വിദേശ ട്രോളര്‍ ലൈസന്‍സ്; പ്രതിഷേധ ശൃംഖല 14ന്

ആലപ്പുഴ: വിദേശ ട്രോളര്‍ ലൈസന്‍സ് റദ്ദാക്കണമെന്നും മത്സ്യബന്ധന നിയന്ത്രണ നിയമത്തില്‍നിന്ന് കേന്ദ്രസര്‍ക്കാര്‍ പിന്മാറണമെന്നും ആവശ്യപ്പെട്ട് 14ന് ആലപ്പുഴ കടപ്പുറത്ത് പ്രതിഷേധ ശൃംഖല സൃഷ്ടിക്കാന്‍ മത്സ്യത്തൊഴിലാളി ഫെഡറേഷന്‍ (എ.ഐ.ടി.യു.സി) ജില്ലാ നേതൃയോഗം തീരുമാനിച്ചു. ഇതുസംബന്ധിച്ച മീനാകുമാരി കമ്മിറ്റി റിപ്പോര്‍ട്ട് തള്ളിക്കളയണം. ജില്ലാ പ്രസിഡന്‍റ് ജോയി സി. കമ്പക്കാരന്‍ അധ്യക്ഷത വഹിച്ചു. സംസ്ഥാന പ്രസിഡന്‍റ് ടി.ജെ. ആഞ്ചലോസ്, വൈസ് പ്രസിഡന്‍റ് ആര്‍. പ്രസാദ്, ജില്ലാ നേതാക്കളായ ടി.കെ. ചക്രപാണി, സി.പി. പത്മനാഭന്‍, ഒ.കെ. മോഹനന്‍ എന്നിവര്‍ സംസാരിച്ചു.