പുനരധിവാസ പാക്കേജ് പ്രഖ്യാപിക്കണം –ബാബു എം. പാലിശേരി

കുന്നംകുളം: ഗുരുവായൂര്‍ -തിരുനാവായ റെയില്‍ പാതക്കായി സര്‍വേ നടത്തുന്നതിന് മുമ്പുതന്നെ ഭൂമി നഷ്ടപ്പെടുന്നവര്‍ക്കും കുടിയൊഴിപ്പിക്കപ്പെടുന്നവര്‍ക്കുമായി സംസ്ഥാന സര്‍ക്കാര്‍ പുനരധിവാസ പാക്കേജ് പ്രഖ്യാപിക്കണമെന്ന് ബാബു എം. പാലിശേരി എം.എല്‍.എ ഇല്ലാത്ത അലൈന്‍മെന്‍റിന്‍െറ പേരുപറഞ്ഞ് റെയില്‍വേ, റവന്യൂ ഉദ്യോഗസ്ഥര്‍ ജനങ്ങളെ ഭയപ്പെടുത്തുകയാണ്. ഭൂമിയും വീടും നഷ്ടപ്പെടുന്നവര്‍ക്ക് പകരം നിര്‍മിച്ച് നല്‍കണം. നഷ്ടപരിഹാരത്തുകയും പുനരധിവാസ പാക്കേജുകളും മുന്‍കൂട്ടി പ്രഖ്യാപിക്കണം. വിപണിവിലകൊടുത്ത് സര്‍ക്കാര്‍ ഭൂമി വാങ്ങാന്‍ തയാറാകാതെ സര്‍വേ ആരംഭിച്ചാല്‍ ജനകീയ പ്രക്ഷോഭത്തിന് നേതൃത്വം നല്‍കുമെന്നും എം.എല്‍.എ വ്യക്തമാക്കി. കുന്നംകുളത്ത് റെയില്‍വേ സ്റ്റേഷനോട് കൂടിയ അലൈന്‍മെന്‍റിന് 200 കോടി രൂപയുടെ അധിക ചെലവ് ഉണ്ടാകുമെന്നത് റെയില്‍വേയുടെ കള്ളക്കണക്കാണ്. ഇക്കാര്യത്തില്‍ റെയില്‍വേയും സംസ്ഥാന സര്‍ക്കാറും നിലപാട് വ്യക്തമാക്കണമെന്നും ആവശ്യപ്പെട്ടു.