കരിപ്പൂരില്‍ ഒരു കോടിയുടെ വിദേശ കറന്‍സി പിടികൂടി

കൊണ്ടോട്ടി: ദുബൈയിലേക്ക് പോകാൻ എത്തിയ രണ്ട് യാത്രക്കാരിൽനിന്ന് 1,00,91,000 രൂപയുടെ വിദേശ കറൻസി കരിപ്പൂ൪ വിമാനത്താവളത്തിൽ കസ്റ്റംസ് പ്രിവൻറീവ് വിഭാഗം പിടികൂടി.
ഞായറാഴ്ച രാവിലെ പത്തിന് എയ൪ ഇന്ത്യ വിമാനത്തിൽ ദുബൈയിലേക്ക് പോകാൻ എത്തിയ കൊടുവള്ളി സ്വദേശി നിസാമുദ്ദീൻ (36), മലപ്പുറം മമ്പാട് സ്വദേശി അഹമ്മദ് (32) എന്നിവരിൽനിന്നാണ് വിദേശ കറൻസി പിടിച്ചെടുത്തത്. ബാഗേജിനുള്ളിൽ കടലാസിൽ പൊതിഞ്ഞ് ഒളിപ്പിച്ച കറൻസി എക്സ്റേ പരിശോധനയിലാണ് നിസാമുദ്ദീനിൽനിന്ന് 57.94 ലക്ഷത്തിൻെറ സൗദി റിയാലും അഹമ്മദിൽനിന്ന് 42.97 ലക്ഷത്തിൻെറകുവൈത്ത് ദിനാ൪, ഖത്ത൪ റിയാൽ എന്നിവയും കണ്ടെടുത്തത്. ഇരുവ൪ക്കും എതിരെ വിദേശ കറൻസി കയറ്റുമതി നിരോധ നിയമപ്രകാരം കേസെടുത്തു. സ്വ൪ണക്കടത്ത് സംഘങ്ങൾക്ക് സംഭവവുമായി ബന്ധമുണ്ടെന്ന് അധികൃത൪ കരുതുന്നു.