ദുരന്തഭൂമിയില്‍ സാന്ത്വനമായി ജനനേതാക്കള്‍

കണ്ണൂ൪: അഗ്നിനാളങ്ങൾ ജീവൻ കവ൪ന്ന ചാലയിലെ ദുരന്ത ഭൂമിയിൽ സാന്ത്വനവുമായി ഇടതുപക്ഷ നേതാക്കളെത്തി. പ്രിയപ്പെട്ടവരുടെ വേ൪പാടിൽ മനംനൊന്തു വിലപിക്കുന്നവരെ ആശ്വസിപ്പിക്കാൻ പ്രതിപക്ഷ നേതാവ് വി.എസ്. അച്യുതാനന്ദൻ, സി.പി.എം സംസ്ഥാന സെക്രട്ടറി പിണറായി വിജയൻ എന്നിവരുടെ നേതൃത്വത്തിലാണ് നേതാക്കൾ ചാലയിൽ എത്തിയത്.
രാവിലെ 9.45ഓടെ പിണറായി വിജയനാണ് ആദ്യമെത്തിയത്. പ്രതിപക്ഷ ഉപനേതാവ് കോടിയേരി ബാലകൃഷ്ണൻ, സി.പി.എം കേന്ദ്രകമ്മിറ്റി അംഗം പി.കെ. ശ്രീമതി ടീച്ച൪, കോൺഗ്രസ് എസ് സംസ്ഥാന പ്രസിഡന്റ് രാമചന്ദ്രൻ കടന്നപ്പള്ളി, കേരള കോൺഗ്രസ് ചെയ൪മാൻ പി.സി. തോമസ്, ടി.വി. രാജേഷ് എം.എൽ.എ എന്നിവ൪ കൂടെയുണ്ടായിരുന്നു. ഇവ൪ വീടുകൾ സന്ദ൪ശിക്കുന്നതിനിടെ 10.45ഓടെ പ്രതിപക്ഷനേതാവ് എത്തി.
വി.എസിനൊപ്പം സി.പി.ഐ ദേശീയ നി൪വാഹക സമിതി അംഗം സി. ദിവാകരൻ, ജനതാദൾ ദേശീയ നി൪വാഹക സമിതി അംഗം സി.കെ. നാണു എം.എൽ.എ, സി.പി.എം ജില്ലാ സെക്രട്ടറി പി. ജയരാജൻ എന്നിവരുണ്ടായിരുന്നു. ആദ്യം വേറെവേറെ വീടുകളായിരുന്നു സന്ദ൪ശിച്ചിരുന്നതെങ്കിലും പിന്നീട് വി.എസും പിണറായിയും ഒരുമിച്ച് വീടുകൾ കയറി. കൂട്ടമരണം നടന്ന ഡോക്ട൪ കൃഷ്ണന്റെ ദേവി നിവാസ്, വാഴയിൽ ഓമനയമ്മയുടെ ഭവനം, ചാല റംലാസ് എന്നിവിടങ്ങളിലെത്തി നേതാക്കൾ ബന്ധുക്കളെ ആശ്വസിപ്പിച്ചു.
കരഞ്ഞ് കണ്ണീ൪ വറ്റിയ ബന്ധുക്കളിൽ പലരും നേതാക്കളെ കണ്ടതോടെ വികാരഭരിതരായി. തക൪ന്നു കിടക്കുന്ന വീടുകളും സ്ഥാപനങ്ങളും നേതാക്കൾ സന്ദ൪ശിച്ചു. കെ.കെ. നാരായണൻ എം.എൽ.എ, എം.വി. ജയരാജൻ, എം. സുരേന്ദ്രൻ, കെ.കെ. രാഗേഷ്, സി.പി.ഐ ജില്ലാ സെക്രട്ടറി സി. രവീന്ദ്രൻ, എൻ.സി.പി നേതാക്കളായ കെ.എ. ഗംഗാധരൻ, ഹമീദ് ഇരിണാവ്, ആ൪.എസ്.പി ജില്ലാ സെക്രട്ടറി ഇല്ലിക്കൽ അഗസ്തി, എടക്കാട് പഞ്ചായത്ത് പ്രസിഡന്റ് കെ.വി. രവീന്ദ്രൻ എന്നിവരും ഒപ്പമുണ്ടായിരുന്നു.

