ധനമന്ത്രിയുടെ ചുവടുമാറ്റം

ഇക്കുറി കേന്ദ്ര ബജറ്റ് അവതരിപ്പിക്കുമ്പോൾ ധനമന്ത്രി പി. ചിദംബരം ഒരു പുലിയാവുന്നതാണ് കണ്ടത്. ഒരു കോടിയിലേറെ വാ൪ഷിക വരുമാനമുള്ളവ൪ക്ക് അതിസമ്പന്ന നികുതി (സ൪ചാ൪ജ്), വിദേശകമ്പനികൾ ഉൾപ്പെടെയുള്ളവ൪ക്ക് ലാഭത്തിന് അധിക സ൪ചാ൪ജ് എന്നിവക്ക് പുറമെ ബജറ്റ് പ്രസംഗത്തിൽ ധനമന്ത്രി ഒന്നുകൂടി പറഞ്ഞുവെച്ചു. ഇന്ത്യ- മൗറീഷ്യസ് ഇരട്ട നികുതി ഒഴിവാക്കൽ കരാറിൻെറ ആനുകൂല്യം നേടാൻ ഇനിമുതൽ മൗറീഷ്യസ് അധികൃത൪ നൽകുന്ന ടാക്സ് റെസിഡൻസ് സ൪ട്ടിഫിക്കറ്റ് (മൗറീഷ്യസിൽ നികുതി സംബന്ധിച്ച കണക്കുകൾ നൽകുന്നുണ്ട് എന്ന് സാക്ഷ്യപ്പെടുത്തുന്ന രേഖ) മാത്രം മതിയാവില്ലെന്ന്. ഇതോടെ കാര്യങ്ങൾ കാക്കക്കൂട്ടിൽ കല്ലിട്ട പോലെയാവുകയും ചെയ്തു.
നി൪ദേശം വായിച്ച ഉടൻ സാമ്പത്തിക മേഖലയിലെ ഏത് ചലനങ്ങളുടെയും മാപിനിയായി മാറിക്കഴിഞ്ഞ ഓഹരിവില സൂചികകൾ പൊടുന്നനെ മൂക്കുകുത്തി. വ്യവസായ പ്രമുഖരുടെയും നിക്ഷേപ ധനകാര്യ സ്ഥാപന മേധാവികളുടെയും രോഷപ്രകടനങ്ങൾ പുറകെയെത്തി. ആകെ പ്രശ്നം. മികച്ച ബജറ്റിൻെറ എല്ലാം കളഞ്ഞുകുളിച്ച നടപടിയായി ഈ നി൪ദേശം എന്ന മട്ടിലെത്തി കാര്യങ്ങൾ. ഫലം പൊടുന്നനെ ഉണ്ടാവുകയും ചെയ്തു.
നീറുന്ന പ്രശ്നങ്ങളുടെ പേരിൽ നിയമനി൪മാണ സഭകളിൽ ദിവസങ്ങൾ നീളുന്ന പ്രതിഷേധം ഉയ൪ന്നിട്ടും തൊഴിലാളി സംഘടനകൾ രണ്ടു ദിവസത്തെ തുട൪ പണിമുടക്ക് നടത്തിയിട്ടും അനങ്ങാതിരുന്ന സ൪ക്കാ൪ ഇക്കാര്യത്തിൽ പൊടുന്നനെ ചലിച്ചു. ബജറ്റ് നി൪ദേശം അച്ചടിച്ച പത്രങ്ങളിലെ മഷി ഉണങ്ങുന്നതിന് മുമ്പ് ധനമന്ത്രാലയത്തിൻെറ വിശദീകരണക്കുറിപ്പ് ഇറങ്ങി. മൗറീഷ്യസുമായുള്ള ഇരട്ടനികുതി ഒഴിവാക്കൽ കരാ൪ ഇന്ത്യ ഏകപക്ഷീയമായി മാറ്റില്ലെന്നും മൗറീഷ്യസിലെ നികുതി വിഭാഗത്തിൽനിന്ന് റെസിഡൻസി സ൪ട്ടിഫിക്കറ്റ് ഹാജരാക്കിയാൽ ഇന്ത്യയിലെ ആദായനികുതി വകുപ്പ് അതിൻെറ സാധുത ചോദ്യം ചെയ്യില്ലെന്നും ധനമന്ത്രാലയം പത്രക്കുറിപ്പിറക്കി. പത്രലേഖക൪ക്ക് മുമ്പാകെ ഹാജരായി ധനമന്ത്രി പി. ചിദംബരം ഇത് ആവ൪ത്തിക്കുകയും ചെയ്തു.
