കൊയിലാണ്ടിയിൽ നിർത്തിയിട്ട കാറിന് പിന്നിൽ ലോറിയിടിച്ച് രണ്ടരവയസ്സുകാരൻ മരിച്ചു

കൊയിലാണ്ടി: പാലക്കുളത്ത് റോഡരികിൽ നിർത്തിയിട്ട കാറിന് പിന്നിൽ ലോറിയിടിച്ച് രണ്ടരവയസ്സുകാരൻ മരിച്ചു. വടകര ചോറോട് സ്വദേശിയായ മുഹമ്മദ് റഹീസ് ആണ് മരിച്ചത്. അപകടത്തില്‍ ആറ് പേര്‍ക്ക് പരുക്കേറ്റിട്ടുണ്ട്. ഇവരെയെല്ലാം കോഴിക്കോട് മെഡിക്കല്‍ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്. ഏതാനും പേരുടെ നില ഗുരുതരമാണ്.

ഇന്ന് ഉച്ച 12ഓടെയാണ് അപകടം. ടയർ പങ്ചറായതിനാൽ റോഡരികിൽ നിർത്തിയിട്ടതായിരുന്നു കാർ. കാറിലുണ്ടായിരുന്നവർ പുറത്തിറങ്ങി കാറിനരികെ തന്നെ നിൽക്കുകയായിരുന്നു. ഇവരുടെ നേരെയാണ് നിയന്ത്രണംവിട്ടെത്തിയ ലോറി ഇടിച്ചത്. കാറിലിടിക്കും മുമ്പ് ഒരു പിക്കപ്പ് വാഹനത്തിലും ലോറി ഇടിച്ചു. അപകടത്തിന്‍റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.