ശേഷം എൻ.ഐ.എ നൽകിയ മറുപടിയായിരുന്നു ഏറെ മഹത്തരം; തങ്ങൾ പിടിച്ചെടുത്ത വസ്​തുക്കളിൽ സ്​േട്രായും സിപ്പർ കപ്പും ഇല്ല എന്നായിരുന്നു അത്​!. പിന്നെയും ദിവസങ്ങൾ പിന്നിട്ടാണ്​ സ്​ട്രോ അനുവദിക്കാൻ തീരുമാനമായത്​. പ്രായാധിക്യവും രോഗവും തളർത്തിയ, സാമൂഹികപ്രവർത്തകനായ ഒരുമനുഷ്യനോടാണ്​ ഭരണകൂടവും നീതിന്യായ വ്യവസ്​ഥയും ഇവ്വിധം പെരുമാറിയത്​.

ഭീമ-കൊറെഗാവും സ്വാമിയുടെ അറസ്റ്റും

ഝാർഖണ്ഡിലെ അവികസിതമായ ആദിവാസി മേഖലകളാണ്​ സാമൂഹികപ്രവർത്തകനായ സ്വാമി പ്രവർത്തന മണ്ഡലമായി തെരഞ്ഞെടുത്തത്​. ആദിവാസി -ദലിത്​ പ്രശ്​നങ്ങളിൽ സജീവ സാന്നിധ്യമായിരുന്നു അദ്ദേഹം. ഇതിനിടെയാണ്​ പ്രമാദമായ ഭീമ-കൊറെഗാവ് കേസ്​ അന്വേഷിക്കുന്ന എൻ.ഐ.എ സംഘം​ അദ്ദേഹത്തെ കള്ളക്കേസിൽ യു.എ.പി.എ ചുമത്തി അറസ്​റ്റ്​ ചെയ്യുന്നത്.

മഹാരാഷ്​ട്രയിലെ പുണെക്കടുത്ത ഭീമ-കൊറെഗാവ് ഗ്രാമത്തിൽ 2018 ജനുവരി ഒന്നിന് കൊറെഗാവ് യുദ്ധത്തിെൻറ ഇരുനൂറാം വാർഷികം ആചരിക്കാൻ ദലിത് സംഘടനകൾ വലിയ സമ്മേളനം സംഘടിപ്പിച്ചിരുന്നു. ഈ സമ്മേളനത്തിനു നേരെ സവർണജാതി വിഭാഗങ്ങൾ ആക്രമണം അഴിച്ചുവിടുകയും സംഘർഷം രൂപപ്പെടുകയും ചെയ്തു. ഇതാണ് ഭീമ-കൊറെഗാവ് കേസിെൻറ ആധാരം. ദലിത് സമ്മേളനത്തിനു നേരെ സവർണർ ആക്രമണം നടത്തുകയായിരുന്നെങ്കിലും അവരാരും കേസിൽ പ്രതിചേർക്കപ്പെട്ടില്ല.

രാജ്യത്തിെൻറ വിവിധ ഭാഗങ്ങളിലുള്ള ആക്​ടിവിസ്​റ്റുകൾ, മനുഷ്യാവകാശപ്രവർത്തകർ, എഴുത്തുകാർ, അക്കാദമീഷ്യന്മാർ എന്നിവരെ കേസിൽ പ്രതിചേർക്കുകയും യു.എ.പി.എ ചേർത്ത് അറസ്​റ്റ്​ ചെയ്യുകയുമായിരുന്നു. പ്രഗല്​ഭ പത്രപ്രവർത്തകനായ ഗൗതം നവലാഖ, തെലുഗ്​ കവി വരവരറാവു, മനുഷ്യാവകാശ പ്രവർത്തകനായ അരുൺ ഫെറീറ, അഭിഭാഷകയും േട്രഡ് യൂനിയൻ സംഘാടകയുമായ സുധാ ഭരദ്വാജ്, അറിയപ്പെട്ട അക്കാദമീഷ്യന്മാരായ ആനന്ദ് തെൽതുംബ്ഡെ, ഷോമ സെൻ, മലയാളികളായ റോണ വിൽസൺ, ഡൽഹി യൂനിവേഴ്സിറ്റി പ്രഫസർ ഹാനി ബാബു എന്നിവർ സ്​റ്റാൻ സ്വാമിയെ കൂടാതെ ഈ കേസിൽ പ്രതിചേർക്കപ്പെട്ട് വിചാരണത്തടവുകാരായി മുംബൈയിലെ തലോജ ജയിലിൽ കഴിയുകയാണ്.

ഇതേ കേസിൽ അറസ്​റ്റ്​ ചെയ്യപ്പെട്ട വരവരറാവു മരണവുമായി മല്ലിട്ടുകൊണ്ടിരിക്കുകയാണ്​. കോവിഡ് പോസിറ്റിവ് ആയിട്ടുപോലും അദ്ദേഹത്തിനും ജാമ്യം നൽകിയിട്ടില്ല. ബന്ധുക്കളെ കാണാനുള്ള അവസരങ്ങൾ പോലും നിഷേധിക്കപ്പെട്ടു.

ഇന്ന്​ ജയിലിലേക്ക്​ മടങ്ങേണ്ടതായിരുന്നു

ബാന്ദ്ര ഹോളി ഫാമിലി ആശുപത്രിയിൽ തീവ്രപരിചരണ വിഭാഗത്തിൽ കഴിഞ്ഞിരുന്ന സ്വമി ഇന്ന്​ ജയി​ലിലേക്ക്​ മടങ്ങേണ്ടതായിരുന്നു. കോടതി ഉത്തരവ് പ്രകാരം മേയ് 28 നാണ് തലോജ ജയിലിൽ നിന്ന് ആശുപത്രിയിലേക്ക്​ മാറ്റിയത്​. ജൂലൈ അഞ്ച്​ -ഇന്ന്​- വരെയിരുന്നു ചികിത്സ അനുവദിച്ചത്​. എന്നാൽ, ശനിയാഴ്ച പരിഗണിക്കേണ്ടിയിരുന്ന അദ്ദേഹത്തിന്‍റെ ജാമ്യാപേക്ഷ​ സമയക്കുറവ്​ കാരണം കോടതി ചൊവ്വാഴ്ചത്തേക്ക് മാറ്റിവെച്ചു. ഈ സാഹചര്യത്തിൽ നാ​െള (ജൂലൈ ആറു) വ​െ​ര ആ​ശുപത്രിയിൽ തുടരാൻ ജസ്റ്റിസുമാരായ എസ്.എസ് ഷിൻഡെ, എൻ.ജെ. ജമാദാർ എന്നിവരടങ്ങിയ ബെഞ്ച്​ അനുമതി നൽകുകയായിരുന്നു. എന്നാൽ, നീതിപീഠത്തിന്‍റെയും ഭരണകൂടത്തിന്‍റെയും ദയക്ക്​ കാത്തുനിൽക്കാതെ, തടവറയ്​ക്ക്​ പുറത്തുവെച്ച്​ തന്നെ വന്ദ്യവയോധികനായ ആ മനുഷ്യസ്​നേഹി അവസാന ശ്വാസംവലിച്ചു.