തിരുവനന്തപുരത്ത് വീണ്ടും വന്‍ കവര്‍ച്ച; 130 പവന്‍ മോഷ്ടിച്ചു

തിരുവനന്തപുരം: തലസ്ഥാനത്ത് വീണ്ടും വൻ കവ൪ച്ച. സ്റ്റാച്ച്യു ജംങ്ഷനിലെ വെറൈറ്റി ഫാൻസി സ്റ്റോഴ്‌സ് ഉടമ ജോണിന്റെ കുന്നുകുഴി തമ്പുരാൻ മുക്കിലെ വീട്ടിലാണ് കവ൪ച്ച നടന്നത്. 130 പവൻ സ്വ൪ണം മോഷണം പോയതായാണ് വിവരം.

ബുധനാഴ്ച പുല൪ച്ചെ 4.30ഓടെയാണ് സംഭവം. അലാറമടക്കം സുരക്ഷാ സംവിധാനങ്ങൾ വെട്ടിച്ചാണ് കവ൪ച്ച നടത്തിയത്. വീടിന്റെ പിറക് വശത്തെ വാതിൽ പൊളിച്ചാണ് അകത്ത് കടന്നത്. മുകൾനിലയിലെ കിടപ്പുമുറിയിൽ അലമാരയിൽ സൂക്ഷിച്ച ജോണിന്റെ മരുമകളുടെ സ്വ൪ണമാണ് മോഷ്ടിക്കപ്പെട്ടത്. രാവിലെ വീട്ടുകാ൪ ഉറക്കമുണ൪ന്നപ്പോഴാണ് മോഷണവിവരം അറിഞ്ഞത്. മ്യൂസിയം പൊലീസ് സ്ഥലത്തെത്തി അന്വേഷണം ആരംഭിച്ചു.

കഴിഞ്ഞദിവസം പേരൂ൪ക്കട മുട്ടടയിൽ മാങ്കുളം ക്ഷേത്രത്തിന് സമീപം വേണുഗോപാലൻ നായരുടെ വീട്ടിൽ നടന്ന ലക്ഷങ്ങളുടെ കവ൪ച്ചയുടെ ഞെട്ടൽ മാറും മുൻപാണ് വീണ്ടും മോഷണം നടന്നത്. മുട്ടടയിലെ കവ൪ച്ച നടത്തിയത് അന്താരാഷ്ട്ര മോഷ്ടാവ് ബണ്ടി ചോ൪ ആണെന്ന് പൊലീസ് ഇന്നലെ സ്ഥിരീകരിച്ചിരുന്നു. ഒരു ആഡംബര കാ൪ ഉൾപ്പെടെ 30 ലക്ഷം രൂപയുടെ കവ൪ച്ചയാണ് ഇവിടെ നടന്നത്.