ട്രക്കുകൾക്കിടയിൽ കാർ ​ഞെരിഞ്ഞമർന്നു; മൂന്നുപേർക്ക്​ ദാരുണാന്ത്യം -VIDEO

മുംബൈ: മഹാരാഷ്ട്രയിലെ മുംബൈ-പൂനെ എക്സ്പ്രസ് ഹൈവേയിൽ നിയന്ത്രണം നഷ്ടപ്പെട്ട കണ്ടെയ്നർ ട്രക്ക്​ കാറിലിടിച്ച്​ കുടുംബത്തിലെ മൂന്നു​പേർക്ക്​ ദാരുണാന്ത്യം. രണ്ട്​ ട്രക്കുകൾക്കിടയിൽപെട്ട കാർ ​ഞെരിഞ്ഞമർന്ന്​ തവിടു​പൊടിയായി.

ഹ്യുണ്ടായ് ഐ 10 കാറിൽ സഞ്ചരിച്ച നാല് വയസുള്ള ആൺകുട്ടി ഉൾപ്പെടെ കുടുംബത്തിലെ മൂന്നുപേരാണ്​ മരിച്ചത്​. അപകടത്തിന്‍റെ ഞെട്ടിക്കുന്ന ദൃശ്യങ്ങൾ കാറിന്‍റെ മുന്നിലുണ്ടായിരുന്ന മറ്റൊരു ട്രക്കിലെ കാമറയിൽ പതിഞ്ഞു. നിയന്ത്രണംവിട്ട്​ അമിതവേഗതയിലെത്തിയ ട്രക്ക്​ ആദ്യം കാറിൽ ഇടിക്കുകയും കാർ മറ്റൊരു ട്രക്കിലിടിക്കുകയുമായിരുന്നു. പിന്നീട്​ അൽപംകൂടി മുന്നോട്ട്​ നീങ്ങിയ ട്രക്ക്​ റോഡിന്​ കുറുകെ മറിഞ്ഞു. അപകടത്തെ തുടർന്ന് കാറിന് തീപിടിച്ചു. കാറിൽ ഉണ്ടായിരുന്നവർ സംഭവസ്​ഥലത്ത് ​വെച്ചു തന്നെ മരിച്ചു.

#Mumbai Truck Runs Over Car On Mumbai-Pune Expressway, 3 Members of a Family Dead pic.twitter.com/ffxG12pKvR

— India.com (@indiacom) July 3, 2021

ഗുരുതര പരുക്കേറ്റ ട്രക്ക്​ ഡ്രൈവറെ ഹൈവേ പൊലീസിന്‍റെ പട്രോളിങ്​ സംഘം സ്ഥലത്തെത്തിയാണ്​ രക്ഷപ്പെടുത്തിയത്​. ഇയാളെ ആശുപത്രിയിൽ പ്രവേശിപ്പിച്ചു. ഇന്ത്യയിൽ കഴിഞ്ഞ ഒരു വർഷത്തിനിടെ 1.5 ലക്ഷത്തോളം പേരാണ്​ റോഡപകടത്തിൽ മരിച്ചത്​.