ശുചീകരണം ചടങ്ങായി; തിരുവമ്പാടി പകര്‍ച്ചവ്യാധി ഭീഷണിയില്‍

തിരുവമ്പാടി: ശുചീകരണ പ്രവര്‍ത്തനങ്ങള്‍ ചടങ്ങായി മാറവെ മലയോര മേഖലയില്‍ പനിയും മഞ്ഞപ്പിത്തവും പടരുന്നു. തിരുവമ്പാടി അമ്പലപ്പാറ, ഇരുമ്പകം, തുമ്പക്കോട്ട്മല, തമ്പലമണ്ണ പാണ്ടിക്കോട്ട്മല, ചെങ്ങോം, അത്തിപ്പാറ പ്രദേശങ്ങളിലാണ് മഞ്ഞപ്പിത്തം ഉള്‍പ്പെടെയുള്ള പകര്‍ച്ചവ്യാധികള്‍ വ്യാപിക്കുന്നത്. നിരവധി രോഗികള്‍ ആയുര്‍വേദ ചികിത്സയെ ആശ്രയിക്കുന്നതിനാല്‍ രോഗബാധിതരുടെ കൃത്യമായ കണക്ക് അധികൃതര്‍ക്ക് ലഭ്യമല്ല. വാര്‍ഡുകള്‍തോറും ശുചീകരണ-ബോധവത്കരണ പരിപാടികള്‍ നടത്തുന്നതായാണ് ഗ്രാമപഞ്ചായത്തും ആരോഗ്യവകുപ്പ് അധികൃതരും അവകാശപ്പെടുന്നത്. എന്നാല്‍, തിരുവമ്പാടി ടൗണിലെ ഹോട്ടലുകള്‍, കൂള്‍ബാറുകള്‍, ഡന്‍റല്‍ ക്ളിനിക്കുകള്‍ തുടങ്ങിയ സ്ഥാപനങ്ങളില്‍നിന്ന് മലിനജലം ഓവുചാലിലേക്ക് ഒഴുക്കുന്നതിനെതിരെയുള്ള അധികൃതരുടെ നടപടി കടലാസിലൊതുങ്ങുന്നതായി ആക്ഷേപമുണ്ട്. ഡ്രെയ്നേജിലെ മലിനജലം തോടുകളിലേക്കും കുടിവെള്ളസ്രോതസ്സുകളിലേക്കും ഒഴുകിയത്തെുന്നത് പകര്‍ച്ചവ്യാധി വ്യാപനത്തിന് കാരണമാകുമെന്ന് ചൂണ്ടിക്കാണിക്കപ്പെടുന്നു. മലിനജലം ഡ്രെയ്നേജുകളിലേക്ക് ഒഴുക്കുന്ന സ്ഥാപനങ്ങള്‍ക്കെതിരെ ആരോഗ്യവകുപ്പ് നോട്ടീസ് നല്‍കിയിരുന്നെങ്കിലും തുടര്‍നടപടിയുണ്ടായിട്ടില്ല. രോഗവ്യാപനം തടയാന്‍ ശുചീകരണ-പ്രതിരോധ പ്രവര്‍ത്തനങ്ങള്‍ കാര്യക്ഷമമാക്കണമെന്ന ആവശ്യം ശക്തമായിട്ടുണ്ട്.