യമുന എക്സ്പ്രസ് വേയിൽ അപകടം; തീപിടിച്ച കാറിൽ അഞ്ച് യാത്രികർ വെന്തുമരിച്ചു

ലഖ്നോ: യു.പിയിലെ മഥുരയിൽ യമുന എക്സ്പ്രസ് വേയിൽ വാഹനാപകടത്തെ തുടർന്ന് തീപിടിച്ച കാറിനുള്ളിൽ അഞ്ച് യാത്രികർ വെന്തുമരിച്ചു. തിങ്കളാഴ്ച രാവിലെ എട്ട് മണിയോടെയാണ് സംഭവം.

മഹാവൻ മേഖലയിൽ വെച്ച് കാറും ബസും കൂട്ടിയിടിക്കുകയായിരുന്നു. ഇടിക്ക് പിന്നാലെ കാറിന് തീപിടിച്ചു. പുറത്തിറങ്ങാൻ സാധിക്കാതെ ഉള്ളിൽ കുടുങ്ങിയ കാറിലെ യാത്രികർക്കാണ് ദാരുണാന്ത്യം സംഭവിച്ചത്. ബസിനും തീപിടിച്ചെങ്കിലും യാത്രികരെ സുരക്ഷിതമായി പുറത്തിറക്കി.