മങ്കടയില്‍ വീണ്ടും പുലി ഭീതി

മങ്കട: മങ്കട കൂട്ടില്‍ പ്രദേശത്ത് പുലിയുടെ കാല്‍പാടുകള്‍ കണ്ടത് പരിഭ്രാന്തി പരത്തി. വെള്ളിയാഴ്ച രാവിലെ കൂട്ടില്‍ കളത്തില്‍തൊടി സിദ്ദീഖിന്‍െറ വീട്ടുമുറ്റത്താണ് പുലിയുടെതെന്ന് തോന്നിപ്പിക്കുന്ന കാല്‍പാടുകള്‍ കണ്ടത്. വനംവകപ്പ് ഉദ്യോഗസ്ഥര്‍ സ്ഥലം സന്ദര്‍ശിച്ചു. കാല്‍പാടുകള്‍ പുലിയുടെതാകാന്‍ സാധ്യതയുണ്ടെന്നും ജാഗ്രത പാലിക്കണമെന്നും ഉദ്യോഗസ്ഥര്‍ മുന്നറിയിപ്പ് നല്‍കി. ആറുമാസങ്ങള്‍ക്ക് മുമ്പ് കൂട്ടില്‍ യു.പി സ്കൂളിന് മുന്നിലെ റോഡില്‍ പുലിയെ കണ്ടിരുന്നു. തുടര്‍ന്ന് പെരുമ്പറമ്പ് അയിരുമട ഭാഗങ്ങളിലും പുലിയെ കണ്ടതായി അഭ്യൂഹമുണ്ടായിരുന്നു. അന്ന് വയലില്‍ കണ്ട കാല്‍പാടുകള്‍ പരിശോധിച്ചതില്‍നിന്ന് പുലിതന്നെയാണെന്ന് സ്ഥിരീകരിക്കുകയും ചെയ്തിരുന്നു.