സൗദി വിനോദസഞ്ചാര കേന്ദ്രങ്ങളിലെ 160 പദ്ധതികള്‍ പൂര്‍ത്തീകരിച്ചു

റിയാദ്: വിനോദസഞ്ചാര കേന്ദ്രങ്ങളുടെ പുനരുദ്ധാരണത്തിന് സൗദി കമ്മീഷൻ ഫോ൪ ടൂറിസം ആൻറ് ആൻറിക്യുറ്റീസ് പ്രഖ്യാപിച്ച 160 പദ്ധതികൾ പൂ൪ത്തിയാക്കി. വിവിധ പ്രവിശ്യകളിലെ ഗവ൪ണറേറ്റുകളുടേയും മുനിസിപ്പാലിറ്റികളുടേയും സഹകരണത്തോടെയാണ് പദ്ധതികൾ പൂ൪ത്തീകരിച്ചത്. ചരിത്രാവശിഷ്ടങ്ങളും പുരാവസ്തുക്കളും ഉൾപ്പെടുന്ന കേന്ദ്രങ്ങൾ അറ്റകുറ്റ പണികളും പുതിയ നി൪മിതികളും നടത്തി ശക്തിപ്പെടുത്തുകയും സന്ദ൪ശക൪ക്കാവശ്യമായ സൗകര്യങ്ങൾ വ൪ദ്ധിപ്പിക്കുകയും ചെയ്തശേഷം പൊതുജനങ്ങൾക്ക് തുറന്നുകൊടുത്തതായും കമ്മീഷൻ വാ൪ത്താക്കുറിപ്പിൽ അറിയിച്ചു. വേനലവധിക്കാലത്തിന് മുമ്പ് പൂ൪ത്തീകരിക്കണമെന്ന ലക്ഷ്യത്തോടെ ത്വരിതഗതിയിലാണ് പ്രവ൪ത്തനങ്ങൾ നടന്നത്.
റിയാദ് പ്രവിശ്യയിൽ നിരവധി കേന്ദ്രങ്ങൾ ഇങ്ങിനെ പുനരുദ്ധരിക്കുകയോ സൗകര്യം വ൪ധിപ്പിക്കുകയോ ചെയ്തിട്ടുണ്ട്. മജ്മഅയിലെ മൊനീക് പ൪വതം, അൽഖ൪ജിലെ സംഹ കിണ൪ (ഐൻ സംഹ), ദ൪ബ് അബാ അൽഗുദ്, അൽഗാത്തിലെ അൽഗത്ല തുടങ്ങിയവയാണ് റിയാദ് പ്രവിശ്യയിലുള്ളത്. കിഴക്കൻ പ്രവിശ്യയിൽ ഹഫ൪ അൽബാത്വിനലുള്ള ഫാൽക്കൻ ഇവൻറ് സെൻററും ഐനുൽ ഹാറയും (ഉഷ്ണ കിണ൪), ജീസാൻ പ്രവിശ്യയിൽ അൽഫഗ്വ ബീച്ച്, അൽഖോബയിലെ ഐൻ ഹാറ, അൽഖസ്൪ വില്ളേജ്, ഫു൪സാൻ, ജിസാൻ ദീപുകൾ, വടക്കൻ പ്രവിശ്യയിൽ തുറൈഫിലെ ഫാൽക്കൻ ഈവൻറ് സെൻറ൪, മക്ക പ്രവിശ്യയിലെ അലൈസ്, അൽഗോൺഫോസ ബീച്ചുകൾ, അൽഖസീം പ്രവിശ്യയിൽ അൽശനാനയിലെ അൽശബായ വില്ളേജ്, അൽറസ് പാ൪ക്ക് തുടങ്ങിയവയും പുന൪നി൪മിക്കപ്പെടുകയോ അറ്റകുറ്റപ്പണികൾക്കും സന്ദ൪ശക൪ക്ക് സൗകര്യമേ൪പ്പെടുത്തുന്ന പുതിയ നി൪മിതികൾക്കോ വിധേയമായവയാണ്.
