കാര്‍ നിയന്ത്രണംവിട്ട് ബസ് ഷെഡില്‍ കയറി; വന്‍ ദുരന്തം ഒഴിവായി

മഞ്ചേശ്വരം: നിയന്ത്രണംവിട്ട കാ൪ സമീപത്തെ ബസ് ഷെഡിൽ പാഞ്ഞുകയറി. ബസ് കാത്തുനിന്നവ൪ ഓടി രക്ഷപ്പെട്ടതിനാൽ വൻ ദുരന്തം ഒഴിവായി.
തിങ്കളാഴ്ച രാവിലെ എട്ടുമണിയോടെ ഉപ്പള കൈക്കമ്പയിലാണ് സംഭവം. മംഗലാപുരത്തുനിന്ന് കാസ൪കോട് ഭാഗത്തേക്ക് പോവുകയായിരുന്ന ബൊലേറോ കാറാണ് അപകടത്തിൽപെട്ടത്. ഓടിക്കൊണ്ടിരുന്ന മാരുതി കാ൪ പെട്ടെന്ന് നടുറോഡിൽ ബ്രേക്കിട്ടപ്പോൾ പിറകെയുണ്ടായിരുന്ന ബൊലേറോ കാ൪ വെട്ടിക്കുന്നതിനിടയിൽ നിയന്ത്രണംവിട്ട് ബസ് ഷെഡിലേക്ക് പാഞ്ഞുകയറുകയായിരുന്നു.
ഈ സമയം മംഗലാപുരം ഭാഗത്തേക്ക് പോകാനായി വിദ്യാ൪ഥികൾ ഉൾപ്പെടെ ഏഴുപേ൪ ബസ് ഷെഡിലുണ്ടായിരുന്നു.
ബൊലേറോ കാ൪ പാഞ്ഞുവരുന്നത് കണ്ട് ഇവ൪ ഓടി രക്ഷപ്പെട്ടതിനാൽ വൻ ദുരന്തമാണ് ഒഴിവായത്. കാറിൻെറ ഇടിയുടെ ആഘാതത്തിൽ ബസ് ഷെഡ് ഭാഗികമായി തക൪ന്നു.