റെയില്‍വേ ബജറ്റ്: തൃശൂര്‍ –കൊല്ലങ്കോട് പാതയെ മറന്നു

നെന്മാറ: ബ്രിട്ടീഷുകാരുടെ കാലത്ത് സര്‍വേ കഴിഞ്ഞതും റെയില്‍വേ മന്ത്രാലയം റീസര്‍വേക്കായി തുക നീക്കി വെച്ചതുമായ തൃശൂര്‍-കൊല്ലങ്കോട് റെയില്‍പാത നിര്‍മാണം സംബന്ധിച്ച് എന്തെങ്കിലും നിര്‍ദേശം ബജറ്റില്‍ ഉണ്ടാകുമെന്ന പ്രതീക്ഷയുണ്ടായിരുന്നുവെന്ന് നെന്മാറ കേന്ദ്രമായ ആക്ഷന്‍ കമ്മിറ്റി ഭാരവാഹികള്‍ പറഞ്ഞു. സര്‍വേ കഴിഞ്ഞ് മുക്കാല്‍ നൂറ്റാണ്ടായെങ്കിലും റെയില്‍പാത നിര്‍മാണം നടക്കാത്തതിനാല്‍ നെന്മാറ, കൊല്ലങ്കോട്, വടക്കഞ്ചേരി പ്രദേശങ്ങളിലെ നാട്ടുകാര്‍ ചേര്‍ന്ന് രൂപവത്കരിച്ചതാണ് റെയില്‍വേ ആക്ഷന്‍ കമ്മിറ്റി. ആക്ഷന്‍ കമ്മിറ്റി നേതൃത്വത്തില്‍ കഴിഞ്ഞ രണ്ടു സര്‍ക്കാറുകളിലും സമ്മര്‍ദം ചെലുത്തിയതിനെ തുടര്‍ന്ന് തൃശൂര്‍-കൊല്ലങ്കോട് റെയില്‍വേ ലൈന്‍ സര്‍വേ നടപടി പുനരവലോകനം ചെയ്തിരുന്നു. 2013ല്‍ ചെന്നൈയിലെ റെയില്‍വേ ചീഫ് എന്‍ജിനീയറുടെ നേതൃത്വത്തിലുള്ള അഞ്ചംഗസംഘം പാതക്കായി നേരത്തേ സര്‍വേ നടത്തിയ പ്രദേശങ്ങള്‍ സന്ദര്‍ശിച്ച് റെയില്‍വേ മന്ത്രാലയത്തിന് റിപ്പോര്‍ട്ട് നല്‍കിയിരുന്നു. ഇതോടെ മേഖലയിലെ നാട്ടുകാരും ആക്ഷന്‍ കമ്മിറ്റിയും തികഞ്ഞ പ്രതീക്ഷയിലായിരുന്നു. റീസര്‍വേക്കുള്ള അനുമതിയും റെയില്‍പ്പാത നിര്‍മാണത്തിനുള്ള അനുമതിയും ഇത്തവണത്തെ ബജറ്റിലുണ്ടാകുമെന്നായിരുന്നു കരുതിയത്. മേഖലയിലെ ജനങ്ങളുടെ യാത്രാപ്രശ്നങ്ങള്‍ക്ക് അറുതി വരുത്തുന്നതും വന്‍ വികസനത്തിന് കാരണമാകുന്നതുമായിരുന്നു ഈ പാത. 60 കിലോമീറ്ററോളം ദൈര്‍ഘ്യമുള്ള ഈ റെയില്‍വേ ലൈന്‍ യാഥാര്‍ഥ്യമായാല്‍ തൃശൂരിലേക്ക് പാലക്കാട്ടുനിന്ന് എളുപ്പമത്തൊം. വ്യാവസായികമായും വാണിജ്യപരമായും വന്‍ പ്രാധാന്യം കല്‍പിക്കപ്പെടുന്ന റെയില്‍പ്പാത കേരളത്തെയും തമിഴനാടിനെയും ബന്ധിപ്പിക്കുന്നതുകൂടിയാണ്. വിനോദസഞ്ചാര വികസനത്തിനും നിര്‍ദിഷ്ട റെയില്‍പ്പാത ഗുണകരമാണ്.