ധൃതരാഷ്ട്രാലിംഗനം

ഇത്രയും നല്ലവനായ പേരക്കുട്ടിയെ ഇന്ത്യാചരിത്രം കണ്ടിട്ടുണ്ടാവില്ല. മുത്തച്ഛൻെറ ഓ൪മക്ക് ഇതിലും നല്ലൊരു സ്മാരകം തീ൪ക്കാൻ ആ൪ക്കുമാവതില്ല. ഡോ. സാക്കി൪ ഹുസൈൻെറ മിടുക്കനായ പേരക്കുട്ടിയാണ് താനെന്ന് തെളിയിച്ചിരിക്കുകയാണ് സൽമാൻ ഖു൪ശിദ്. മുത്തച്ഛൻ വലിയ മനുഷ്യനായിരുന്നു. ഇന്ത്യയുടെ രാഷ്ട്രപതിയായിരുന്നു. ഏറ്റവും കൂടുതൽ പേ൪ മത്സരിച്ചപ്പോൾ രാഷ്ട്രപതിയായ വ്യക്തി. 29ാം വയസ്സിൽ ജാമിഅ മില്ലിയ ഇസ്ലാമിക യൂനിവേഴ്സിറ്റി വൈസ് ചാൻസലറാകുകയും പിന്നീട് അലീഗഢ് മുസ്ലിം യൂനിവേഴ്സിറ്റിയുടെ വൈസ് ചാൻസലറാകുകയും ചെയ്ത വിദ്യാഭ്യാസ വിചക്ഷണൻ. പ്ളേറ്റോയുടെ ‘റിപ്പബ്ളിക്’ ഉ൪ദു ഭാഷയിലേക്ക് മൊഴിമാറ്റിയ പണ്ഡിതൻ. പരമോന്നത പൗരബഹുമതിയായ ‘ഭാരതരത്ന’ നൽകി രാഷ്ട്രം ആദരിച്ച വ്യക്തിത്വം. മഹാനായ മുത്തച്ഛനെ പേരക്കുട്ടി ആദരിക്കുന്നത് കണ്ടാൽ ആരുടെയും കണ്ണു നിറഞ്ഞുപോവും. കരളലിയിക്കുന്ന കാഴ്ചയാണത്.
മുത്തച്ഛൻെറ പേരിലൊരു ട്രസ്റ്റുണ്ട്. പേരക്കുട്ടി ഖു൪ശിദും ഭാര്യ ലൂയിയുമാണ് നടത്തിപ്പുകാ൪. ട്രസ്റ്റിൻെറ അധ്യക്ഷ മന്ത്രിപത്നി. മന്ത്രി വെറുമൊരു അംഗം. വികലാംഗരെ സേവിക്കുകയാണ് സന്നദ്ധസംഘടനയുടെ പാവനമായ ദൗത്യം. ഭാര്യ ട്രസ്റ്റിൻെറ പ്രോജക്ട് ഡയറക്ട൪ കൂടിയാണ്. ട്രസ്റ്റിൻെറ രജിസ്റ്റേ൪ഡ് വിലാസം ഖു൪ശിദിൻെറ വീട്ടുവിലാസം തന്നെ. നമ്പ൪ നാല്, ഗുൽമോഹ൪ അവന്യൂ, ജാമിഅ നഗ൪, ന്യൂദൽഹി. പല സംസ്ഥാനങ്ങളിലും ട്രസ്റ്റ് പ്രവ൪ത്തിക്കുന്നുണ്ട്. കേന്ദ്രസ൪ക്കാറിലാണ് ട്രസ്റ്റ് രജിസ്റ്റ൪ ചെയ്തിരിക്കുന്നത്. നടത്തിപ്പുകാ൪ ചില്ലറക്കാരല്ലാത്തതുകൊണ്ട് സാമ്പത്തിക സഹായത്തിന് മുട്ടുണ്ടാവില്ല. കാര്യം നല്ലതുതന്നെ. അശരണരായ വികലാംഗരെ സഹായിക്കുന്നതിലൂടെ സാക്കി൪ ഹുസൈൻെറ സ്മരണ പുലരുമെങ്കിൽ അത് വലിയ കാര്യം തന്നെ. അംഗവൈകല്യമുള്ളവ൪ക്ക് പ്രത്യേകം ക്യാമ്പുകൾ നടത്തി അവരുടെ ജീവിതം സുഗമമാക്കാനാവശ്യമായ ഉപകരണങ്ങൾ വാങ്ങിനൽകുന്നതും നല്ലതുതന്നെ. വേഗത്തിലോടുന്ന ലോകമാണ്. അൽപം പിന്നിലായിപ്പോയവരെ കൂടെ കൂട്ടുന്നത് പുണ്യം കിട്ടുന്ന പ്രവൃത്തിയാണ്. മുഖ്യ നടത്തിപ്പുകാരൻ ഖു൪ശിദ് കേന്ദ്രത്തിൽ നിയമം ഭരിച്ചുകൊണ്ടിരിക്കുകയാണല്ലോ. അതുകൊണ്ടുതന്നെ കേന്ദ്രത്തിൽനിന്ന് സാമ്പത്തിക സഹായം കിട്ടുക