അക്രമികള്‍ ലോറികളുടെ ചില്ല് അടിച്ചുതകര്‍ത്തു

ചങ്ങനാശേരി: പായിപ്പാട് കവലക്ക് സമീപം സ്വകാര്യ പുരയിടത്തില്‍ നിര്‍ത്തിയിട്ടിരുന്ന ലോറികളുടെ ചില്ലുകള്‍ അടിച്ചുതകര്‍ത്തതായി പരാതി. പായിപ്പാട് സ്വദേശി സിറാജിന്‍െറ ഉടമസ്ഥതയിലുള്ള ലോറികള്‍ക്കാണ് നാശം വരുത്തിയത്. ലോറിയുടെ മുന്നിലത്തെയും വശങ്ങളിലെയും ചില്ലുകളും വൈപ്പറുകളും തകര്‍ത്തിട്ടുണ്ട്. അരലക്ഷത്തോളം രൂപയുടെ നഷ്ടം കണക്കാക്കുന്നു. ആറുമാസം മുമ്പ് സമാനസംഭവം ഇവിടെ നടന്നിട്ടുണ്ട്. ഇതിന്‍െറപേരില്‍ തൃക്കൊടിത്താനം പൊലീസ് സ്റ്റേഷനില്‍ കേസ് നിലവിലുണ്ട്. കഴിഞ്ഞ ദിവസം നടന്ന ആക്രമണം സംബന്ധിച്ച് ഉടമ സിറാജ് ഡിവൈ.എസ്.പിക്ക് പരാതി നല്‍കി. സംഭവത്തില്‍ കേസെടുത്ത് അന്വേഷണം ആരംഭിച്ചതായി പൊലീസ് പറഞ്ഞു.