സ്കൂട്ടറിൽ കാറിടിച്ച് അധ്യാപികയ്ക്ക് ദാരുണാന്ത്യം

ആലപ്പുഴ: നിയന്ത്രണം വിട്ട കാർ ഇരുചക്രവാഹനങ്ങളിലേക്ക് പാഞ്ഞുകയറിയുണ്ടായ അപകടത്തിൽ​​ സ്കൂട്ടർ യാത്രക്കാരിയായ അധ്യാപിക തൽക്ഷണം മരിച്ചു. തുമ്പോളി മാതാ സീനിയർ ഹയർ സെക്കൻഡറി സ്കൂൾ ഫിസിക്സ്​ അധ്യാപികയും ആലപ്പുഴ സനാതനപുരം കാർത്തികഭവൻ (ഹൗസ്​ നമ്പർ 113) അനിൽകുമാറിന്‍റെ ഭാര്യയുമായ മാലാ ശശിയാണ്​ (45) മരിച്ചത്​. അപകടത്തിൽ ബൈക്ക്​ യാത്രികരായ ദമ്പതികൾക്കും​ പരിക്കേറ്റു.

കൈനകരി പുത്തൻവിളയിൽ പഴയ കരിച്ചിറ ബിനു (42), ഭാര്യ ദീപ്തി (40) എന്നിവർക്കാണ്​ പരിക്കേറ്റത്​. അപകടത്തിൽ ദീപ്തിയുടെ കാലൊടിഞ്ഞതിനൊപ്പം ബിനുവിനും പരിക്കേറ്റു. ചേർത്തലയിൽനിന്ന്​ കൈനകരിയിലെ വീട്ടിലേക്ക്​ ഇവർ ബൈക്കിൽ പോകു​മ്പോഴായിരുന്നു അപകടം. ഇവരെ വണ്ടാനം മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു.

തിങ്കളാഴ്​ച വൈകീട്ട്​ 3.35ന്​ ആലപ്പുഴ ബൈപാസ്​ കളർകോട്​ കുതിരപ്പന്തി ഭാഗത്തായിരുന്നു അപകടം. ആലപ്പുഴയിൽനിന്ന്​ എറണാകുളം ഭാഗത്തേക്ക്​ പോയ മഹാരാഷ്ട്ര രജിസ്​ട്രേഷനിലുള്ള വാഗൺആർ കാറാണ്​ അപകടമുണ്ടാക്കിയത്​. അമിതവേഗത്തിൽ ബൈപാസിലൂടെ സഞ്ചരിച്ച കാർ ആദ്യം ദമ്പതികൾ സഞ്ചരിച്ച ബൈക്കിലാണ്​ ഇടിച്ചത്​. പിന്നാലെ, പാതയോരത്ത്​ സുരക്ഷക്ക്​ സ്ഥാപിച്ച കോൺക്രീറ്റ്​ തൂണിൽ ഇടിച്ച് നിയന്ത്രണംവിട്ട്​ മാലാ ശശി സഞ്ചരിച്ച സ്കൂട്ടറിൽ വന്നിടിക്കുകയായിരുന്നു. ഗുരുതര പരിക്കേറ്റ ഇവർ തൽക്ഷണം മരിച്ചെന്ന്​ നാട്ടുകാർ പറഞ്ഞു.

ഗുരുവായൂർ സ്വദേശികളായ ദമ്പതികൾ സഞ്ചരിച്ച കാർ ഓടിച്ചിരുന്നത്​ ഗുരുവായൂർ സ്വദേശി വാസുക്കുട്ടനാണെന്ന്​ പൊലീസ്​ പറഞ്ഞു. ഇയാൾക്കെ​തിരെ സൗത്ത്​ പൊലീസ്​ കേസെടുത്തു. സംഭവത്തിന്​ പിന്നാ​ലെ അഗ്​നിരക്ഷാസേനയും പൊലീസും സ്ഥലത്തെത്തിയാണ്​ ഗതാഗതം പുനഃസ്ഥാപിച്ചത്​. മാലാ ശശിയുടെ ഭർത്താവ്​ അനിൽകുമാറിന് ഷാർജയിലാണ്​ ജോലി. മക്കൾ: അശ്വിൻകുമാർ (എൻജീനിയർ), അനീഷ്​കുമാർ (മെഡിക്കൽ വിദ്യാർഥി, കൊല്ലം). മൃതദേഹം വണ്ടാനം മെഡിക്കൽ കോളജ്​ മോർച്ചറിയിൽ.