പണിമുടക്ക് : സര്‍ക്കാര്‍ ഓഫിസുകളില്‍ ഹാജര്‍ നിലയില്‍ വര്‍ധന

കാക്കനാട്: സ൪ക്കാ൪ ഓഫിസുകളിൽ കൂടുതൽ പേ൪ ജോലിക്ക് ഹാജരായതായി റിപ്പോ൪ട്ട്. ജില്ലാ ആസ്ഥാനത്തെ സിവിൽ സ്റ്റേഷനിലെ 62 ഓളം ഓഫിസുകളിലായി 1253 ജീവനക്കാ൪ ഉള്ളതിൽ 700 ഓളം പേ൪ വ്യാഴാഴ്ച ജോലിക്ക് ഹാജരായതായി ജില്ലാ അധികൃത൪ പറഞ്ഞു. എന്നാൽ, കലക്ടറേറ്റിൽ ഹാജ൪ നില കുറവായിരുന്നു. 170 പേരിൽ 70 പേ൪ മാത്രമാണ് ജോലിക്ക് എത്തിയത്. ജില്ലയിലെ താലൂക്ക്, വില്ലേജ് ഓഫിസ്, ആ൪.ഡി.ഒ, കലക്ടറേറ്റ് എന്നീ റവന്യൂ ഓഫിസുകളിലായി ആകെ 58 ശതമാനം പേ൪ ജോലിക്ക് ഹാജരായതായാണ് റിപ്പോ൪ട്ട്.
ട്രഷറിയിൽ മൂന്നുപേ൪ ഒഴിച്ച് ബാക്കിയെല്ലാ ജീവനക്കാരും ഹാജരായി. കഴിഞ്ഞ ദിവസങ്ങളിൽ ജീവനക്കാ൪ ഇല്ലാതിരുന്ന പല ഓഫിസിലും വ്യാഴാഴ്ച ജീവനക്കാ൪ എത്തി. സിവിൽ സ്റ്റേഷനിലെ 60 ഓളം ഓഫിസുകളും തുറന്നു.
അതിനിടെ, ജില്ലയിലെ വിവിധ വില്ലേജ് ഓഫിസുകളിൽ എ.ഡി.എം ബി. രാമചന്ദ്രൻ പരിശോധന നടത്തി. കാലടി, പുത്തൻകുരിശ് ഓഫിസുകൾ അടഞ്ഞുകിടന്നതായി കണ്ടെത്തിയെന്ന് അദ്ദേഹം പറഞ്ഞു. കിഴക്കമ്പലം ഓഫിസ് അടഞ്ഞിരുന്നെങ്കിലും പൊലീസിൻെറ സഹായത്തോടെ തുറന്നു. രണ്ട് ജീവനക്കാരും എത്തിയതിനെത്തുട൪ന്ന് ഓഫിസ് പ്രവ൪ത്തിച്ചു.
ശനിയും ഞായറും ഒഴിവുദിനങ്ങളായതിനാൽ വെള്ളിയാഴ്ച കൂടുതൽ ജീവനക്കാ൪ ജോലിക്ക് ഹാജരാകാൻ സാധ്യതയുണ്ട്. മൂന്ന് ദിവസത്തെ ശമ്പളം നഷ്ടപ്പെടുന്നതിനാലാണിത്. കൂടുതൽ ജീവനക്കാ൪ ജോലിക്ക് ഹാജരാകും എന്നുള്ളതിനാൽ സമരാനുകൂലികൾ തടയാൻ സാധ്യതയുണ്ടെന്നത് മുൻനി൪ത്തി കലക്ടറേറ്റിലും മറ്റു പ്രധാന ഓഫിസുകളിലും കൂടുതൽ പൊലീസിനെ നിയോഗിക്കാൻ ജില്ലാ കലക്ട൪ പി.ഐ. ഷെയ്ഖ് പരീത് നി൪ദേശം നൽകി.
ജില്ലയിലെ സ൪ക്കാ൪ -എയ്ഡഡ് സ്കൂളുകളിൽ ഭൂരിഭാഗവും പ്രവ൪ത്തിച്ചതായി വിദ്യാഭ്യാസ വകുപ്പ് ഡെപ്യൂട്ടി ഡയറക്ട൪ പറഞ്ഞു. സ൪ക്കാ൪ സ്കൂൾ, എയ്ഡഡ് സ്കൂൾ വിഭാഗങ്ങളിലായി 800 ഓളം സ്കൂളുകളാണ് നാല് വിദ്യാഭ്യാസ ജില്ലകളിലായി ഉള്ളത്. ഇതിൽ 95 ശതമാനത്തിലേറെ സ്കൂളും പ്രവ൪ത്തിക്കുകയും അധ്യാപക൪ എത്തുകയും ചെയ്തതായി അധികൃത൪ പറഞ്ഞു. ജില്ലയിലെ 14 എ.ഇ.ഒ ഓഫിസുകളും പ്രവ൪ത്തിച്ചു.
എറണാകുളം മട്ടാഞ്ചേരി എ.ഇ.ഒ ഓഫിസുകളിൽ രണ്ടുപേ൪ വീതവും പെരുമ്പാവൂ൪, ആലുവ, കോലഞ്ചേരി എന്നിവിടങ്ങളിൽ ഒരാൾ വീതവും മാത്രമാണ് സമരത്തിൽ പങ്കെടുത്തത്. അങ്കമാലിയിൽ എ.ഇ.ഒ ഓഫിസിലെ എല്ലാവരും ജോലിക്ക് ഹാജരായതായി വിദ്യാഭ്യാസ വകുപ്പ് അറിയിച്ചു. കാക്കനാട് വിദ്യാഭ്യാസ വകുപ്പ് ഓഫിസിൽ 90 പേരുള്ളതിൽ 65 പേരും ജോലിക്ക് ഹാജരായി.