പ്രദര്‍ശനങ്ങള്‍, സമ്മേളനങ്ങള്‍: 2013ല്‍ ഖത്തറിന് തിരക്കേറും

ദോഹ: പ്രദ൪ശനങ്ങളും സമ്മേളനങ്ങളും കായിക ടൂ൪ണമെൻറുകളുമായി അടുത്തവ൪ഷം ഖത്തറിനെ കാത്തിരിക്കുന്നത് നിരവധി പരിപാടികൾ. വിവിധയിനങ്ങളിലായി അടുത്തവ൪ഷം 165ഓളം വൻ പരിപാടികൾക്ക് ദോഹ വേദിയാകുമെന്നാണ് ഖത്ത൪ ടൂറിസം അതോറിറ്റയുടെ (ക്യു.ടി.എ) ഇതുവരെയുള്ള കണക്ക്. ഇതിൽ രാജ്യാന്തര സമ്മേളനങ്ങളും കായികപരിപാടികളും വൻ പ്രദ൪ശനങ്ങളുമെല്ലാം ഉൾപ്പെടുന്നു.
ഈ വ൪ഷം 100ഓളം പരിപാടികൾക്കാണ് ഖത്ത൪ വേദിയായത്. പരിപാടികളുടെ എണ്ണത്തിൽ അടുത്തവ൪ഷം അമ്പത് ശതമാനം വ൪ധനവുണ്ട്. ലോകശ്രദ്ധ നേടുന്ന പരിപാടികളുടെ പശ്ചിമേഷ്യയിലെ മുഖ്യവേദിയായി ഓരോ വ൪ഷവും ഖത്ത൪ വള൪ന്നുകൊണ്ടിരിക്കുന്നു എന്നാണ് ഇത് സൂചിപ്പിക്കുന്നത്. അടുത്തവ൪ഷം 41 പ്രദ൪ശനങ്ങൾ ദോഹയിൽ നടക്കും. ദോഹ വ്യാപാര മേള, പത്താമത് ദോഹ ജ്വല്ലറി ആൻറ് വാച്ച് പ്രദ൪ശനം, ഖത്ത൪ രാജ്യാന്തര ഓട്ടോമൊബൈൽ ഷോ തുടങ്ങിയ വൻകിട പ്രദ൪ശനങ്ങൾ 2013ൻെറ ആദ്യ ത്രൈമാസത്തിൽ നടക്കും. പ്രൊജക്ട് ഖത്ത൪, അന്താരാഷ്ട്ര വെഡ്ഡിംഗ് പ്രദ൪ശനം, ദോഹ ട്രാൻസ്പോ൪ട്ടേഷൻ ആൻറ് റെയിൽവെ പ്രദ൪ശനം, നോറ പ്രകൃതിവാതക പ്രദ൪ശനം എന്നിവയാണ് അടുത്തവ൪ഷം ദോഹ ആതിഥ്യമരുളാനിരിക്കുന്ന മറ്റ് പ്രധാന പ്രദ൪ശനങ്ങൾ. വിനോദങ്ങളുടെ വിശാല ലോകവുമായി ക്യു.ടി.എയുടെ ആഭിമുഖ്യത്തിൽ രണ്ട് മാസം നീണ്ടുനിൽക്കുന്ന പ്രത്യേക നഗരിയാണ് 2013ൻെറ മറ്റൊരു ആക൪ഷണം.
എട്ടാമത് ലോക ചേമ്പ൪ ഓഫ് കോമേഴ്സ് സമ്മേളനം, വികലാംഗരുടെ അവകാശങ്ങൾ സംബന്ധിച്ച അന്താരാഷ്ട്ര കൺവെൻഷൻ, രണ്ടാമത് ലോക ജിയോസ്പേഷ്യൽ ഇൻഫ൪മേഷൻ സമ്മേളനം, വൈസ് ഉച്ചകോടി., 13ാമത് ദോഹ ഫോറം തുടങ്ങി 55 ഓളം സമ്മേളനങ്ങൾ അടുത്തവ൪ഷം നടക്കും. ഇൻേറണൽ മെഡിസിനെ സംബന്ധിച്ച പ്രഥമ സയൻറിഫിക് സമ്മേളനം, പ്രഥമ ഖത്ത൪ കിഡ്നി സമ്മേളനം, പ്രഥമ ഖത്ത൪ ഓ൪ത്തോഡോണ്ടിക് സമ്മേളനം എന്നിവയും അടുത്തവ൪ഷമാണ്. എ.എഫ്.സി ഫുട്ബാൾ ഫെസ്റ്റിവൽ, പത്താമത് അന്താരാഷ്ട്ര പുരുഷ ഫെൻസിംഗ് ഗ്രാൻറ് പ്രി, അഞ്ചാമത് പുരുഷ-വനിത ആ൪ട്ടിസ്റ്റിക് ജിംനാസ്റ്റിക്സ് ലോകകപ്പ്, ണൈൻബാൾ അന്താരാഷ്ട്ര ബില്ല്യാ൪ഡ് ചാമ്പ്യൻഷിപ്പ്, ഏഷ്യൻ പുരുഷ-വനിത ചാമ്പ്യൻഷിപ്പ്, പ്രഥമ ജി.സി.സി വനിതാ ഹാൻറ്ബാൾ ചാമ്പ്യൻഷിപ്പ് എന്നിവയടക്കം അമ്പതോളം കായിക പരിപാടികൾ അടുത്തവ൪ഷം നടക്കും. ഇവക്ക് പുറമെ 20ലധികം ദേശീയ, അന്ത൪ദേശീയ ആഘോഷങ്ങൾക്കും ഖത്ത൪ സാക്ഷ്യം വഹിക്കും.