പൗരത്വ ഭേദഗതി നിയമത്തിനെതിരെ യോജിച്ച പോരാട്ടത്തിന്​ മുസ്​ലിം നേതാക്കളുടെ ആഹ്വാനം

ന്യുഡൽഹി: ഇന്ത്യയൊട്ടാകെ പ്രതിഷേധത്തിൻെറ കൊടുങ്കാറ്റുയർത്തിയ പൗരത്വ ഭേദഗതി നിയമത്തിനെതിരെ ഒറ്റക്കെട്ടായി രംഗത്തിറങ്ങാൻ രാജ്യത്തെ മുസ്​ലിം സംഘടനാ നേതാക്കന്മാരുടെ തീരുമാനം. ന്യൂഡൽഹിയിൽ ചേർന്ന വിവിധ സംഘടനാ നേതാക്കന്മാരുടെ യോഗമാണ്​ തീരുമാനം കൈക്കൊണ്ടത്​. ഭരണഘടന തത്വങ്ങൾക്കും മൂല്യങ്ങൾക്കുമെതിരായ പൗരത്വ ഭേദഗതി നിയമത്തെ ശക്​തമായി അപലപിച്ച നേതാക്കാൾ സമാധാനപ്രിയരായ ജനങ്ങൾ ഈ നിയമത്തെ എതിർക്കാനും സർക്കാറിൽ സമ്മർദം ചെലുത്താനും മുന്നോട്ട്​ വരണമെന്ന്​ ആഹ്വാനം ചെയ്​തു.

ജമാഅത്തെ ഇസ്​ലാമി ഹിന്ദ്​ അഖിലേന്ത്യ പ്രസിഡൻറ്​ സെയ്യദ്​ സാദത്തുല്ല ഹുസൈനി വിളിച്ചുചേർത്ത യോഗത്തിൽ മൗലാന മഹ്​മൂദ്​ മദനി (ജം ഇയത്തുൽ ഉലമാ​ എ ഹിന്ദ്​), മൗലാന തൗഖീർ റസാ ഖാൻ (ഉത്തിഹാദെ മില്ലത്ത്​ കൗൺസിൽ), ഡോ. സഫറുൽ ഇസ്​ലാം ഖാൻ (ഡൽഹി ന്യൂനപക്ഷ കമീഷൻ), ഡോ. മുഹമ്മദ്​ മൻസൂർ ആലം (ആൾ ഇന്ത്യ മില്ലി കൗൺസിൽ), നവൈദ്​ ഹാമിദ്​ (ആൾ ഇന്ത്യ മുസ്​ലിം മജ്​ലിസെ മുശാവറ), മൗലാന ഷീസ്​ തൈമി (മർകസി ജംഇയത്ത്​ അഹ്​ലെ ഹദീസ്​), ഡോ. എസ്​.ക്യൂ.ആർ. ഇല്ല്യാസ്, കമാൽ ഫാറൂഖി ​( ആൾ ഇന്ത്യ മുസ്​ലിം പെഴ്​സണൽ ലോ ബോർഡ്​) മൗലാന നിയാസ്​ അഹമ്മദ്​ ഫാറൂഖി (ജംഇയത്തുൽ ഉലമാ എ ഹിന്ദ്​), ഡോ. സെയദ്​ സഫർ മഹമൂദ്​ (സകാത്​ ഫൗണ്ടേഷൻ ഓഫ്​ ഇന്ത്യ), മുഹമ്മദ്​ ജാഫർ , മുജ്​തബ ഫാറൂഖി, അബ്​ദുൽ ജബ്ബാർ സിദ്ദീഖി (ജമാഅത്തെ ഇസ്​ലാമി ഹിന്ദ്​) തുടങ്ങിയവർ ചേർന്നാണ്​ യോജിച്ച പ്രക്ഷോഭത്തിന്​ തീരുമാനിച്ചത്​.

വിവാദമായ പൗരത്വ ഭേദഗതി നിയമത്തിനെതിരെ രാജ്യമെങ്ങും പ്രക്ഷോഭമുയർന്ന സാഹചര്യത്തിലാണ്​ അടിയന്തിര യോഗം ചേർന്നത്​. ജാമിഅ മില്ലിയയിലും അലിഗഡിലും പോലീസ്​ വിദ്യാർത്ഥികൾക്കു നേരേ നടത്തിയ തേർവാഴ്​ചയിൽ ശക്​തമായ പ്രതിഷേധം രേഖപ്പെടുത്തിയ യോഗം സംഭവത്തിൽ ജുഡീഷ്യൽ ​അന്വേഷണം നടത്തണമെന്ന്​ ആവശ്യപ്പെട്ടു. ജനാധിപത്യപരവും സമാധാനപരവുമായി പ്രക്ഷോഭം നടത്തണമെന്ന്​ വിദ്യാർത്ഥികളോട്​ നേതാക്കൾ ആഹ്വാനം ചെയ്​തു. സാമൂഹ്യ വിരുദ്ധർ സമരത്തെ വഴിതിരിച്ചുവിടാൻ നടത്തുന്ന തന്ത്രങ്ങളിൽ വിദ്യാർത്ഥികൾ ജാഗ്രത പാലിക്കണമെന്നും നേതാക്കൾ മുന്നറിയിപ്പു നൽകി.