അപകടത്തിൽ പരിക്കേറ്റ് ചികിത്സയിലായിരുന്ന ഗൃഹനാഥൻ മരിച്ചു

നേമം: ബൈക്ക് അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന ഗൃഹനാഥൻ മരിച്ചു. പേയാട് കുന്നുംപുറം ആയുഷ് ഭവനിൽ സത്യൻറെ മകൻ എസ്. വിനോദ് (52) ആണ് മരിച്ചത്. ജനുവരി രണ്ടിന് ഉച്ചയ്ക്ക് 3.15-ന് കൊല്ലംകോണം ഗരുഡൻ പള്ളിക്കു സമീപമായിരുന്നു അപകടം. പേയാട് ഭാഗത്തുനിന്ന് കുന്നുംപുറം ഭാഗത്തേക്ക് പോകുകയായിരുന്നു വിനോദ് ഓടിച്ചിരുന്ന സ്കൂട്ടർ എതിർദിശയിൽ വരികയായിരുന്ന കാറിൽ ഇടിച്ചായിരുന്നു അപകടം.

തലയ്ക്കു സാരമായി പരിക്കേറ്റ വിനോദിനെ ഉടൻതന്നെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയായിരുന്നു. അടിയന്തരമായി ഓപ്പറേഷൻ പൂർത്തിയാക്കിയെങ്കിലും ജീവൻ രക്ഷിക്കാനായില്ല. ജനുവരി മൂന്നിന് വൈകുന്നേരം 4.30-നായിരുന്നു മരണം. കാർപെൻഡർ ആയിരുന്നു മരണപ്പെട്ട വിനോദ്. മൃതദേഹം മാറനല്ലൂർ ശ്മശാനത്തിൽ സംസ്കരിച്ചു. ലതികകുമാരിയാണ് ഭാര്യ. സച്ചിൻ വിനോദ്, സിജോ വിനോദ്, സൗപർണിക എന്നിവർ മക്കളാണ്.