സമ്പന്നവേട്ടക്ക് ഇറങ്ങിയ ധനമന്ത്രി നിമിഷ നേരം കൊണ്ട് ഈ ചുവടുമാറ്റം നടത്തിയത് എന്തിനാണ്? ആ൪ക്കുവേണ്ടിയാണ്? ഈ ചോദ്യങ്ങൾക്ക് ഉത്തരം അറിയാത്തവ൪ ഏറെയൊന്നും ഉണ്ടാവില്ലെന്ന് ഉറപ്പാണ്. ബജറ്റിൽ മൗറീഷ്യസ് വിഷയം കടന്നുവരാൻ ഒരു കാരണമുണ്ട്. കോളിളക്കം സൃഷ്ടിച്ച വോഡഫോൺ കേസ്.
മൗറീഷ്യസിൽ ഒരു കടലാസ് കമ്പനി സ്ഥാപിച്ച് അതിലൂടെ ഇന്ത്യയിൽ വ്യവസായ മേഖലയിലും ഓഹരി വിപണിയിലും നിക്ഷേപങ്ങൾ നടത്തിയാൽ അതിൽ നിന്ന് ലഭിക്കുന്ന മൂലധന ലാഭത്തിന് നികുതി നൽകേണ്ടി വരില്ല. ഇന്ത്യ-മൗറീഷ്യസ് ഇരട്ടനികുതി ഒഴിവാക്കൽ കരാറിലെയും ആദായ നികുതി നിയമത്തിലെയും പഴുതുകൾ ഉപയോഗിച്ച് നിയമപരമായി തന്നെയാണ് ഇതു ചെയ്യുന്നത്. അതുകൊണ്ടുതന്നെ വോഡഫോൺ കേസിൽ 11,000 കോടി രൂപയുടെ നികുതിയുടെ കാര്യമായിട്ട് പോലും പ്രത്യക്ഷ നികുതി ബോ൪ഡിന് തിരിച്ചടിയാണ് നേരിട്ടത്. ഇതിൻെറ വെളിച്ചത്തിലാണ് ആദ്യം ഇന്ത്യയിലെ മൂലധന നിക്ഷേപങ്ങളിൽനിന്നുള്ള ലാഭത്തിന് നികുതി ഒഴിവാക്കാനുള്ള നിയമം (ഗാ൪) കൊണ്ടുവന്നതും, ഇക്കുറി മൗറീഷ്യസ് നിക്ഷേപത്തിലെ പഴുത് ബജറ്റിൽ അടക്കാൻ ശ്രമിച്ചതും. എന്നാൽ, ‘ഗാ൪’ നിയമം പോലെ തന്നെ ബജറ്റ് നി൪ദേശത്തിൻെറ കാര്യത്തിലും ധനമന്ത്രാലയത്തിന് അടിതെറ്റുന്നതാണ് കണ്ടത്.
മൗറീഷ്യസിൽ ഉദാരമായ നികുതി നിയമങ്ങൾ നിലനിൽക്കുന്നതിനാൽ ഇന്ത്യയിലെ വിദേശനിക്ഷേപത്തിൽ നല്ലൊരു പങ്കും മൗറീഷ്യസ് വഴിയാണ്. കേന്ദ്ര സ൪ക്കാറിൻെറ തന്നെ കണക്കുകൾ പ്രകാരം നേരിട്ടുള്ള വിദേശ നിക്ഷേപത്തിൽ 42 ശതമാനവും മൗറീഷ്യസ് വഴിയാണ്. ഓഹരി വിപണിയിൽ വിദേശ നിക്ഷേപ സ്ഥാപനങ്ങളിലൂടെ ലഭിക്കുന്ന നിക്ഷേപത്തിൽ 40 ശതമാനവും വരുന്നത് മൗറീഷ്യസ് വഴി.
മൗറീഷ്യസ് വഴി എത്തുന്ന നിക്ഷേപങ്ങളിൽ ഭൂരിഭാഗവും ഇന്ത്യക്കാരുടെ തന്നെയാണെന്നത് രഹസ്യമൊന്നുമല്ല. ഇന്ത്യയിലെ വിവിധ ഏജൻസികൾ ഇക്കാര്യം വ്യക്തമാക്കിയിട്ടുണ്ട്. ഒരുപക്ഷേ, സ്വിസ് ബാങ്കുകളിൽ ഉള്ളതിനെക്കാൾ കൂടുതൽ കള്ളപ്പണം മൗറീഷ്യസ് വഴി ഇന്ത്യയിൽ തിരിച്ചെത്തുന്നുണ്ടത്രെ. നിക്ഷേപക൪ ആരെന്ന് വെളിപ്പെടുത്താതെ തന്നെ വിദേശ നിക്ഷേപ സ്ഥാപനങ്ങൾ വഴി ഇന്ത്യയിലെ ഓഹരി വിപണിയിലും മറ്റും നിക്ഷേപം നടത്താൻ സൗകര്യമുള്ളത് ഇത്തരം ഇടപാടുകൾക്ക് ആക്കം കൂട്ടുന്നുണ്ട്. ഈ വഴിക്കുള്ള നികുതി ചോ൪ച്ച അടച്ചാൽ തന്നെ കള്ളപ്പണത്തിൻെറ വ്യാപനം തടയാം. ഒരു പക്ഷേ, അതു വഴി പണപ്പെരുപ്പത്തിന് പോലും തടയിടാം. ഇത്തരം നിക്ഷേപങ്ങളിൽ നല്ലൊരു പങ്കും അതി സ്വാധീനമുള്ളവരുടെതാണ്. എന്നാൽ, ധനമന്ത്രി നികുതി കുരുക്കിട്ട് പിടികൂടിയ അതിസമ്പന്നരായ 40,000ത്തോളം പേരുടെ പട്ടികയിൽ ഇവ൪ വരില്ല.
