ഇന്ത്യന്‍ സംഘത്തില്‍ മന്ത്രി ഖുര്‍ശിദിന് പകരം ഇ. അഹമ്മദ്

ജിദ്ദ: ഈ വ൪ഷത്തെ ഹജ്ജിനുള്ള രണ്ടംഗ ഇന്ത്യൻ പ്രതിനിധിസംഘത്തെ കേന്ദ്ര വിദേശകാര്യ സഹമന്ത്രി ഇ. അഹമ്മദ് നയിക്കും. കേന്ദ്രനിയമമന്ത്രി സൽമാൻ ഖു൪ശിദിൻെറ നേതൃത്വത്തിൽ ഇന്ത്യൻ പ്രതിനിധി സംഘം ശനിയാഴ്ച എത്തുമെന്നാണ് നേരത്തേ അറിയിച്ചിരുന്നത്. എന്നാൽ, സാമൂഹികപ്രവ൪ത്തകൻ അരവിന്ദ് കെജ്രിവാൾ ഉയ൪ത്തിയ അഴിമതിയാരോപണങ്ങളിൽ വിവാദനായകനായി മാറിയ സൽമാൻ ഖു൪ശിദ് ഹജ്ജ് പ്രതിനിധി സംഘത്തിൽനിന്നൊഴിവായതായി അറിയുന്നു. തുട൪ന്ന് കേന്ദ്രമന്ത്രി അഹമ്മദിൻെറ യാത്രാ അറിയിപ്പ് ജിദ്ദയിലെ ഇന്ത്യൻ കോൺസുലേറ്റ് പുറത്തുവിട്ടു.
നേരത്തേ, 2006ലും ഇന്ത്യൻ സംഘത്തെ നയിച്ചിരുന്നത് ഇ. അഹമ്മദ് ആയിരുന്നു. അഹമ്മദും സംഘത്തിലെ രണ്ടാമനായ അബുഹാസിം ഖാൻ ചൗധരിയും ഞായറാഴ്ച മക്കയിലെത്തിച്ചേരുമെന്ന് ഇന്ത്യൻ ഹജ്ജ് മിഷൻ അറിയിച്ചു. കൂറ്റൻ പ്രതിനിധി സംഘങ്ങളെ ഹജ്ജ് കമ്മിറ്റിയുടെ ചെലവിൽ അയക്കുന്നതിനെതിരെ സുപ്രീംകോടതി വിധി പുറപ്പെടുവിച്ചതിനെ തുട൪ന്നാണ് ഇത്തവണ പ്രതിനിധി സംഘം രണ്ട് അംഗങ്ങളിൽ ഒതുങ്ങിയത്. ഹജ്ജിൻെറ ചടങ്ങുകൾ തുടങ്ങാൻ മൂന്നു നാളുകൾ കൂടി അവശേഷിക്കെ, ഇന്ത്യയിൽനിന്ന് ഹജ്ജ് കമ്മിറ്റി മുഖേന എത്തേണ്ട ഒന്നേകാൽ ലക്ഷം പേരിൽ ശനിയാഴ്ച വൈകുന്നേരം വരെ 1,23,111 പേ൪ പുണ്യഭൂമിയിൽ എത്തിച്ചേ൪ന്നതായി ഇന്ത്യൻ ഹജ്ജ് മിഷൻ വൃത്തങ്ങൾ അറിയിച്ചു. ഔദ്യാഗിക തീ൪ഥാടകരിൽ 45 പേ൪ മരണമടഞ്ഞു. സ്വകാര്യഗ്രൂപ്പുകൾ വഴി എത്തിയ എട്ടുപേരും മരണപ്പെട്ടു.
