മാപ്പിളപ്പാട്ടിന്‍െറ മൊഞ്ചില്‍ സ്ഥാനാര്‍ഥികളിറങ്ങി

കാഞ്ഞങ്ങാട്: എല്ലാ തെരഞ്ഞെടുപ്പുകാലത്തെയും പോലെ ഇക്കുറിയും മാപ്പിളപ്പാട്ടിന്‍െറ ഈണത്തില്‍ പ്രചാരണഗാനമൊരുക്കി സ്ഥാനാര്‍ഥികള്‍ പ്രയാണമാരംഭിച്ചു. മുസ്ലിംലീഗ് സ്ഥാനാര്‍ഥികള്‍ക്കാണ് പ്രധാനമായും മാപ്പിളപ്പാട്ടിന്‍െറ ഇമ്പമാര്‍ന്ന ഈണത്തിലുള്ള പ്രചാരണഗാനങ്ങള്‍ തയാറായിട്ടുള്ളത്.

അജാനൂര്‍ പഞ്ചായത്തിലെയും കാഞ്ഞങ്ങാട് നഗരസഭയിലെയും ലീഗ് സ്ഥാനാര്‍ഥികളുടെ പ്രചാരണവാഹനത്തോടൊപ്പമാണ് മാപ്പിളപ്പാട്ട് പ്രചാരണവും കൊഴുക്കുന്നത്.  കോഴിക്കോട് സ്വദേശികളായ ഗഫൂര്‍, അസീസ് തായിനേരി തുടങ്ങിയവരാണ്  ഭൂരിപക്ഷം സ്ഥാനാര്‍ഥികള്‍ക്കുമുള്ള പ്രചാരണഗാനം തയാറാക്കിയിരിക്കുന്നത്.

പഞ്ചായത്തുകളിലെയും നഗരസഭകളിലെയും വികസന പ്രവര്‍ത്തനങ്ങളും എതിര്‍ പാര്‍ട്ടികളുടെ കഴിവില്ലായ്മയും ചൂണ്ടിക്കാട്ടുന്ന വരികള്‍ ഉള്‍പ്പെടുത്തിയാണ് പല തെരഞ്ഞെടുപ്പ് ഗാനങ്ങളും ചിട്ടപ്പെടുത്തിയിട്ടുള്ളത്. ഇത്തരം ഗാനങ്ങള്‍ പ്രചാരണ വാഹനത്തോടൊപ്പം ‘നാട്ടിലാകെ പാട്ടായി’. മികച്ച തെരഞ്ഞെടുപ്പു പാട്ടുകള്‍ വാട്സ് ആപിലും വൈറലായിട്ടുണ്ട്.