കോളജ് അധ്യാപകനും വിദ്യാർഥിയും തടാകത്തിൽ മുങ്ങി മരിച്ചു

മംഗളൂരു:ഉള്ളൂറു ബൊബ്ബര്യനകൊഡ്ലു തടാകത്തിൽ കോളജ് അധ്യാപകനും വിദ്യാർഥിയും മുങ്ങി മരിച്ചു.കുന്താപുരത്തിനടുത്ത ശങ്കരനാരായണ മദർ തെരേസ കോളജ് അധ്യാപകൻ രാജേന്ദ്ര ഷെട്ടിഗാർ(28),ശങ്കര നാരായണ ഹൈസ്കൂൾ വിദ്യാർഥി ഭരത് ഷെട്ടിഗാർ(16) എന്നിവരാണ് മരിച്ചത്.

വരാഹി ജലസേചന പദ്ധതിയുടെ ഭാഗമായ നാലേക്കർ വിസ്തൃതിയുള്ള തടാകക്കരയിൽ വന്നതായിരുന്നു ആറംഗ സംഘം. ഭരത് കുളിക്കാൻ ചാടി. പത്തടി ആഴമുള്ള തടാകത്തിൽ നീന്തൽ വശമില്ലാത്ത ഭരത് മുങ്ങിത്താഴുന്നത് കണ്ട് രാജേന്ദ്രയും ഇറങ്ങി. നീന്തൽ അറിയാതെ മുങ്ങിയ അധ്യാപകനേയും വിദ്യാർഥിയേയും അഗ്നിശമന സേന എത്തി പുറത്തെടുത്തപ്പോഴേക്കും മരിച്ചിരുന്നു. മംഗളൂരു സ്വകാര്യ കോളജ് അധ്യാപകനായിരുന്ന രാജേന്ദ്ര ഈയിടെയാണ് മദർ തെരേസയിലേക്ക് മാറിയത്. കണ്ട്ലൂർ പൊലീസ് കേസെടുത്തു.