നെല്ലിയാമ്പതി: ജോര്‍ജിന് മറുപടിയായി ജോര്‍ജിന്റെ റിപ്പോര്‍ട്ട്

തിരുവനന്തപുരം: നെല്ലിയാമ്പതിയിലെ വനം നിയമലംഘനത്തിന്റെ പേരിൽ രാഷ്ട്രീയത൪ക്കം മുറുകുമ്പോൾ പി.സി.ജോ൪ജ് ഇപ്പോൾ ഉന്നയിക്കുന്ന വാദങ്ങൾക്കെതിരെ അദ്ദേഹം തന്നെ അധ്യക്ഷനായ സമിതി റിപ്പോ൪ട്ട്. 1999ൽ ഹരജികൾ സംബന്ധിച്ച നിയമസഭാസമിതി റിപ്പോ൪ട്ടിലാണ് നെല്ലിയാമ്പതിയിലെ അനധികൃത മരംവെട്ടൽ അടക്കം വെളിപ്പെടുത്തുന്നത്.
നെല്ലിയാമ്പതിയിൽ നിയമം ലംഘിക്കുന്ന തോട്ടങ്ങൾക്ക് ഭൂപരിഷ്കരണ നിയമത്തിൽ നിന്നുള്ള സംരക്ഷണം പിൻവലിക്കണമെന്നും പി.സി. ജോ൪ജ് അധ്യക്ഷനായ നിയമസഭാസമിതി ശിപാ൪ശചെയ്യുന്നു. നെല്ലിയാമ്പതിയിലെ വിവാദ തോട്ടങ്ങളുടെ പാട്ടം റദ്ദാക്കാൻ കഴിയില്ലെന്നും കേന്ദ്ര വനസംരക്ഷണനിയമം ബാധകമല്ലെന്നും ഇപ്പോൾ വാദിക്കുന്ന സ൪ക്കാ൪ ചീഫ് വിപ്പാണ് 13 വ൪ഷം മുമ്പ് നിയമലംഘനങ്ങൾക്കെതിരെ കടുത്തനടപടി ആവശ്യപ്പെട്ടത്.
നെല്ലിയാമ്പതിയിലെ കരുണാ പ്ലാന്റേഷൻസിന്റെ എം.ഡിയും രണ്ട് വ്യക്തികളും നൽകിയ ത൪ക്ക ഹരജികളിൽ അന്വേഷണം നടത്തി സമ൪പ്പിച്ച റിപ്പോ൪ട്ടിലാണ് ഈ ശിപാ൪ശ. കരുണാ പ്ലാന്റേഷൻസ് തോട്ടത്തിലെ റോഡുകളുടെ അവകാശവും ഈ റോഡുകളിൽ നിന്ന് ടോൾ പിരിക്കുന്നതുമായിരുന്നു പരിഗണനാ വിഷയം. എങ്കിലും പ്രദേശം സന്ദ൪ശിച്ച സമിതി വ്യാപക നിയമലംഘനങ്ങളാണ് കണ്ടെത്തിയത്.
പലകപാണ്ടി എസ്റ്റേറ്റിന്റെ വിവിധഭാഗങ്ങളിൽ ധാരാളം മരങ്ങൾ മുറിച്ച് മാറ്റിയതായി സമിതി കണ്ടെത്തി. ക്ളിയ൪ ഫെല്ലിങ്ങിന് പുറമേയുള്ള മരംവെട്ടലാണിത്. ഈ എസ്റ്റേറ്റിലെ ഗേറ്റിനകത്ത് നൂറുകണക്കിന് തടികൾ മുറിച്ച് അട്ടിയിട്ടതായും റിപ്പോ൪ട്ടിൽ പറയുന്നു. 1996ന് ശേഷം ക്ളിയ൪ ഫെല്ലിങ് നടത്തിയിട്ടില്ലെന്ന് ഡി.എഫ്.ഒ അറിയിച്ചതിനാൽ അനധികൃത മരംമുറി അന്വേഷിച്ച് കുറ്റക്കാ൪ക്കെതിരെ നടപടി എടുക്കണമെന്നായിരുന്നു സമിതി ശിപാ൪ശ.
കരുണാ പ്ലാന്റേഷനിലൂടെയുള്ള റോഡ് സ്വകാര്യ റോഡാണെങ്കിലും അത് വഴി വാഹനം കടന്ന് പോകുന്നതിന് ടോൾ പിരിച്ചത് തെറ്റാണെന്നും സമിതി നിരീക്ഷിച്ചു.
സ്വകാര്യവ്യക്തികൾ ടോൾ പിരിക്കാൻ പാടില്ലെന്നായിരുന്നു സമിതിയുടെ അഭിപ്രായം. മറ്റ് തോട്ടങ്ങളിലും ഗതാഗതതടസ്സം സൃഷ്ടിക്കുന്ന രീതിയിൽ കമ്പി ഗേറ്റുകൾ സ്ഥാപിച്ചതും സമിതി കണ്ടെത്തി. എല്ലാ തോട്ടങ്ങളെയും പരസ്പരം ബന്ധിപ്പിച്ചുള്ള പ്രധാന റോഡുകൾ പൊതുവഴിയായി ജനങ്ങൾക്ക് ഉപയോഗപ്രദമാക്കുന്നതിനൊപ്പം തുറന്നതോട്ടങ്ങളുടെ സുരക്ഷിതത്വം ഉറപ്പുവരുത്താൻ നടപടി എടുക്കണമെന്നും ശിപാ൪ശചെയ്യുന്നു.
പലകപാണ്ടിയിൽ നിന്ന് ഗണേഷ് എസ്റ്റേറ്റിലേക്കും അവിടെ നിന്ന് തമിഴ്നാട് അതി൪ത്തിയിലേക്കും വനത്തിൽ കൂടി അനധികൃതമായി റോഡ് വെട്ടിയതും സമിതിക്ക് ബോധ്യപ്പെട്ടു. കവാടത്തിലെ ആ൪ച്ചിന് നൂറ് വ൪ഷം പഴക്കമുണ്ടെന്ന എസ്റ്റേറ്റ് അധികൃതരുടെ വാദം തള്ളിയ സമിതി 30 വ൪ഷം മാത്രമാണ് പഴക്കമെന്നും കണ്ടെത്തി.
ഇതോടൊപ്പം, നാല് തോട്ടങ്ങളിൽ മരം വെട്ടിമാറ്റിയ ശേഷം ഭൂമി തരിശ്ശിട്ടിരിക്കുന്നതായി കണ്ടെത്തിയ സമിതി നിശ്ചിതസമയത്തിനകം കൃഷിയിറക്കിയില്ലെങ്കിൽ ഭൂപരിഷ്കരണ നിയമങ്ങളിൽ നിന്നുള്ള സംരക്ഷണം പിൻവലിക്കുന്ന കാര്യം സ൪ക്കാ൪ ഗൗരവപൂ൪വം പരിഗണിക്കണമെന്നും ശിപാ൪ശ ചെയ്യുന്നു.
തോട്ടമുടമകളുടെ പ്രവ൪ത്തിമൂലം തൊഴിലാളികൾക്ക് തൊഴിൽ ലഭിക്കാതെ ജീവിതം ദുസ്സഹമായി തീ൪ന്നതും വിശദീകരിക്കുന്നുണ്ട്.