അപകടം ദേശീയ ദുരന്തമായി കാണണം -പിണറായി

കണ്ണൂ൪: ചാല പാചകവാതക ടാങ്ക൪ ദുരന്തം ദേശീയ ദുരന്തമായി കാണണമെന്ന് സി.പി.എം സംസ്ഥാന സെക്രട്ടറി പിണറായി വിജയൻ. അപകടത്തിനിരയായവ൪ക്ക് വിമാനദുരന്തമുണ്ടായാൽ നൽകുന്ന നഷ്ടപരിഹാരം നൽകണമെന്നും സംസ്ഥാന സ൪ക്കാ൪ പ്രഖ്യാപിച്ച നഷ്ടപരിഹാര മാനദണ്ഡങ്ങൾ പൊളിച്ചെഴുതണമെന്നും കണ്ണൂരിൽ വാ൪ത്താസമ്മേളനത്തിൽ അദ്ദേഹം ആവശ്യപ്പെട്ടു.
സംസ്ഥാന സ൪ക്കാ൪, പ്രധാനമന്ത്രിയുടെ ദുരന്തനിവാരണ കാര്യാലയം, ഐ.ഒ.സി എന്നിവയാണ് നഷ്ടപരിഹാരം ലഭ്യമാക്കേണ്ടത്. ഇത് സംസ്ഥാനത്തെ ഏറ്റവും വലിയ ദുരന്തമായി കരുതണം. മരിച്ച വ്യക്തിയെ അടിസ്ഥാനമാക്കിയാവണം നഷ്ടപരിഹാരം. സംസ്ഥാന സ൪ക്കാ൪ ഒരു കുടുംബ്ധിന് പ്രഖ്യാപിച്ചതിന്റെ മൂന്നിരട്ടി ഓരോ വ്യക്തിക്കും നൽകണം. ഇരകൾ, ആശ്രിത൪ എന്നിവ൪ക്കും ന്യായമായ നഷ്ടപരിഹാരം ലഭ്യമാക്കണം. മരിച്ചവരുടെ കുടുംബ്ധിൽ ഒരാൾക്ക് സ൪ക്കാ൪ ജോലി നൽകണം. പരിക്കേറ്റവരിൽ മിക്കവരും ഭാവിയിൽ ജോലി ചെയ്യാൻ കഴിയാത്തവരാണ്. അവ൪ക്കും മരിച്ചവ൪ക്ക് നൽകുന്ന അതേ സഹായം ലഭ്യമാക്കണം. ഇവരിൽ അ൪ഹതപ്പെട്ടവ൪ക്ക് ജോലി നൽകാനും സ൪ക്കാ൪ തയാറാകണം.
തക൪ന്ന വീട്, കട, സാധനങ്ങൾ എന്നിവക്ക് സംഭവിച്ച നഷ്ടം നൽകണം. തക൪ന്ന വീടുകളടക്കമുള്ള കെട്ടിടങ്ങൾ പുതുക്കിപ്പണിയാൻ സ൪ക്കാ൪ തയാറാകണം. അല്ലെങ്കിൽ ആവശ്യമായ തുക നൽകണം. വിലപിടിപ്പുള്ള സാധനങ്ങളുടെ പ്രത്യേക കണക്കെടുത്താവണം നഷ്ടപരിഹാരം ലഭ്യമാക്കേണ്ടതെന്ന് അദ്ദേഹം പറഞ്ഞു.
റോഡിന്റെ സുരക്ഷ, ഡിവൈഡ൪, ടാങ്ക൪ എന്നിവയെകുറിച്ച കാര്യങ്ങൾ സമഗ്രമായി അന്വേഷിക്കണം. മാരകമായി പൊള്ളലേറ്റവരുടെ ചികിത്സക്കുള്ള പ്രത്യേക സംവിധാനം ഒരുക്കുകയും വിദഗ്ധ സംഘത്തിന്റെ പോരായ്മക്ക് പരിഹാരമുണ്ടാക്കുകയുമാണ് ഉടൻ ചെയ്യേണ്ടതെന്ന് പിണറായി പറഞ്ഞു.
ദുരന്തമുണ്ടായാൽ മാത്രം സുരക്ഷയെപ്പറ്റി ചിന്തിക്കുന്ന പ്രവണതയാണ് നമുക്ക്. വേണ്ടത്ര സുരക്ഷാ നടപടികൾ സ്വീകരിക്കുന്നില്ല. മുൻകരുതൽ നടപടികളാണ് വേണ്ടത്. ഗ്യാസ് കൊണ്ടുപോകുന്നതുമായി ബന്ധപ്പെട്ട് നേരത്തേ പല നി൪ദേശങ്ങളുമുണ്ടായിട്ടും നടപടി സ്വീകരിച്ചില്ല. നമ്മുടെ റോഡുകളുടെ ശോച്യാവസ്ഥയും ദുരന്തങ്ങൾക്ക് കാരണമാവുകയാണ്. ദേശീയപാതക്ക് അതിന്റേതായ മാനദണ്ഡങ്ങൾ ഉണ്ടെങ്കിലും അത് പാലിക്കപ്പെടുന്നില്ല. മിക്ക റോഡുകളുടെയും സ്ഥിതി ദയനീയമാണ്. അപകടങ്ങൾ നേരത്തേ ഉണ്ടാകാതിരുന്നത് നമ്മുടെ ഭാഗ്യമായി കാണണം. മിക്ക റോഡുകളിലും ഡിവൈഡറിൽ റിഫ്ളക്ട൪ സംവിധാനം അപൂ൪വമാണ്. പ്രഖ്യാപിച്ച ബൈപാസുകളിൽ ഒന്നുപോലും പ്രാവ൪ത്തികമാക്കാനാകാത്തത് കുറ്റകരമായ അനാസ്ഥയാണ്. ദേശീയപാത അതോറിറ്റി പണം അനുവദിക്കുന്നതിൽ തികഞ്ഞ നിരുത്തരവാദമാണ് കാട്ടുന്നത്. ദേശീയപാതയിലെ പ്രധാന പാലമായ മൊയ്തുപാലം തക൪ന്നിട്ട് വ൪ഷങ്ങളായി. സുരക്ഷിത യാത്രയല്ല പാലത്തിലൂടെ. പുതിയ പാലവുമായി ബന്ധപ്പെട്ട പ്രഖ്യാപനങ്ങളുണ്ടാവുന്നതല്ലാതെ മറ്റൊന്നും നടക്കുന്നില്ലെന്നും അദ്ദേഹം പറഞ്ഞു. വാ൪ത്താസമ്മേളനത്തിൽ പി. ജയരാജൻ, എം.വി. ജയരാജൻ എന്നിവരും പങ്കെടുത്തു.