കുണ്ടന്നൂര്‍ പാലത്തില്‍ അറ്റകുറ്റപ്പണി ഇഴയുന്നു

മട്ടാഞ്ചേരി: കുണ്ടന്നൂ൪-തേവര പാലത്തിലെ അറ്റകുറ്റപ്പണി നീളുന്നത് ഗതാഗതക്കുരുക്ക് രൂക്ഷമാകുന്നു. ഇതോടെ ജനം ദുരിതത്തിലായി.
45 ദിവസം കൊണ്ട് പണി തീ൪ക്കുമെന്ന് അധികൃത൪ ഉറപ്പുനൽകിയെങ്കിലും ജോലി ഇഴഞ്ഞുനീങ്ങുകയാണ്. ആവശ്യത്തിന് ജോലിക്കാരില്ലാത്തതാണ് കാരണമായി ചൂണ്ടിക്കാണിക്കപ്പെടുന്നത്. പശ്ചിമകൊച്ചിക്കാ൪ക്ക് തൃപ്പൂണിത്തുറ, ചോറ്റാനിക്കര, വൈറ്റില, മൂവാറ്റുപുഴ, കോതമംഗലം ഭാഗത്തേക്ക് വേഗത്തിൽ എത്താൻ കഴിയുന്ന എളുപ്പവഴിയാണ് കുണ്ടന്നൂ൪ പാലം വഴിയുള്ള ഗതാഗതം. പാലത്തിൻെറ ജോലി തുടങ്ങിയതോടെ തേവര വെണ്ടുരുത്തി പാലത്തിലും ഗതാഗതക്കുരുക്ക് രൂക്ഷമായി. കൊച്ചി തുറമുഖത്ത് ചരക്കുമായി കണ്ടെയ്ന൪ ട്രെയ്ലറുകൾ വരുന്നത് കുണ്ടന്നൂ൪ പാലത്തിലൂടെയാണ്. തുറമുഖത്ത് കൂടിയുള്ള ചരക്ക് നീക്കവും പാലം പണി നീളുന്നതോടെ പ്രതിസന്ധിയിലായി.
അടിയന്തരമായി പാലം പണി പൂ൪ത്തീകരിക്കാൻ അധികൃത൪ ഇടപെടണമെന്നാണ് ആവശ്യം.