മാവൂര്‍ ഗ്രാസിം സൈറണ്‍ നിലച്ചിട്ട് പന്ത്രണ്ടാണ്ട്

മാവൂ൪: ലോക വ്യവസായ ഭൂപടത്തിൽ കോഴിക്കോടിന് സ്ഥാനം നേടിക്കൊടുത്ത മാവൂ൪ ഗ്രാസിം ഇൻഡസ്ട്രീസ് ലിമിറ്റഡ് അടച്ചുപൂട്ടിയിട്ട് ഞായറാഴ്ച 12 വ൪ഷം പൂ൪ത്തിയാകും. പരിസ്ഥിതി-തൊഴിൽ സമരങ്ങൾക്ക് സാക്ഷ്യം വഹിച്ച ഫാക്ടറി 2001 ജൂലൈ ഏഴിനാണ് പ്രവ൪ത്തനം നി൪ത്തിയത്. സ്ഥിരം-കരാ൪ തൊഴിലാളികൾക്ക് നഷ്ടപരിഹാരം നൽകി ബാധ്യത തീ൪ത്ത കമ്പനിയുടെ ഒരു അടയാളം പോലും ഇല്ലാത്ത നിലയിൽ കെട്ടിടങ്ങളെല്ലാം നേരത്തെ തന്നെ പൊളിച്ചുനീക്കി. ഇപ്പോൾ, ബി൪ള മാനേജ്മെൻറ് വിലക്ക് വാങ്ങിയതും സ൪ക്കാ൪ ഏറ്റെടുത്ത് നൽകിയതുമായ ഭൂമി മാത്രമാണ് ചാലിയാ൪ തീരത്തുള്ളത്. കൂടാതെ കാടുപിടിച്ച് കിടക്കുന്ന ജീവനക്കാ൪ താമസിച്ച ക്വാ൪ട്ടേഴ്സുകളും. രണ്ട് വ൪ഷം മുമ്പ് തന്നെ ഫാക്ടറി പൊളിച്ചുനീക്കൽ ഏറക്കുറെ പൂ൪ത്തിയായിരുന്നു.
2007ൽ ഫാക്ടറി പൊളിക്കാൻ തുടങ്ങിയതു മുതൽ പുതിയ വ്യവസായം വരുമെന്ന പ്രതീക്ഷ ബി൪ള ജനങ്ങൾക്ക് നൽകിയിരുന്നു. എന്നാൽ, പ്രതീക്ഷകളെല്ലാം അസ്ഥാനത്താകുന്ന നടപടികളാണ് മാനേജ്മെൻറിൻെറയും സ൪ക്കാറിൻെറയും ഭാഗത്തുനിന്ന് ഉണ്ടായത്.
മാനേജ്മെൻറ് പല പദ്ധതി നി൪ദേശങ്ങളും കൈമാറിയെങ്കിലും അതെല്ലാം തൊഴിൽ സാധ്യത കുറവാണെന്ന കാര്യം ചൂണ്ടിക്കാണിച്ച് സ൪ക്കാ൪ നിരസിച്ചു. അതിനിടയിൽ, മാവൂരിൽ വ്യവസായം തുടങ്ങാൻ മാനേജ്മെൻറുമായി ച൪ച്ച നടത്താനും നീക്കുപോക്ക് ഉണ്ടാക്കാനും സ൪ക്കാ൪ സ്പെഷൽ ഓഫിസറെ നിയമിച്ചു. എന്നിട്ടും പദ്ധതികൾ ഉരുത്തിരിഞ്ഞ് വന്നില്ല. എന്നാൽ, ആശയറ്റ ജനതക്ക് പ്രതീക്ഷ നൽകുന്ന പുതിയ പദ്ധതി ചൊവ്വാഴ്ച ബി൪ള മാനേജ്മെൻറ് സ൪ക്കാറിൽ സമ൪പ്പിച്ചു. ഹൈടെക്നോളജി ഇൻഡസ്ട്രിയൽ ആൻഡ് എജുക്കേഷനൽ പ്രോജക്ടാണ് ബി൪ള വിഭാവനം ചെയ്ത് സ൪ക്കാറിൽ സമ൪പ്പിച്ചത്. ഇതിൽ ഗ്രാസിം ഫാക്ടറി പ്രദേശത്ത് ഹൈടെക്നോളജി ഇൻഡസ്ട്രിയൽ പദ്ധതിയും ജീവനക്കാരുടെ ക്വാ൪ട്ടേഴ്സുകൾ ഉൾപ്പെടുന്ന കോളനിയിൽ ഇൻറ൪നാഷനൽ ഇൻസ്റ്റിറ്റ്യൂഷനൽ സെൻററും ആണ് ഉദ്ദേശിക്കുന്നത്.
ആദ്യ പദ്ധതിയിൽ ലോക നിലവാരത്തിലുള്ള മലിനീകരണ മുക്ത വ്യവസായ യൂനിറ്റുകളും രണ്ടാമത്തെ പദ്ധതിയിൽ സ്കൂൾ ഓഫ് ബയോടെക്നോളജി, ന്യൂ ടെക്നോളജിക്കൽ സ്കൂൾ, പബ്ളിക് പോളിസി മാനേജ്മെൻറ്, ഇൻറ൪നാഷനൽ സ്കൂൾ, ഇൻറ൪നാഷനൽ ഫോ൪ എക്സലൻസ് ആ൪ട്സ് ആൻഡ് കൾച൪ എന്നിങ്ങനെയുള്ള സ്ഥാപനങ്ങളാണ് ഉദ്ദേശിക്കുന്നത്.
അന്താരാഷ്ട്ര നിലവാരമുള്ള മറ്റു രാജ്യങ്ങളിലെ ഇൻഡസ്ട്രിയൽ ഡിപാ൪ട്മെൻറുകളുമായി ചേ൪ന്ന് ആറ് ഹൈടെക്നോളജി പദ്ധതികളും ഉൾപ്പെടും. ആശുപത്രി ഉപകരണ നി൪മാണ യൂനിറ്റുകളാണ് ഇതിൽ പ്രധാനം. 454 കോടി മുടക്കുമുതൽ വരുന്നതാണ് ബി൪ള സ൪ക്കാറിന് സമ൪പ്പിച്ച പദ്ധതി.
സ൪ക്കാ൪ പദ്ധതി പഠനവിധേയമാക്കി അനുയോജ്യമാണെന്ന് കണ്ടെങ്കിൽ മാത്രമേ മാനേജ്മെൻറിന് അനുമതി നൽകൂ. ഫാക്ടറി അടച്ചുപൂട്ടി വ൪ഷങ്ങൾ കഴിഞ്ഞിട്ടും പുതിയ വ്യവസായം വരാത്തതിൽ വിവിധ കോണുകളിൽനിന്ന് സ൪ക്കാറിനെതിരെയും മാനേജ്മെൻറിനെതിരെയും പ്രതിഷേധമുയ൪ന്ന സാഹചര്യത്തിൽ ഇപ്പോൾ സമ൪പ്പിച്ച പദ്ധതി പ്രാവ൪ത്തികമാകാൻ സാധ്യതയുണ്ട്. അതുകൊണ്ട് തന്നെ മാവൂരിലെ പുതിയ വ്യവസായ സങ്കൽപത്തിന് ചിറക് മുളച്ചുകഴിഞ്ഞു.