എന്നത് ആനക്കാര്യമൊന്നുമല്ല. ഒരു ഫോൺകോൾ, അല്ലെങ്കിൽ ചായക്കോപ്പക്കു മീതെ ഒരു സല്ലാപം. അത്രയൊക്കെ മതിയാവും. കേന്ദ്ര സാമൂഹികക്ഷേമ വികസനമന്ത്രാലയത്തിൽനിന്ന് 1.39 കോടി രൂപയുടെ ഗ്രാൻറ് തരപ്പെടുത്തിയത് അങ്ങനെയൊക്കെയാണ്. അതും നല്ല കാര്യം. അധികാരം കിട്ടുമ്പോഴല്ലേ ഇങ്ങനെയുള്ള പുണ്യപ്രവൃത്തികളൊക്കെ എളുപ്പത്തിൽ നടക്കുകയുള്ളൂ.
ഉത്ത൪പ്രദേശിലെ 17 ജില്ലകളിലെ വികലാംഗ൪ക്ക് ഉപകരണങ്ങൾ വാങ്ങാനെന്നു പറഞ്ഞാണ് ഗ്രാൻറ് തരപ്പെടുത്തിയത്. അതിൽ ഖു൪ശിദിൻെറ സ്വന്തം ജില്ലയായ ഫറൂഖാബാദും പെടും. സംഗതിയെപ്പറ്റിയറിഞ്ഞപ്പോൾ ഖു൪ശിദിൻെറ മഹാനായ മുത്തച്ഛൻെറ പാവനസ്മരണക്കു മുന്നിൽ ആ പാവങ്ങൾ വണങ്ങിയിരിക്കണം. ഇനിയാണ് കളി. സ൪ക്കാറിൻെറ സഹായധനത്തോടെ ക്യാമ്പ് നടത്തി വികലാംഗരെ സഹായിക്കാൻ ഒന്നും തന്നെ ചെയ്തിട്ടില്ല ഈ ട്രസ്റ്റ്. ജില്ലാ ഭരണകൂടത്തിൻെറ റിപ്പോ൪ട്ടിൽതന്നെയുണ്ട് അതിനുള്ള തെളിവ്. ജില്ലാ ചീഫ് മെഡിക്കൽ ഓഫിസറുടെയും തഹസിൽദാറുടെയും നിരീക്ഷണത്തിൽ ക്യാമ്പും വിതരണവും നടന്നതായി സ്ഥാപിക്കാൻ അവരുടെ വ്യാജ ഒപ്പും സീലും പതിച്ചു. 2009-2010ലേക്കുള്ള പദ്ധതിപ്രവ൪ത്തനം നടന്നതായുള്ള റിപ്പോ൪ട്ട് തയാറാക്കി സ൪ക്കാ൪ ഉദ്യോഗസ്ഥരുടെ ഒപ്പും സീലും വ്യാജമായി പതിച്ചു. 2011-12 വ൪ഷം 71.5 ലക്ഷം രൂപയാണ് സാമ്പത്തികസഹായം കിട്ടിയത്. അത് ആരുടെ പോക്കറ്റിലേക്കുപോയി എന്ന് അന്വേഷിച്ചാലേ മനസ്സിലാവൂ. ഏതായാലും, ഖു൪ശിദിൻെറ ചെലവിൽ കേൾവിസഹായിയും മുച്ചക്രവാഹനവുമൊക്കെ വാങ്ങിയവരാരും അന്നാട്ടിലില്ല. അ൪ഹരായവ൪ക്ക് സഹായം കിട്ടിയില്ലെന്ന പരാതി അന്നേ ഉയ൪ന്നിരുന്നു. ഇക്കാര്യം അന്വേഷിക്കാൻ കേന്ദ്ര സാമൂഹികക്ഷേമ മന്ത്രാലയം ഉത്ത൪പ്രദേശ് സ൪ക്കാറിനോട് ആവശ്യപ്പെട്ടതുമാണ്. കാര്യമായ അന്വേഷണമൊന്നും നടന്നില്ല. സ൪ക്കാ൪ രക്ഷപ്പെടുത്തിയെങ്കിലും മാധ്യമങ്ങളും കെജ്രിവാളും അടങ്ങിയിരുന്നില്ല. ആജ്തക് വാ൪ത്ത പൊട്ടിച്ചു. കെജ്രിവാൾ അത് ആഘോഷിച്ചു. ഇന്ത്യാ ടുഡേയുടെ ഹിന്ദി വാ൪ത്താചാനലായ ആജ്തക് ഒരു മാസമായി നടത്തിയ ‘ഓപറേഷൻ ധൃതരാഷ്ട്ര’ എന്ന ഒളികാമറ അന്വേഷണത്തിലാണ് പ്രശസ്തനായ പേരക്കുട്ടിയുടെ കളികൾ തെളിഞ്ഞിരിക്കുന്നത്. ആ ധൃതരാഷ്ട്രാലിംഗനത്തിൽ തക൪ന്നുതരിപ്പണമായിരിക്കുകയാണ് സൽമാൻ ഖു൪ശിദിൻെറ പ്രതിച്ഛായ.
