നിർത്തിയിട്ട കാറിൽ യുവാവിന്റെ മൃതദേഹം; മരണത്തിൽ ദുരൂഹതയാരോപിച്ച് ബന്ധുക്കൾ

ഇടുക്കി: ഏലപ്പാറ ടൗണിന് സമീപം നിർത്തിയിട്ട കാറിൽ യുവാവിന്റെ മൃതദേഹം കണ്ടെത്തി. ഏലപ്പാറ തണ്ണിക്കാനം പുത്തൻ പുരക്കൽ ഷക്കീർ ഹുസൈനാണ് മരിച്ചത്. ഏലപ്പാറയിൽ മത്സ്യക്കച്ചവടം നടത്തുകയായിരുന്നു ഷക്കീർ ഹുസൈൻ. ഇയാളെ കാണാതായതിനെ തുടർന്ന് ബന്ധുക്കൾ അന്വേഷണം നടത്തിയിരുന്നു. അതിനിടയിലാണ് കാറ് കണ്ടെത്തിയത്. കാറിന്റെ പിൻ സീറ്റിലായിരുന്നു മൃതദേഹം. കാറിന്റെ പിൻസീറ്റിലെ ഡോർ തുറന്ന നിലയിലായിരുന്നു. കാറിനുള്ളിൽ രക്തക്കറയും കണ്ടെത്തി.

ഞായറാഴ്ച പുലർച്ചെയാണ് ഏലപ്പാറ ടൗണിന് സമീപം വാഗമൺ റോഡിൽ ബിവറേജസ് ഔട്‍ലറ്റിന് സമീപമുള്ള റോഡിൽ നിർത്തിയിട്ട കാറിൽ മൃതദേഹം കണ്ടെത്തിയത്. വിവരം ലഭിച്ചതനുസരിച്ച് പീരുമേട് പൊലീസ് സ്ഥലത്തെത്തി തുടർനടപടികൾ സ്വീകരിച്ചു.

മരണത്തിൽ ദുരൂഹതയാരോപിച്ച് യുവാവിന്റെ ബന്ധുക്കൾ രംഗത്തുവന്നിട്ടുണ്ട്. പരാതിയിൽ പീരുമേട് പൊലീസ് അന്വേഷണം തുടങ്ങി. പോസ്റ്റ്മോർട്ടത്തിനായി മൃതദേഹം ആശുപത്രിയിലേക്ക് മാറ്റി.