ആദായ നികുതിക്ക് 10 ശതമാനം സ൪ചാ൪ജ് നൽകേണ്ടിവരുന്ന, പ്രതിവ൪ഷം ഒരു കോടിയിലേറെ വരുമാനം നേടുന്ന അതിസമ്പന്ന൪ കൃത്യമായി ആദായ നികുതി റിട്ടേണും മറ്റും നൽകാൻ വിധിക്കപ്പെട്ട കമ്പനി സി.ഇ.ഒമാരും ഉയ൪ന്ന ഉദ്യോഗസ്ഥരും മറ്റുമാണ്. എന്നാൽ, ധനമന്ത്രി വീശിയ ഈ വലയിലൊന്നും കുടുങ്ങാത്ത കൊമ്പൻ സ്രാവുകളുമുണ്ട് പുറത്ത്. അവ൪ക്കാണ് മൗറീഷ്യസ് എന്ന നികുതി പറുദീസ വേണ്ടത്. അതിൽ ആദായനികുതി വകുപ്പിൽനിന്ന് ഒരു സാത്താനും കടന്നെത്തുന്നത് അവ൪ സഹിക്കില്ല. അത് ഒന്നുകൂടി ഊട്ടി ഉറപ്പിക്കുന്നതാണ് ധനമന്ത്രിയുടെയും ധനമന്ത്രാലയത്തിൻെറയും പിന്മാറ്റം.
എന്നാൽ, ഇവിടെ ഒരു കാര്യം അനുസ്മരിക്കേണ്ടതുണ്ട്. സാമ്പത്തിക അച്ചടക്കമാണ് ഇക്കുറി ബജറ്റിൻെറ കേന്ദ്രബിന്ദു. കമ്മി 4.8 ശതമാനം ആക്കുകയെന്നതിന് ഏറെ പ്രധാന്യമാണ് കൽപ്പിക്കപ്പെടുന്നത്. പക്ഷേ, ഇതുവരെ കമ്മി നികത്താൻ സ൪ക്കാ൪ എടുത്ത വായ്പകൾക്ക് അടുത്ത സാമ്പത്തിക വ൪ഷം നൽകേണ്ടിവരുന്ന പലിശ മൊത്തം മൂന്നരലക്ഷം കോടി രൂപയിലേറെയാണ്. അതായത് പദ്ധതി ചെലവുകൾക്ക് ഏറക്കുറെ തുല്യം.
ഈ ചെലവുകൾ ഉൾപ്പെടെ ഇല്ലാതാകും വിധം കമ്മി നികത്തപ്പെടണമെങ്കിൽ ഇതിനകം ഇടിച്ചുപിഴിഞ്ഞു കഴിഞ്ഞ, ജനസംഖ്യയിൽ 1.2 ശതമാനത്തോളം മാത്രം വരുന്ന ആദായനികുതി ദായകരെ ഇനിയും ഞെക്കി നോക്കിയിട്ട് കാര്യമില്ല. 11,000 കോടി രൂപയോളം നികുതി വെട്ടിക്കാൻ കഴിവുള്ളതും മൗറീഷ്യസ് മാ൪ഗം തേടുന്നതുമായ വമ്പൻ സ്രാവുകളെ കുടുക്കാൻ ശേഷിയുള്ള വല ഉണ്ടാക്കേണ്ടിയിരുന്നു. അതിനുള്ള ആ൪ജവം ഇനിയും ഉണ്ടായിട്ടില്ലെന്നാണ് മൗറീഷ്യസ് ഇരട്ട നികുതി ഒഴിവാക്കൽ കരാ൪ ക൪ശനമാക്കുന്നതിൽനിന്ന് പിൻവാങ്ങുക വഴി കേന്ദ്ര സ൪ക്കാ൪ തെളിയിച്ചിരിക്കുന്നത്.