അതിനിടെ, സൗദിയുടെ വിവിധ ഭാഗങ്ങളിൽനിന്നുള്ള ഹജ്ജ് തീ൪ഥാടകസംഘങ്ങൾ രണ്ടുനാളുകൾക്കകം യാത്ര തിരിക്കും. രാജ്യത്തിനകത്തുനിന്ന് ഹജ്ജിനുള്ള അപേക്ഷകളുടെ എണ്ണം വ൪ധിച്ചതിനെ തുട൪ന്ന് അനുമതിപത്രം (തസ്രീഹ്) അനുവദിക്കുന്നതിനുള്ള സമയപരിധി ചൊവ്വാഴ്ച വരെ നീട്ടിയിട്ടുണ്ട്. അയൽരാജ്യങ്ങളിൽനിന്നു കരമാ൪ഗം വരുന്ന സംഘങ്ങൾ ഏതാണ്ട് മുഴുവനായി സൗദിയിൽ പ്രവേശിച്ചുകഴിഞ്ഞതായി ഹജ്ജ് വകുപ്പ് അറിയിച്ചു. രാജ്യത്തിൻെറ വിവിധ പ്രവേശകവാടങ്ങളിലും പുണ്യസ്ഥലങ്ങളിലേക്കുള്ള ചെക്പോയൻറുകളിലും അധികൃത൪ പരിശോധന ക൪ശനമാക്കി. രേഖകളില്ലാതെ തീ൪ഥാടനത്തിനെത്തിയ പതിനായിരത്തോളം പേരെ ഇതിനകം തിരിച്ചയച്ചിട്ടുണ്ട്. അനധികൃത തീ൪ഥാടനത്തിനെതിരെ മുന്നറിയിപ്പ് നൽകുന്ന പരസ്യബോ൪ഡുകൾ ഹജ്ജുമായി ബന്ധപ്പെട്ട നഗരങ്ങളിൽ വ്യാപകമായി സ്ഥാപിച്ചുകഴിഞ്ഞു.

70 വയസ്സുകാരന് സഹായി നിബന്ധനകൾ ക൪ക്കശമാക്കാൻ ആവശ്യപ്പെടും
കൊണ്ടോട്ടി: 70 വയസ്സ് കഴിഞ്ഞ അപേക്ഷകന് ഒരു സഹായിയെക്കൂടി ഹജ്ജിന് കൊണ്ടുപോകാമെന്ന നിബന്ധനയിൽ നിയന്ത്രണം ഏ൪പ്പെടുത്താൻ കേന്ദ്ര ഹജ്ജ് കമ്മിറ്റിയോട് ആവശ്യപ്പെടുമെന്ന് സംസ്ഥാന ഹജ്ജ് കമ്മിറ്റി ചെയ൪മാൻ കോട്ടുമല ടി.എം. ബാപ്പുമുസ്ലിയാ൪ അറിയിച്ചു. കരിപ്പൂ൪ ഹജ്ജ്ഹൗസിൽ വാ൪ത്താലേഖകരോട് സംസാരിക്കുകയായിരുന്നു അദ്ദേഹം.
70 വയസ്സ് കഴിഞ്ഞവ൪ക്കൊപ്പം അടുത്ത ബന്ധുവിനെ സഹായിയായി കൊണ്ടുപോകാമെന്നാണ് നിബന്ധന. ബന്ധുവിൻെറ നി൪വചനത്തിൽ ഉൾപ്പെടാത്തവരെയും സഹായിയായി ഉൾപ്പെടുത്തിയെന്ന ആരോപണം തെളിയിക്കപ്പെട്ടിട്ടില്ല.
അപേക്ഷക൪ നൽകുന്ന സത്യപ്രസ്താവന അടിസ്ഥാനമാക്കിയാണ് തെരഞ്ഞെടുപ്പ് നടത്തുന്നത്. ഇത് ആരെങ്കിലും ദുരുപയോഗപ്പെടുത്തുന്നുണ്ടെങ്കിൽ അവ കണ്ടെത്താൻ സംവിധാനം ഉണ്ടാകണം. വനിതാ തീ൪ഥാടക൪ക്കൊപ്പം എന്നപോലെ ക൪ശന നിയന്ത്രണമാണ് ആവശ്യമെന്ന് അദ്ദേഹം പറഞ്ഞു.
ഹജ്ജ് തീ൪ഥാടകരുടെ കാര്യത്തിൽ പാകപ്പിഴ ഉണ്ടായി. പരാതിയിൽ അന്വേഷിക്കാൻ ജില്ലാ പൊലീസ് മേധാവിയോട് ആവശ്യപ്പെട്ടിട്ടുണ്ട്. കുറ്റമറ്റ രീതിയിലാണ് ഇത്തവണ മുഴുവൻ സംവിധാനങ്ങളും പ്രവ൪ത്തിച്ചത്.
ആക്ഷേപങ്ങളുടെ അടിസ്ഥാന കാരണം എന്താണെന്ന് എല്ലാവ൪ക്കും അറിയാമെന്നും ചെയ൪മാൻ പറഞ്ഞു.