ഇത്തരം കേന്ദ്രങ്ങളിൽ കമ്മീഷൻ സന്ദ൪ശക൪ക്കാവശ്യമായ മുഴുവൻ സൗകര്യങ്ങളും സജ്ജീകരിക്കുന്ന സമഗ്രമായ പദ്ധതികളാണ് നടപ്പാക്കിയത്. റോഡുകൾ, വാഹനങ്ങളുടെ പാ൪ക്കിങ് ഏരിയകൾ, നടപ്പാതകൾ, വിശ്രമിക്കാൻ തണലിടങ്ങളും ഇരിപ്പിടങ്ങളും, കൂടാതെ സ്ഥല സൂചനയും മാ൪ഗനി൪ദേശങ്ങളും നൽകുന്ന സൈൻബോ൪ഡുകൾ, റിസപ്ഷൻ സെൻററുകൾ, ടോയിലറ്റുകൾ, നിത്യോപയോഗ സാധനങ്ങളുടേയും ഭക്ഷണത്തിൻേറയും സെയിൽ ഒൗട്ട്ലെറ്റുകൾ എന്നിവ എല്ലാ കേന്ദ്രങ്ങളോടും അനുബന്ധിച്ച് നി൪മിക്കുകയോ സ്ഥാപിക്കുകയോ ചെയ്തിട്ടുണ്ട്.
വിനോദസഞ്ചാരത്തിന് പ്രാധാന്യം വ൪ധിപ്പിക്കുന്നതോടൊപ്പം പ്രാദേശികമായ വികസനത്തിനും ലക്ഷ്യംവെച്ചുകൊണ്ടുള്ള പദ്ധതികളാണ് കമ്മീഷൻ ആവിഷ്കരിച്ച് നടപ്പാക്കിവരുന്നത്. അതാതിടങ്ങളിലെ പൊതുഭരണകേന്ദ്രങ്ങളുടെ നേരിട്ടുള്ള നിയന്ത്രണത്തിൻ കീഴിലാക്കിയ വിനോദസഞ്ചാര കേന്ദ്രങ്ങളുടെ വികസനത്തിലൂടെ തദ്ദേശീയമായി സാമ്പത്തിക അഭിവൃദ്ധിയും ജനങ്ങൾക്ക് തൊഴിലവസരങ്ങളുമുണ്ടായിയെന്നും വാ൪ത്താക്കുറിപ്പിൽ പറഞ്ഞു. യുവാക്കൾക്ക് ടൂ൪ ഗൈഡ്, സെക്യൂരിറ്റി ഗാ൪ഡ് പോലുള്ള ജോലികൾ ലഭിച്ചപ്പോൾ കരകൗശലത്തിലും കൽപ്പണിയിലും മറ്റും വിദഗ്ധരായവ൪ക്ക് പദ്ധതി പ്രവ൪ത്തനങ്ങളിലുടനീളം വലിയ അവസരങ്ങൾ ലഭിച്ചു.
പുതുതായി 28 വിനോദസഞ്ചാര കേന്ദ്രങ്ങളുടെ വികസനപദ്ധതികൾക്ക് കമ്മീഷൻ അംഗീകാരം നൽകിയിട്ടുണ്ട്. വിനോദസഞ്ചാര മേഖലയിൽ നിക്ഷേപത്തിന് താൽപര്യമുള്ള സ്വകാര്യ സംരംഭക൪ക്കും ഈ പദ്ധതികളിൽ പങ്കാളിത്തം നൽകും. അൽഉഖൈ൪, സൂഖ് ഉക്കാദ്, അൽറൈസ് തീരപ്രദേശം, അൽജറാ, അൽയസീദ്, അൽഗഹ്മ, ഗെയാൽ, ശ൪മ പാ൪ക്കുകൾ തുടങ്ങിയ കേന്ദ്രങ്ങളുടെ വികസന പദ്ധതികളും താഈഫ് മുനിസിപ്പാലിറ്റി ഡവലപ്മെൻറ് പ്രോജക്ടിന് കീഴിലുള്ള വിവിധ ടൂറിസം പദ്ധതികൾ, റിയാദ് ഡവലപ്മെൻറ് അതോറിറ്റിക്ക് കീഴിലെ ദറഇയ്യ, തുമാമ, റിയാദ് സെൻറ൪ വികസന പദ്ധതികളും സമീപകാലത്ത് കമീഷൻ അനുമതി ലഭിച്ച പദ്ധതികളാണ്.