തമിഴ്‌ യുവാവിന് പൊലീസ് മർദനമെന്ന് പരാതി

കോട്ടയം: തമിഴ്‌നാട് സ്വദേശിയായ യുവാവിന് പൊലീസി​െൻറ ക്രൂരമര്‍ദനമെന്ന് പരാതി. ചുങ്കം കവലക്ക് സമീപം പച്ചക്കറി വ്യാപാരം നടത്തുന്ന ശേഖറാണ്​ (32) സംഭവത്തെതുടർന്ന് അവശനിലയിൽ കഴിയുന്നത്.

കഴിഞ്ഞ ഞായറാഴ്ചയാണ് സംഭവം. റെയില്‍വേ സ്​റ്റേഷനില്‍നിന്ന്​ ചുങ്കത്തിന് സി.എം.എസ്​ കോള​ജിന് സമീപത്തുകൂടി നടന്നുവരുകയായിരുന്ന ശേഖറും വഴിയിൽനിന്ന സി.എം.എസ്​ കോള​ജ്​ വിദ്യാര്‍ഥികളുമായി വാക്കേറ്റമുണ്ടായി.

ഈ സമയം പൊലീസ് സ്ഥലത്തെത്തി ശേഖറിനെ ജീപ്പില്‍ സ്​റ്റേഷനിലേക്ക് കൊണ്ടുപോയി. സ്​റ്റേഷനിൽ പരാതിക്കാരായ വിദ്യാര്‍ഥികളുടെ മുമ്പിലിട്ട് മർദിച്ചതായാണ് ശേഖര്‍ പറയുന്നത്. പരിചയക്കാരനായ ചുങ്കം സ്വദേശി എത്തിയാണ് ജാമ്യത്തില്‍ ഇറക്കിയത്. നടക്കാനോ മൂത്രമൊഴിക്കാനോ കഴിയാത്ത നിലയിലായിരുന്നു. ജില്ല ആശുപത്രിയില്‍ എത്തിച്ച ശേഖറിനെ ഡോക്ടര്‍മാരുടെ നിർദേശത്തെതുടര്‍ന്ന് മെഡിക്കല്‍ കോള​ജിലേക്ക് മാറ്റി.

മര്‍ദനത്തില്‍ നട്ടെല്ലിന് ക്ഷതം സംഭവിച്ചതായി ആശുപത്രി അധികൃതര്‍ അറിയിച്ചു. കോവിഡ് വ്യാപന സാഹചര്യത്തിൽ ആശുപത്രിയിൽനിന്ന്​ ഡിസ്ചാർജ് ചെയ്യപ്പെട്ട ശേഖര്‍ വീട്ടില്‍ എഴുന്നേല്‍ക്കാന്‍പോലും കഴിയാതെ കിടപ്പിലാണ്.

വര്‍ഷങ്ങളായി കോട്ടയത്ത് താമസിക്കുന്ന ശേഖറിന് മുമ്പ്​ ഏറ്റുമാനൂരില്‍ കാറിടിച്ച് ഗുരുതര പരിക്കേറ്റിരുന്നു. മാസങ്ങളോളം നടത്തിയ ചികിത്സക്ക് ശേഷമാണ് എഴുന്നേറ്റ് നടക്കാന്‍ തുടങ്ങിയത്. അപകടശേഷം ഓര്‍മക്കുറവുണ്ടെന്ന് നാട്ടുകാരും പറയുന്നു.