ഭാര്യയെയും ആറുവയസുള്ള മകനെയും വെട്ടി; ഇതരസംസ്ഥാന തൊഴിലാളി അറസ്റ്റിൽ

പോത്തൻകോട്: കുടുംബ വഴക്കിനെ തുടർന്ന് അന്യസംസ്ഥാന തൊഴിലാളി ഭാര്യയേയും മകനെയും വെട്ടി. തേങ്ങവെട്ടുന്ന വെട്ടുകത്തികൊണ്ടുള്ള ആക്രമണത്തിൽ കൈയറ്റു തൂങ്ങുകയും തലയ്ക്ക് സാരമായി പരിക്കേൽക്കുകയും ചെയ്ത ഭാര്യ സീതാഭായി (26), ഗുരുതര പരിക്കേറ്റ മകൻ അരുൺ സിങ്​ (6) എന്നിവരെ നാട്ടുകാരുടെ സഹായത്തോടെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

സംഭവത്തിൽ ഭർത്താവും തെങ്ങുകയറ്റ തൊഴിലാളിയുമായ ഛത്തീസ്ഗഡ് സ്വദേശി കുശാൽ സിങ്​ മറാബി (31)നെ പോത്തൻകോട് പൊലീസ് അറസ്റ്റുചെയ്തു. ശാന്തിഗിരി ആശ്രമത്തിന് സമീപം പൂലന്തറയിലെ വാടക വീട്ടിൽ ഇന്നലെ രാവിലെ എട്ടുമണിയോടെയായിരുന്നു സംഭവം. കുടുംബ വഴക്കിനെ തുടർന്ന് ഭാര്യയേയും മകനെയും ഗുരുതരമായി മർദിച്ച ശേഷമാണ് വെട്ടിപ്പരിക്കേൽപ്പിച്ചത്. ഇരുവർക്കും തലക്ക്​ വെട്ടേറ്റിണ്ട്.

ഛത്തീസ്ഗഡ്‌ ബിലാസ്പൂർ ജില്ലയിൽ ബൻജോർക ഖോടരി സ്വദേശികളായ കുടുംബം ഏതാനും ദിവസംമുമ്പാണ് പൂലന്തറയിൽ വീട് വാടകയ്ക്ക് എടുത്ത് താമസം തുടങ്ങിയത്. അറസ്റ്റുചെയ്ത പ്രതിയെ ആറ്റിങ്ങൽ കോടതിയിൽ ഹാജരാക്കി റിമാൻഡ്​ ചെയ്തു.