സബ് കലക്ടറുടെ റെയ്ഡില്‍ 1000 ചാക്ക് മണലും വാഹനവും പിടികൂടി

പെരിന്തല്‍മണ്ണ: സബ് കലക്ടര്‍ അമിത് മീണയുടെ നേതൃത്വത്തില്‍ പെരിന്തല്‍മണ്ണ, ഏറനാട് താലൂക്കുകളിലെ വിവിധ കടവുകളില്‍ നടത്തിയ പരിശോധനയില്‍ 1000 ചാക്ക് മണലും മണല്‍കടത്തിയ വാഹനവും പിടികൂടി. ഏറനാട് താലൂക്കിലെ ആനക്കയം, ആമക്കാട് കടവുകളില്‍നിന്ന് അനധികൃതമായി ശേഖരിച്ച 300ഓളം ചാക്ക് മണല്‍ പിടിച്ചു. കൂട്ടിലങ്ങാടി പടിഞ്ഞാറ്റുമുറിയിലെയും പുലാമന്തോള്‍, ഏലംകുളം എന്നിവിടങ്ങളിലെയും വിവിധ കടവുകളിലും പരിശോധന നടത്തി. പുലാമന്തോളില്‍നിന്ന് മണല്‍ കടത്തവെ ടെമ്പോ പിടികൂടി. ഏലംകുളം പഞ്ചായത്ത് ഓഫിസിന് സമീപത്തെ കടവില്‍നിന്ന് 700ഓളം ചാക്ക് മണല്‍ പിടിച്ചു. ഇവ പുഴയില്‍ തള്ളി. വാട്ടര്‍ അതോറിറ്റി ജലസംഭരണി ഉള്ളതിനാല്‍ ഇവിടുത്തെ മണലെടുപ്പ് കുടിവെള്ള പ്രശ്നം ഉണ്ടാക്കുന്നതായി പരാതി ലഭിച്ചതിന്‍െറ അടിസ്ഥാനത്തിലായിരുന്നു പരിശോധന. മേഖലയില്‍ പരിശോധന കര്‍ശനമാക്കാന്‍ തഹസില്‍ദാര്‍ക്കും പെരിന്തല്‍മണ്ണ പൊലീസിനും സബ്കലക്ടര്‍ കര്‍ശന നിര്‍ദേശം നല്‍കി. സബ്കലക്ടര്‍ ഓഫിസിലെ ജൂനിയര്‍ സൂപ്രണ്ട് വി. വിജയകുമാരന്‍, ജീവനക്കാരായ വയങ്കര രാമനാഥന്‍, രാഘവന്‍, നിത്യന്‍, ഡി. ഷിബുമോന്‍, അബ്ദുല്‍ ഫത്താഹ് എന്നിവര്‍ റെയ്ഡില്‍ പങ്കെടുത്തു.