ശോച്യാവസ്ഥക്ക് പരിഹാരമായില്ല: വെങ്ങാട്–എടയൂര്‍ റോഡില്‍ യാത്രാദുരിതം

കൊളത്തൂര്‍: പൂര്‍ണമായും തകര്‍ന്ന വെങ്ങാട്-എടയൂര്‍ റോഡിന്‍െറ ശോച്യാവസ്ഥക്ക് പരിഹാരമായില്ല. റോഡ് തകര്‍ന്ന് ഒരു വര്‍ഷത്തോളമായിട്ടും നവീകരണപ്രവൃത്തികള്‍ നടത്താന്‍ അധികൃതര്‍ തയാറായിട്ടില്ല. പെരിന്തല്‍മണ്ണ-വളാഞ്ചേരി റോഡിലെ വെങ്ങാട് ഭാഗത്തുനിന്ന് എടയൂര്‍ മണ്ണത്തുപറമ്പിലേക്കുള്ള റോഡിന്‍െറ ഒരു കിലോമീറ്ററോളം ഭാഗം പൂര്‍ണമായി തകര്‍ന്ന നിലയിലാണ്. കല്ലുകള്‍ ഇളകി വലിയ കുഴികള്‍ രൂപപ്പെട്ട റോഡ് മഴ പെയ്തതോടെ ചളിക്കുളമായി. നിരവധി വാഹനങ്ങള്‍ ദിവസവും കടന്നുപോകുന്ന റോഡില്‍ ഓട്ടോറിക്ഷയുള്‍പ്പടെയുള്ള ചെറിയ വാഹനങ്ങള്‍ക്കാണ് യാത്ര ദുഷ്കരമായത്. കാല്‍നട യാത്രപോലും ദുസ്സഹമാണ്. പരിസരങ്ങളില്‍ പ്രവര്‍ത്തിക്കുന്ന ക്വാറികളില്‍നിന്ന് കല്ലുമായി പോകുന്ന ലോറികളുടെ ഇടതടവില്ലാത്ത ഓട്ടമാണ് റോഡിന്‍െറ ശോച്യാവസ്ഥക്ക് കാരണമെന്ന് നാട്ടുകാര്‍ പറയുന്നു. റോഡിന്‍െറ തുടക്കത്തില്‍ 20 മീറ്റര്‍ സ്ഥലം മാത്രമാണ് റീടാറിങ് ചെയ്തിട്ടുള്ളത്. വളാഞ്ചേരിയില്‍ നിന്ന് കൊളത്തൂരിലേക്ക് അഞ്ച് കിലോമീറ്ററോളം ലാഭിക്കാവുന്ന റോഡുകൂടിയാണിത്.