പിക്കപ്പ് ലോറിയും ട്രെയിലറും കൂട്ടിയിടിച്ച് പരിക്കേറ്റ യുവാവ് മരിച്ചു

പയ്യോളി: കോഴിക്കോട് പിക്കപ്പ് ലോറിയും ട്രെയിലറും കൂട്ടിയിടിച്ചുണ്ടായ അപകടത്തിൽ പയ്യോളി സ്വദേശി മരിച്ചു. പയ്യോളി ഏരിപറമ്പിൽ ഇസ്മായിലിൻ്റെ മകൻ ഹാഷി (25)മാണ് മരിച്ചത്. ബുധനാഴ്ച രാവിലെ ആറോടെ പുതിയങ്ങാടി അത്താണിക്കലിന് സമീപമായിരുന്നു അപകടം.

ഹാഷിം ഓടിച്ചിരുന്ന പിക്കപ്പ് ലോറി എതിരെ വന്ന ട്രെയിലറുമായി കൂട്ടിയിടിക്കുകയായിരുന്നു. ഹാഷിം മാത്രമാണ് വാഹനത്തിലുണ്ടായിരുന്നത്. പരിക്കേറ്റ ഹാഷിമിനെ ഉടൻ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും ബുധനാഴ്ച വൈകീട്ടോടെ മരിക്കുകയായിരുന്നു.

പയ്യോളിയിൽ ഹാഷിം ജോലി ചെയ്യുന്ന പഴം - പച്ചക്കറി സ്റ്റാളിലേക്ക് സാധനമെടുക്കാനായി അതിരാവിലെ കോഴിക്കോട്ടേക്ക് പുറപ്പെട്ടപ്പോഴായിരുന്നു അപകടം സംഭവിച്ചത്. മാതാവ്: സുൽഫത്ത്. സഹോദരങ്ങൾ: നിഹാൽ, ആയിഷ.