പ്രചാരണമായാല്‍ ദാ ഇങ്ങനെ വേണം..

ഇരിങ്ങാലക്കുട: ഈ സ്ഥാനാര്‍ഥിക്ക് വാഗ്ദാനങ്ങളൊന്നുമില്ല. എല്ലാം പ്രവൃത്തിയില്‍ മാത്രം. അതുകൊണ്ടാണ് മുരിയാട് പഞ്ചായത്ത് ഊരകം ഈസ്റ്റ് 10ാം വാര്‍ഡില്‍ എല്‍.ഡി.എഫ് സ്വതന്ത്ര സ്ഥാനാര്‍ഥി റിസ നിക്സണ്‍ പ്രചാരണം വേറിട്ടതാക്കിയത്. ഞായറാഴ്ച ചേര്‍ന്ന തെരഞ്ഞെടുപ്പ് കണ്‍വെന്‍ഷന് ശേഷം ഊരകം താര മഹിള സമാജം റോഡ് ശുചീകരിച്ചാണ് തെരഞ്ഞെടുപ്പ് പ്രചാരണം ആരംഭിച്ചത്.

റോഡിലെ കുഴികള്‍ നികത്തിയും കാനകള്‍ വെടിപ്പാക്കിയും റോഡരികിലെ പുല്ല് വെട്ടിയുമാണ് റിസയും പ്രവര്‍ത്തകരും ശുചീകരണ പ്രവര്‍ത്തനം നടത്തിയത്. തെരഞ്ഞെടുപ്പ് കമ്മിറ്റി രക്ഷാധികാരി മിനി വരിക്കശേരി ഉദ്ഘാടനം ചെയ്തു. സ്ത്രീകള്‍ അടക്കം നൂറില്‍ പരം ആളുകള്‍ ശുചീകരണ പ്രവര്‍ത്തനത്തില്‍ പങ്കാളികളായി.