കെ.എസ്.ആര്‍.ടി.സി വരയാല്‍ സര്‍വീസ് മുടക്കുന്നതിനെതിരെ നാട്ടുകാര്‍

മാനന്തവാടി: കെ.എസ്.ആര്‍.ടി.സി വരയാല്‍ സര്‍വീസ് ട്രിപ് മുടക്കുന്നതിനെതിരെ നാട്ടുകാര്‍ പ്രക്ഷോഭം നടത്തുമെന്ന് കണ്ണോത്തുമല പഴശ്ശിരാജ സ്വാശ്രയ സംഘം ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 1998ല്‍ അഞ്ച് ട്രിപ്പുകളായാണ് ബസ് സര്‍വീസ് ആരംഭിച്ചത്. വര്‍ഷങ്ങള്‍ക്കുശേഷം രാവിലെയും വൈകീട്ടുമായി ചുരുക്കി. കുറച്ചുകാലമായി രാവിലെ മാത്രമാണ് സര്‍വീസ് നടത്തുന്നത്. ഇതുമൂലം വൈകീട്ട് ആദിവാസികളുള്‍പ്പെടെയുള്ള വിദ്യാര്‍ഥികള്‍ 100 രൂപയോളം ചെലവഴിച്ചാണ് യാത്ര ചെയ്യുന്നത്. കണ്ണോത്ത്മല, ഇടമന, മേലേ വരയാള്‍, പാലാക്കോളി, നമ്പ്യാര്‍വട്ടം പ്രദേശത്തെ നിരവധി ആളുകളാണ് ബസില്ലാത്തതിനാല്‍ ദുരിതം പേറുന്നത്. റോഡിന്‍െറ ശോച്യാവസ്ഥ പരിഹരിക്കാന്‍ മന്ത്രി പി.കെ. ജയലക്ഷ്മി രണ്ടുകോടി രൂപ അനുവദിക്കുകയും നിര്‍മാണ പ്രവൃത്തികള്‍ നടക്കുകയും ചെയ്തു. ബാക്കിവരുന്ന ഒന്നര കി.മീ ദൂരം നന്നാക്കാനുള്ള നടപടികള്‍ ആരംഭിച്ചു കഴിഞ്ഞു. ഇതിനിടയിലാണ് കെ.എസ്.ആര്‍.ടി.സി ട്രിപ്പ് വെട്ടിക്കുറച്ചത്. ഇതിനെതിരെ ശക്തമായ സമരവുമായി മുന്നോട്ടുപോകും. ഭാരവാഹികളായ കെ.എസ്. സഹദേവന്‍, കെ.ബി. പ്രകാശന്‍, ടി.പി. സജി, എം.ഡി. സജി എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.