ഷഹീൻ ബാഗ്​ സമരം ഈ നൂറ്റാണ്ടിലെ മാതൃക: മുൻ ഡൽഹി ലഫ്​. ഗവർണർ നജീബ്​ ജംഗ്​

ന്യുഡൽഹി: പൗരത്വ ഭേദഗതി നിയമത്തിനെതിരെ ഷഹീൻ ബാഗിൽ മുസ്​ലിം സ്​ത്രീകൾ നടത്തുന്ന സമാധാനപരമായ സമരത്തിന്​ തുല്ല ്യമായ മറ്റൊരു സമരം ഈ നൂറ്റാണ്ടിൽ ലോകത്തെവിടെയും കാണാനാവില്ലെന്ന്​ ഡൽഹി മുൻ ലഫ്​റ്റനൻറ്​ ഗവർണർ നജീബ്​ ജംഗ്​ . പ്രതിഷേധക്കാർ ജാഥയിൽ വിളിക്കുന്ന ‘ലാ ഇലാഹ ഇല്ലല്ലാഹ്​ ’ മുദ്രാവാക്യം വർഗീയമല്ലെന്നും ന്യൂസ്​ 18ന്​ നൽകിയ അഭിമുഖത്തിൽ അദ്ദേഹം പറഞ്ഞു.

കഴിഞ്ഞ ആറു വർഷമായി ഇന്ത്യയി​ലെ മുസ്​ലിംങ്ങളും ക്രിസ്​ത്യാനികളും മറ്റ്​ ന്യൂനപക്ഷങ്ങളും ആശങ്കയിലാണ്​. ഇപ്പോൾ പൗരത്വ ഭേദഗതി നിയമത്തിലൂടെ ആ അരക്ഷിതാവസ്​ഥ രൂക്ഷമായിരിക്കുന്നു. ലോക രാജ്യങ്ങൾക്കു മുന്നിൽ ഇന്ത്യയുടെ പ്രതിഛായ തകർന്നിരിക്കുകയാണ്​. ഒരുകാലത്ത്​ ഇന്ത്യയുമായി നല്ല ബന്ധത്തിലായിരുന്ന രാജ്യങ്ങൾ പോലും അകന്നുപോയിരിക്കുകയാണെന്നും അദ്ദേഹം പറഞ്ഞു. ഡൽഹി ലഫ്​. ഗവർണറായിരിക്കെ മുഖ്യമന്ത്രി അരവിന്ദ്​ കെജ്​രിവാളുമായി എന്നും തർക്കത്തിലാവുകയും ബി.ജെ.പിയുടെ പ്രീതി പിടിച്ചുപറ്റുകയും ചെയ്​തിരുന്ന നജീബ്​ ജംഗ്​ മോദി സർക്കാറിൻെറ മുസ്​ലിം വിരുദ്ധ നിലപാടിനെതിരെ രൂക്ഷമായാണ്​ പ്രതികരിച്ചത്​.

ജാമിയ മില്ലിയ കാമ്പസിലും ജെ.എൻ.യു കാമ്പസിലും നടന്ന അക്രമങ്ങൾ അമ്പരപ്പിക്കുന്നതാണെന്നും ഒരിക്കലും നടക്കാൻ പാടില്ലാത്തതായിരുന്നവെന്നും ജാമിഅ മില്ലിയയിലെ മുൻ വൈസ്​ ചാൻസലർ കൂടിയായ അദ്ദേഹം പറഞ്ഞു. ലൈബ്രറി ഹാളിൽ നടന്ന പൊലീസ്​ അക്രമങ്ങൾ കേട്ടുകേഴ്​വിയില്ലാത്തതാണ്​. അങ്ങേയറ്റം മതേതരമായ ഒരു കാമ്പസാണ്​ ജാമിഅയിൽ. പരിക്കേറ്റ പല വിദ്യാർത്ഥികളുടെയും നില ഗുരുതരമാണ്​. ഒരാളുടെ കണ്ണ് തന്നെ നഷ്​ടമായി. ആ വിദ്യാർത്ഥിയുടെ ഭാവി ഇനി എന്താകുമെന്ന്​ ആശങ്കയുണ്ട്​.

ഇപ്പോ​ഴത്തെ ലഫ്​. ഗവർണർ അനിൽ ബൈജാലിനെ തനിക്ക്​ പരിചയമുണ്ടെന്നും അദ്ദേഹത്തിൻെറ അറിവോടെയായിരിക്കില്ല പൊലീസ്​ അക്രമങ്ങൾ അഴിച്ചുവിട്ടതെന്നും നജീബ്​ പറഞ്ഞു. ജാമിഅയിലെ വിദ്യാർത്ഥികളെ സന്ദർശിച്ച അദ്ദേഹം പ്രതിഷേധത്തിലേർപ്പെട്ടിരിക്കുന്ന വിദ്യാർത്ഥികൾക്ക്​ ഐക്യദാർഡ്യം പ്രഖ്യാപിച്ച്​ ഇന്ത്യൻ ഭരണഘടനയുടെ ആമുഖം ​ വായിച്ചു.