മെക്സികോയില്‍ കനേഡിയന്‍ ദമ്പതികള്‍ കൊല്ലപ്പെട്ട നിലയില്‍

ഗ്വാഡൽജാര (മെക്സികോ): മെക്സികോയിൽ കനേഡിയൻ ദമ്പതികൾ കൊല്ലപ്പെട്ട നിലയിൽ. മോഷണസംഘമാണ് കൊലപാതകത്തിന് പിന്നിലെന്ന് സംശയിക്കുന്നതായി പൊലീസ് പറഞ്ഞു. പടിഞ്ഞാറൻ മെക്സികോയിലെ ജാലിസ്കോവിലെ വീട്ടിൽ അടിച്ചും കുത്തിയും കൊലപ്പെടുത്തിയ നിലയിലാണ് മൃതദേഹങ്ങൾ. രാവിലെ വീട്ടിലത്തെിയ തോട്ടം ജോലിക്കാരനാണ് സ്വീകരണമുറിയിൽ മൃതദേഹങ്ങൾ കണ്ടത്. 84 വയസ്സുള്ള പുരുഷനും 72 വയസ്സുള്ള സ്ത്രീയുമാണ് കൊല്ലപ്പെട്ടതെന്നും ഇവരെ തിരിച്ചറിഞ്ഞതായും ചാപാല മുനിസിപ്പാലിറ്റി പൊലീസ് മേധാവി ഏണസ്റ്റോ റോബിൾസ് വ്യക്തമാക്കി.
എന്നാൽ, ഇവരുടെ പേരുവിവരങ്ങൾ വെളിപ്പെടുത്തിയിട്ടില്ല. ദമ്പതികളുടെ രണ്ടു വാഹനങ്ങളും മോഷണം പോയിട്ടുണ്ട്. വിശ്രമജീവിതം നയിക്കാനായി വിദേശികൾ കൂടുതലായി എത്തുന്ന അജിജിക്കിൽ ആറു മാസം മുമ്പാണ് ദമ്പതികൾ താമസം തുടങ്ങിയത്.