സ്​കാൻ ചെയ്യാൻ കൊണ്ടുപോയ രോഗിയെ കൊന്ന്​ ആശുപത്രി ജീവനക്കാരി​ പണവും മൊബൈലും കവർന്നു

ചെന്നൈ: ആശുപത്രിയിൽ അഡ്​മിറ്റായ രോഗിയെ അർധരാത്രി സ്​കാൻ ചെയ്യാൻ എന്ന വ്യാജേന വിളിച്ചുകൊണ്ടുപോയി കൊലപ്പെടുത്തി ആശുപത്രി ജീവനക്കാരി​ പണവും മൊബൈൽ ഫോണും കവർന്നു. ചെന്നൈയിലാണ്​ ഞെട്ടിപ്പിക്കുന്ന ഈ സംഭവം. ആശുപത്രിയിൽ ചികിത്സയിലിരിക്കെ മേയ് 23 ന് കാണാതായ സുമിത(41) എന്ന രോഗി​യെകുറിച്ചുള്ള അന്വേഷണത്തിലാണ്​ കൊലപാതകവിവരം പുറത്തുവന്നത്​.

ചെന്നൈയിലെ രാജീവ് ഗാന്ധി സർക്കാർ ആശുപത്രിയിൽ ചികിത്സയിലായിരുന്നു സുമിത. മേയ് 23 മുതൽ ഇവരെ കാണാനില്ലെന്ന്​ ഭർത്താവ്​ മൗലി മെയ് 31ന് പൊലീസിൽ പരാതി നൽകി. വ്യാപക തിരച്ചിൽ നടത്തിയിട്ടും കണ്ടെത്താൻ കഴിഞ്ഞില്ലെന്ന് ഭർത്താവ് പറഞ്ഞു. ഇതിനിടെ ജൂൺ എട്ടിന് ആശുപത്രിയിലെ എട്ടാം നിലയിൽ ജീവനക്കാർ അഴുകിയ മൃതദേഹം കണ്ടെത്തി. മോർച്ചറിയിലേക്ക് മാറ്റിയ മൃതദേഹം കാണാതായ സ്ത്രീയുടെതാണെന്ന് ആശുപത്രി അധികൃതർക്ക്​ സംശയം തോന്നി. തുടർന്ന്​ ഭർത്താവ് മൗലി എത്തി മൃതദേഹവും വസ്ത്രങ്ങളും ബാഗും പരിശോധിച്ച്​ സുമിതയുടെതാണെന്ന്​ സ്ഥിരീകരിച്ചു.

ആശുപത്രിയിലെ സിസിടിവി ദൃശ്യങ്ങൾ പരിശോധിച്ചപ്പോഴാണ്​ കൊലപാതകത്തിന്‍റെ ചുരുളഴിഞ്ഞത്​. സുമിതയുടെ കൈവശം പണമുള്ളത്​ ശ്രദ്ധയിൽപെട്ട രാധിദേവിയെന്ന ജീവനക്കാരിയാണ്​ കൊലക്കുപിന്നിലെന്നാണ്​ പൊലീസ്​ ക​ണ്ടെത്തൽ. ഇവരെ പൊലീസ് പിടികൂടി​ ചോദ്യംചെയ്​തു. മൂന്ന് വർഷത്തോളമായി ഇന്ദിരാഗാന്ധി ആശുപത്രിയിൽ കരാർ തൊഴിലാളിയാണ് ​രാധിദേവി. പണത്തിന്​ അത്യാവശ്യം നേരിട്ട ഇവർ, കൂട്ടിരിപ്പുകാരൊന്നുമില്ലാത്ത ദുർബലയായ സുമിതയെ കൊള്ളയടിക്കാൻ പദ്ധതിയിടുകയായിരുന്നുവത്രെ.

മെയ് 22ന്​ രാത്രി 12.30 ഓടെ രാധിദേവി സുമിതയുടെ അരികിൽപോയി സ്കാനിങ്ങിനായി കൂടെവരാൻ പറഞ്ഞു. സുമിതയെ വാർഡിൽ നിന്ന് വീൽചെയറിൽ ലിഫ്റ്റിനരികിൽ കൊണ്ടുപോയി. അവിടെവെച്ചാണ് മൊബൈൽ ഫോണും പണവും കവർന്നത്. തുടർന്ന്​ എട്ടാം നിലയിലേക്ക് കൊണ്ടുപോയി കയർ ഉപയോഗിച്ച്​ കഴുത്ത് ഞെരിച്ച് കൊലപ്പെടുത്ത​ുകയായിരുന്നുവത്രെ. ജൂൺ 8ന് എട്ടാം നിലയിലെ എമർജൻസി ബോക്സ് മുറിക്ക് സമീപമാണ് സുമിതയുടെ ചീഞ്ഞളിഞ്ഞ മൃതദേഹം കണ്ടെത്തിയത്​.