റോഡ് നന്നാക്കിയില്ല; ഗുണഭോക്താക്കള്‍ തെരഞ്ഞെടുപ്പ് ബഹിഷ്കരണത്തിന്

നരിക്കുനി: ഗ്രാമപഞ്ചായത്തിലെ രണ്ട്, മൂന്ന്, നാല് വാര്‍ഡുകളിലൂടെ കടന്നുപോകുന്ന പൂളക്കാപറമ്പ്^പന്തലുകുന്നുമ്മല്‍ റോഡ് ഗതാഗതയോഗ്യമാക്കാത്തതില്‍ പ്രതിഷേധിച്ച് നാട്ടുകാര്‍ തെരഞ്ഞെടുപ്പ് ബഹിഷ്കരണത്തിനൊരുങ്ങുന്നു. ഒരു കിലോമീറ്റര്‍ റോഡിന് 25 വര്‍ഷത്തെ പഴക്കമുണ്ട്. ഭാഗികമായി ടാര്‍ ചെയ്തെങ്കിലും ബാക്കിഭാഗത്ത് കാല്‍നടപോലും ദുസ്സഹമാണ്. ഓട്ടോ ടാക്സി വാഹനങ്ങള്‍ സര്‍വിസ് നടത്താന്‍ തയാറാവുന്നില്ല. തെരഞ്ഞെടുപ്പ് ബഹിഷ്കരണമുള്‍പ്പെടെയുള്ള സമരപരിപാടികളുമായി മുന്നോട്ടുപോകാന്‍ ഗുണഭോക്താക്കളുടെ യോഗം തീരുമാനിച്ചു. ടി.പി. അബൂബക്കര്‍ മുസ്ലിയാര്‍ അധ്യക്ഷത വഹിച്ചു. കെ.കെ. അബ്ദുല്ല, ടി.പി. ബാലന്‍, വിനോദ് എന്നിവര്‍ സംസാരിച്ചു.