മാരകായുധങ്ങളുമായി മുഖംമൂടിസംഘം 30 പവൻ കവർന്നു

മണ്ണുത്തി: മാരകായുധങ്ങളുമായി എത്തിയ മുഖംമൂടി സംഘം ഡോക്​ടറുടെ വീട്ടിൽനിന്ന്​ 30 പവന്‍ സ്വർണാഭരണവും 80,000 രൂപയും കവർന്നു. മണ്ണുത്തി മുല്ലക്കര ഡോണ്‍ബോസ്‌കോ സ്​കൂളിന് സമീപം ആട്ടോക്കാരന്‍ വീട്ടില്‍ ഡോ. ക്രിസ്​റ്റോയുടെ വീട്ട ിലാണ് ശനിയാഴ്ച കവര്‍ച്ച നടന്നത്.

പുലർച്ചെ മുന്നോടെയാണ്​ മുൻവാതിൽ തകർത്ത്​ നാലംഗസംഘം വീട്ടിൽ കടന്നത്​. സായുധസംഘത്തെ നേരിടാനാകാതെ സ്വർണവും പണവും ഡോക്​ടർ എടുത്തുനല്‍കുകയായിരുന്നു. ഇവരുടെ മോബൈലും കൈക്കലാക്കി. അക്രമി സംഘം ആദ്യം ഡോക്ടറുടെ അമ്മയെ ഭീഷണിപ്പെടുത്തി മറ്റുള്ളവര്‍ എവിടെയാണെന്ന് മനസ്സിലാക്കി. അമ്മയെ തടഞ്ഞു​െവച്ചശേഷം മറ്റുള്ളവർ ഡോക്ടറെ വിളിച്ചുണർത്തി സ്വർണവും പണവും ആവശ്യപ്പെടുകയായിരുന്നു. ഫോൺ അടക്കം കൈകലാക്കി സംഘം രക്ഷപ്പെട്ടു. സി.സി ടി.വിയുടെ സെറ്റപ്പ് ബോക്‌സ് ഉള്‍പ്പെടെ അഴിച്ചുകൊണ്ടുപോയി. സംഘ നേതാവ് ഇംഗ്ലീഷിലാണ് സംസാരിച്ചത്. മറ്റുള്ളവര്‍ തമിഴ് കലര്‍ന്ന മലയാളത്തിലും. കര്‍ണാടക രജിസ്​ട്രേഷനിലുള്ള കാറിലാണ് സംഘം എത്തിയത് എന്ന് സംശയിക്കുന്നു. ഡ്രൈവര്‍ മധുര സ്വദേശിയാണ് എന്നും പൊലീസിന് സൂചന ലഭിച്ചു.

സംശയാസ്പദ നിലയില്‍ രാത്രി ഒരു വാഹനം പൊലീസ് കണ്ടിരുന്നു. എന്നാല്‍, രാവിലെ ഏഴോടെയാണ്​ കവര്‍ച്ച വിവരം പുറംലോകം അറിഞ്ഞത്​. അതിനാൽ, മോഷ്​ടാക്കൾക്ക്​ രക്ഷപ്പെടാൻ അവസരം ലഭിച്ചു. വിരലടയാള വിദഗ്​ധരും, പൊലീസ് നായയും പരിശോധന നടത്തി. മണ്ണുത്തി സി.ഐ എം. ശശിധരന്‍പിള്ളയുടെ നേതൃത്വത്തിൽ അമ്പേഷണം തുടങ്ങി.