നിയമമന്ത്രി നിയമം മറന്നുകളിച്ചുവെന്ന് കേൾക്കുമ്പോൾ ജനങ്ങളൊന്നു ഞെട്ടും. സ൪ക്കാ൪ഫണ്ട് വ്യാജരേഖ ചമച്ച് തട്ടിയെടുത്തത് നിയമത്തിൻെറ ഏതു വകുപ്പുപയോഗിച്ച് ന്യായീകരിക്കും എന്നാവും ഇപ്പോൾ ഖു൪ശിദ് ആലോചിക്കുന്നത്. 19ാം നൂറ്റാണ്ടിൽ വ്യക്തിസ്വാതന്ത്ര്യാധിഷ്ഠിത സമൂഹ സിദ്ധാന്തത്തിൻെറ പ്രചാരക൪ നൽകിയ നി൪വചനമനുസരിച്ച് ഓരോരുത്തരുടെയും അവകാശങ്ങളുടെയും അരുതുകളുടെയും സമാഹാരമാണ് നിയമം. 20ാം നൂറ്റാണ്ടിൻെറ തുടക്കത്തിൽ അമേരിക്കൻ നിയമശാസ്ത്രകാരനായ റേസ്കോ പൗണ്ട് സാമൂഹിക പുന൪നി൪മാണത്തിനുള്ള ഒരു ഉപകരണമാണ് നിയമമെന്ന് നി൪വചിച്ചു. ഇന്നത്തെ സമൂഹത്തെ ഗുണപരമായി മാറ്റിത്തീ൪ക്കാൻ ഉപയോഗിക്കാവുന്ന ഒരു ആയുധമാണ് നിയമം എന്ന പ്രായോഗിക സമീപനമാണ് അദ്ദേഹം അവതരിപ്പിച്ചത്. ചുരുക്കത്തിൽ, പരിമിതവും സങ്കുചിതവുമായ തലത്തിൽ നിയതവും നിശ്ചിതവുമായ ചട്ടവ്യവസ്ഥയോ തത്ത്വമോ വിധിയോ ആണിത്. എന്നാൽ, വിശാലവും വിപുലവുമായ തലത്തിൽ ധാ൪മികവും ഭൗതികവും ജൈവികവുമായ ഏതൊരു തത്ത്വവും പ്രമാണവും സമവാക്യവും നിയമം എന്ന് ഗണിക്കപ്പെടും. ഇപ്പറഞ്ഞതൊക്കെ നമ്മുടെ നിയമമന്ത്രിക്ക് അറിയാവുന്ന കാര്യങ്ങളാണോ എന്നറിയില്ല. ഭരണഘടനയിലും പീനൽ കോഡിലുമൊക്കെ കാണുന്ന യാന്ത്രികമായ അതി൪ത്തിരേഖകൾ മാത്രമല്ല നിയമം എന്ന് ആരാണ് ഖു൪ശിദിനെ പഠിപ്പിക്കുക? അതിൽ അൽപം ധാ൪മികമായ കാര്യങ്ങളും ഉൾച്ചേ൪ന്നിട്ടില്ലേ. വികലാംഗരുടെ നേരെയുള്ള കാരുണ്യത്തിൻെറ പേരു പറഞ്ഞ് പണം പറ്റുന്നതും അത് അ൪ഹരായവ൪ക്ക് നൽകാതിരിക്കുന്നതും ലളിതവത്കരിക്കാവുന്ന വെറുമൊരു തട്ടിപ്പല്ല. വെറുമൊരു നിയമലംഘനമായി അതിനെ സാമാന്യവത്കരിച്ചു കാണുന്നതും ശരിയല്ല. അവിടെയാണ് നിയമമന്ത്രി പ്രതിക്കൂട്ടിലാവുന്നത്. കേവലം 70 ലക്ഷം മാത്രമല്ല പ്രശ്നമെന്ന൪ഥം.
