സി.പി.എം സര്‍ക്കാറിനെ മതപരമായി എതിര്‍ക്കുന്നു –മന്ത്രി അനില്‍കുമാര്‍

മലപ്പുറം: സി.പി.എം സംസ്ഥാന സര്‍ക്കാറിനെ രാഷ്ട്രീയമായി എതിര്‍ക്കുന്നതിന് പകരം മതപരമായ കാരണങ്ങള്‍ പറഞ്ഞാണ് ഇപ്പോള്‍ എതിര്‍ക്കുന്നതെന്ന് ടൂറിസം മന്ത്രി എ.പി. അനില്‍കുമാര്‍. കെ. കരുണാകരന്‍ സ്റ്റഡിസെന്‍റര്‍ നടത്തിയ ലീഡറിന്‍െറ 96ാം ജന്മദിനാചരണം മലപ്പുറത്ത് ഉദ്ഘാടനം ചെയ്യുകയായിരുന്നു അദ്ദേഹം. സര്‍ക്കാറിനും യു.ഡി.എഫിനുമെതിരെ ഉന്നയിക്കുന്ന ഇടതുപക്ഷത്തിന്‍െറ ഇത്തരം ആക്ഷേപം ഘടകകക്ഷികളിലെ സമുദായങ്ങള്‍ക്ക് നേരെയാക്കിയിരിക്കുന്നു. മുന്നണി രാഷ്ട്രീയത്തെ ദുര്‍ബലപ്പെടുത്തുന്ന പ്രവര്‍ത്തനങ്ങള്‍ കോണ്‍ഗ്രസിന് ഗുണം ചെയ്യില്ല. മുന്നണി രാഷ്ട്രീയം കെട്ടിപ്പടുക്കുന്നതിലും നിലനിര്‍ത്തുന്നതിലും വലിയ സംഭാവന നല്‍കിയ ആളാണ് കെ. കരുണാകരന്‍. വി. സെയ്ത് മുഹമ്മദ് തങ്ങള്‍ അധ്യക്ഷത വഹിച്ചു. ഡി.സി.സി പ്രസിഡന്‍റ് ഇ. മുഹമ്മദ്കുഞ്ഞി മുഖ്യപ്രഭാഷണം നടത്തി. പി.ടി. അജയമോഹന്‍, കെ.പി. അബ്ദുല്‍മജീദ്, മംഗലം ഗോപിനാഥ്, മധുസൂദനന്‍, കെ.എം. ഗിരിജ, വി. സുധാകരന്‍, രാധാകൃഷ്ണന്‍ മാസ്റ്റര്‍, റിയാസ് മുക്കോളി, എം. വിജയകുമാര്‍, വി.പി. ഫിറോസ്, വി. ബാബുരാജ്, സമദ് മങ്കട, വിജയന്‍ നായര്‍, സക്കീര്‍ പുല്ലാര എന്നിവര്‍ സംസാരിച്ചു.