രാജ്യത്തെ മുതലാളിത്തത്തിന് തീറെഴുതുന്നു –പിണറായി

വൈത്തിരി: ബി.ജെ.പി സര്‍ക്കാര്‍ രാജ്യത്തെ ദേശീയ മുതലാളിത്തത്തിനും വിദേശമുതലാളിത്തത്തിനുമായി പങ്കുവെക്കുകയാണെന്ന് സി.പി.എം സംസ്ഥാന സെക്രട്ടറി പിണറായി വിജയന്‍ പറഞ്ഞു. പി. കുഞ്ഞിക്കണ്ണന്‍ അനുസ്മരണ സമ്മേളനം വൈത്തിരിയില്‍ ഉദ്ഘാടനം ചെയ്യുകയായിരുന്നു അദ്ദേഹം. യു.പി.എ സര്‍ക്കാറിന്‍െറ ജനവിരുദ്ധ നയങ്ങള്‍ കൂടുതല്‍ ശക്തിയോടെ ബി.ജെ.പി സര്‍ക്കാര്‍ നടപ്പാക്കുകയാണ്. ഇന്ധനവില വര്‍ധിപ്പിച്ചതും ട്രെയില്‍ ചാര്‍ജ് വര്‍ധിപ്പിച്ചതും കോര്‍പറേറ്റ് താല്‍പര്യം സംരക്ഷിക്കാനാണ്. ബി.ജെ.പി ഭരണത്തില്‍ രാജ്യത്തിന്‍െറ ജനാധിപത്യം, മതനിരപേക്ഷത, ഫെഡറലിസം എന്നിവ സംബന്ധിച്ച് വലിയ ആശങ്കകളാണുയരുന്നതെന്നും പിണറായി വിജയന്‍ പറഞ്ഞു.എം. ജനാര്‍ദനന്‍ അധ്യക്ഷത വഹിച്ചു. പി.എ. മുഹമ്മദ്, ജില്ലാ സെക്രട്ടറി സി.കെ. ശശീന്ദ്രന്‍, കെ.വി. മോഹനന്‍, പി.പി. ശങ്കരന്‍ നമ്പ്യാര്‍, എം.വി. വേലായുധന്‍ എന്നിവര്‍ സംസാരിച്ചു. എം. സെയ്ത് സ്വാഗതം പറഞ്ഞു. ഇ.എം.എസ്, എ.കെ.ജി, പി. സുന്ദരയ്യ, ബി.ടി. രണദിവെ സ്മാരക പഠന സ്കൂളിന് പി. കുഞ്ഞിക്കണ്ണന്‍ നല്‍കിയ സ്ഥലത്ത് പിണറായി വിജയന്‍ ശിലാസ്ഥാപനം നിര്‍വഹിച്ചു.