മേനക ഗാന്ധി കഴിഞ്ഞാൽ അറിയപ്പെടുന്ന മൃഗസ്നേഹിയാണ്. അരുമയായി വള൪ത്തുന്ന പക്ഷികളെയും മുയലുകളെയും പശുക്കളെയും പൂച്ചകളെയും ദൽഹിവസതിയിൽ കാണാം. എന്നിട്ടും പാവങ്ങളായ വികലാംഗരെ മാത്രം സ്നേഹിക്കാൻ കഴിയാത്തതെന്തേ എന്നു ചോദിക്കരുത്. മനുഷ്യൻ മൃഗമാവുന്നതുകൊണ്ടാണോ എന്ന് ചോദിക്കുന്നത് മൃഗവിരുദ്ധമായ പ്രസ്താവനയായിപ്പോവും. മനുഷ്യരേക്കാൾ പാവങ്ങളാണ് മൃഗങ്ങൾ. അങ്ങോട്ട് ഉപദ്രവിച്ചാലേ അവ തിരിച്ചടിക്കൂ.
നാടകകാരനായതുകൊണ്ട് ഇതുമൊരു നാടകം എന്നു പറയുന്നവരും കുറവല്ല. ദൽഹിയിലും ഓക്സ്ഫഡിലും പഠിക്കുന്ന കാലം മുതൽ നാടകം കളിക്കുന്നുണ്ട്. അവസാനം എഴുതിയ നാടകം ‘ബാബറിൻെറ മക്കൾ’. ചെങ്കോട്ടയിൽ വരെ കളിച്ചതാണ്. ബാബരി മസ്ജിദിൻെറ തക൪ച്ചക്കുശേഷമുള്ള അശാന്തമായ ദിനങ്ങളിൽ ബഹദൂ൪ഷാ സഫറുമായി സാങ്കൽപിക സംഭാഷണത്തിലേ൪പ്പെടുന്ന യുവാവിലൂടെ ഇന്ത്യയുടെ രാഷ്ട്രീയ പരിണാമം വരച്ചിടുന്ന നാടകമാണിത്. ഇടക്കിടെ രാഷ്ട്രീയത്തിൽ നാടകം കളിക്കുന്ന പതിവുണ്ട്. നിയമം ഭരിക്കുന്ന കൂട്ടത്തിൽ ന്യൂനപക്ഷങ്ങളുടെ കാര്യംകൂടി നോക്കുന്നയാളാണ്. ഫറൂഖാബാദിൽ ഭാര്യയെ എങ്ങനെയെങ്കിലുമൊന്ന് ജയിപ്പിച്ചെടുക്കാൻ മുസ്ലിം സംവരണകാ൪ഡ് ഇറക്കി ഒരു നാടകം കളിച്ചു. ന്യൂനപക്ഷ സംവരണത്തിൽ മുസ്ലിംകൾക്ക് ഉപസംവരണം അനുവദിക്കും എന്ന് പ്രഖ്യാപിച്ചു. അപ്പോഴേക്കും വില്ലൻ വന്നു- തെരഞ്ഞെടുപ്പ് കമീഷൻ. വില്ലൻ നന്നായി ശാസിച്ചു. പെരുമാറ്റച്ചട്ടം ലംഘിച്ചു എന്ന് കുറ്റം. ഒടുക്കം നായകൻ ദുരന്തകഥാപാത്രമായി. ഭരണഘടനാ സ്ഥാപനത്തെ വെല്ലുവിളിക്കുന്നവിധം സംസാരിച്ചതിന് കോൺഗ്രസ് സൽമാനെ തള്ളിപ്പറഞ്ഞു. ഉറ്റവരും ഉടയോരും തള്ളിപ്പറഞ്ഞ് കുടുംബത്തിൽ ഒറ്റപ്പെട്ട അന്നത്തെ ആ കൈ്ളമാക്സ് തന്നെയാണോ ഈ നാടകത്തിനും എന്ന് കാത്തിരുന്നുകാണാം.