കൊക്കയിലേക്ക് ലോറി മറിഞ്ഞ്​ രണ്ട്​ പേർ മരിച്ചു; അപകടം രാത്രി

അടിമാലി: വാളറ വെള്ളച്ചാട്ടത്തിനുസമീപം ടോറസ് കൊക്കയിലേക്ക് മറിഞ്ഞ്​ രണ്ട്​ പേർ മരിച്ചു. നേര്യമംഗലം തലക്കോട്​ സ്വദേശികളായ ഷിജു, സന്തോഷ്​ എന്നിവരാണ്​ മരിച്ചത്​. ഷിജുവിന്‍റെ ഉടമസ്ഥതയിലുള്ള ലോറിയാണ്​ അപകടത്തിൽപ്പെട്ടത്​.

കൊച്ചി - ധനുഷ്​കോടി ദേശീയപാതയിൽ വാളറക്കുത്തിനും ചീയപ്പാറക്കും ഇടയിലാണ് ഇന്നലെ രാത്രി ലോറി നിയന്ത്രണം വിട്ട് കൊക്കയിലേക്ക് പതിച്ചത്. അടിമാലിയിൽനിന്ന്​ കോതമംഗലത്തേക്ക് വന്ന ലോറി 350 അടി താഴ്ചയിൽ കൊക്കയിലേക്ക് പതിക്കുകയായിരുന്നു. നിരവധി തവണ മറിഞ്ഞശേഷം വാഹനം ദേവിയാർ പുഴയുടെ കരയിൽ മരത്തിൽ തങ്ങിക്കിടക്കുകയായിരുന്നു.

വാഹനത്തി‍ന്‍റെ കാബിൻ വേർപെട്ട നിലയിലായിരുന്നു​. അഗ്​നിരക്ഷാസേനയും ഹൈവേ പൊലീസും നാട്ടുകാരും വനപാലകരും ചേർന്നാണ്​ രക്ഷാപ്രവർത്തനങ്ങൾ നടത്തിയത്​. വനമേഖലയായതിനാലും റോഡിൽനിന്ന്​ വളരെ അകലെയായതിനാലും രക്ഷാപ്രവർത്തനം വിഷമകരമായിരുന്നു.