ടിപ്പറിന് പിന്നിൽ സ്കൂട്ടറിടിച്ച് വിദ്യാർഥി മരിച്ചു

കരുനാഗപ്പള്ളി: കോട്ടയത്ത് മണർകാടുണ്ടായ വാഹനാപകടത്തിൽ കരുനാഗപ്പള്ളി സ്വദേശിയായ വിദ്യാർഥി മരിച്ചു. പുതുപ്പള്ളി തലപ്പാടി എസ്.എം.ഇ കോളജിലെ രണ്ടാം വർഷ ബി.എസ്.സി നഴ്സിങ് വിദ്യാർഥി കൊല്ലം കരുനാഗപ്പള്ളി സ്വദേശി തൊടിയൂർ വടക്കേതിൽ ചെമ്പകശ്ശേരിയിൽ എൻ. മുഹമ്മദ് അൽത്താഫ് (19 ) ആണ് മരിച്ചത്. അൽതാഫ് സഞ്ചരിച്ച സ്‌കൂട്ടർ ടിപ്പറിന് പിന്നിൽ ഇടിക്കുകയായിരുന്നു.

മണർകാട് ഐരാറ്റുനട പാലത്തിന് സമീപം ബുധനാഴ്ച വൈകുന്നേരം ആറ് മണിക്കാണ് അപകടം. ടിപ്പറും സ്കൂട്ടറും കോട്ടയം ദിശയിൽ പോകുകയായിരുന്നു. ഓടിക്കൂടിയ യാത്രക്കാർ ചേർന്ന് ഉടൻതന്നെ സമീപമുള്ള കളത്തിൽപ്പടിയിലെ സ്വകാര്യ ആശുപത്രിയിൽ എത്തിച്ചുവെങ്കിലും വഴിമധ്യേ മരിച്ചു. മണർകാട് പൊലീസ് സ്ഥലത്തെത്തി തുടർനടപടികൾ സ്വീകരിച്ചു.